fbpx

बौद्ध परियत्ति शिक्षाया विकासया लागि येँ महानगरपालिकाया ग्वहालि

झीगु संवाददाता
येँ, पोहेलाथ्व एकादसि ११४० । नेपालय् ६५दँनिसें न्ह्यानावायच्वंगु बौद्ध परियत्ति शिक्षाया विकास यायेत येँ महानगरपालिकां ग्वहालि याःगु दु ।

थन विश्वशान्ति विहारय् जूगु छगू ज्याझ्वलय् येँ महानगरपालिकाया मेयर विद्या सुन्दर शाक्यं अखिल नेपाल भिक्षु महासंघं न्हयाकाच्वंगु नेपाल बौद्ध परियत्ति शिक्षा विकासया लागि अखिल नेपाल भिक्षु महासंघसंग लिसे जूगु सम्झौता बमोजिम बिइगु ग्वहालि कथं तेइस लाख पैंसाठी हजार तका लःल्हानादिल । चेक नेपाल बौद्ध परियत्तिया शिक्षाध्यक्ष एवंं अखिल नेपाल भिक्षु महासंघया नायः भिक्षु मैत्री महास्थविरं कयाबिज्याःगु खः ।

ज्याझ्वलय् नवासें मैत्री भन्तेनं नेपालय् हे बुद्ध शिक्षाया विकास यायेत न्ह्यानाच्वंगु परियत्ति शिक्षाया लागि धकाः न्हापा यलया मेयर बेखारत्न शाक्य व बुद्धिराज वज्राचार्यं भचा भचा ग्वहालि याःगु बाहेक सरकारं खास हे ग्वहालि यानामच्वंगु अवस्थाय् येँ महानगरपालिकाया थ्व ग्वहालि ऐतिहासिक जूगु खँ कनाबिज्यात ।

अथे हे मेयर शाक्यं नेपाःया हे नां विश्वय् कायेकूम्ह भगवान बुद्धया शिक्षायात थुभनं प्रचारप्रचार यानाच्वंगु परियत्ति शिक्षायात राज्यं थ्व स्वयाः नं यक्व ग्वहालि यानाः थुकियात देय्या ७७ जिल्लाय् थ्यंकेमाःगु खँ कनादिल । अले थुलि ग्वहालि यायेदयाः महानगरपालिका, अनया कर्मचारी व नागरिक दक्वस्यां गर्व महशुस याःगु नं धयादिल ।

ज्याझ्वलय् ञानवती गुरुमानं नेपालय् गुकथं परियत्ति शिक्षाया शुरुवात जुल अले गथे यानाः थौंया अवस्थाय् तक थ्यन धइगु खँ बःचाहाकलं कनाबिज्यात ।

rzm

Leave a Reply

Your email address will not be published. Required fields are marked *