fbpx

असनय् पवित्र महापरित्राण पाठ ज्याझ्वः

सुगत रत्न सिन्दुराकार

भिंतुना गुथि असंया ग्वसालय् सकल प्राणिया सुख व शान्तिया कामना यानाः वंगु पुष ५ गते शनिवाःया न्हि असंया दुवातय् न्हिच्छियंक महापरित्राण पाठ अखिल नेपाल भिक्षु महासंघपाखें याना बिज्यागु दु । उगु ज्याझ्वलय् श्रद्धेय बोधिसेन महास्थवीर भन्तेपाखें त्रिरत्न गुण, गुणघोष महास्थविर भन्तेपाखें पंचशील प्रदान व शरणंकर भन्तेपाखें धर्मदेशना याना बिज्यागु खः । थुगु ज्याझ्वलय् श्रद्धेय भन्तेपिंपाखें पालंपा याना महापरित्राण पाठ याना बिज्यागु खः । सुथसिया ८.३० ताः इलय् न्ह्याःगु थुगु पवित्र महापरित्राण पाठया ज्याझ्वः सनिलया ४ ताः इलय् क्वचागु खः । थुगु पवित्र ज्याझ्वलय् श्रद्धेय भन्ते व गुरुमांपिं यानाः थ्यंमथ्यं १५० म्हति बिज्यागु खः ।


भिंतुना गुथिपाखें ज्याझ्वःया संयोजकया भूमिका बुद्धधर्म ह्यःमि विद्यासागर तुलााधर म्हितादीगु खःसा थुगु ज्याझ्वलय् श्रध्देय् भन्तेपिं, श्रध्देय गुरुमांपिंया लिसे लिसें आपालं हे श्रद्धावान उपासक उपासिकापिनिगु नं उपस्थित दुगु खः । नाप नापं वय्कःपिन्सं भिक्षु, गुरुमांपिन्त दान प्रदान नं यानादीगु खः । थुगु ज्याझ्वलय् असंया गुंलाबाजं थानाः उपासक उपासिकपिन्सं बुद्धया प्रतिमा नं छ्यंनय् तयाः चाहिकेगु ज्या याःगु खः ।

महापरित्राणय् बुद्धकालिन पाली भाषाय् संग्रहित त्रिपिटक अन्तर्गत सुत्र पिटकय् दुगु मौलिक बुद्ध वचनया ३० गू सुत्र उपदेशत दु । थुगु सुत्र उपदेशयात हे भिक्षु महासंघपाखें न्हिन्छियंक अटुत रुपं पाठ याय्गु ज्या हे महापरित्राण पाठया रुपय् कयावयाच्वंगु दु ।

थुगु ३० गू सुत्र थुगु प्रकारं दु् ।

१.सरणगमन,ं २. दशस्क्खिापदानि, ३. सामणेर पञ्हो, ४.द्वतिंसाकारो, ५( पच्चवेक्खणा, ६. दसधम्म सुत्तं, ७. महामंगल सत्तं, ८. सतन सत्तं, ९. करणीय मेत्त सुत्तं, १०. खन्ध परितं, ११. मेत्त सुतं, १२. मेत्तानिसंस, १३.मोर परित्तं,१४. चन्द परित्तं, १५. सुरिय परित्तं, १६. धजग्ग परितं, १७. महाकस्सपत्थेर बोज्झगं सुत्तं, १८. महामोग्गल्लानत्थेर बोज्झगं सुत्तं, १९. महाचुन्दत्थेर बोज्झगं सुत्तं, २०. गिरिमानन्द सुत्तं, २१. इसिगिलि सुत्तं, २२.धम्मचक्कपवत्तन सुत्तं, २३.महासमय सुत्तं, २४.आलवक सुत्तं, २५.कसीभारद्वाज सुत्तं, २६. पराभव सुत्तं, २७. वसल सुत्तं, २८.सच्चविभंग सुत्त,ं २९. आतानाटिय सुत्तं (क), ३०. आतानाटिय सुत्तं (ख) दुथ्याकातःगु दु ।

महापरित्राण पाठ याय्गु परम्परा झीगु देय् नेपालय् ला दुगु हे जुल । थुकिया नाप नापं भारत, थाइलैण्ड, श्रीलंका, वर्मा, वंगलादेश, लाओस, कम्वोडिया, भियतनाम, मलेसियाया नाप नापं थौं कन्हयु् अमेरिका, युरोप व अष्टेलिया लगायत आदि देशय्ं तकं नं सम्मान रुपं पाठ याय्गु प्रचलन दयावयाच्वंगु दु ।

महापरित्राण पाठया पुण्य फल बारे महाकारुणिक तथागत भगवान बुद्धं थुकथं आज्ञा दय्का विज्यागु दु । त्रिरत्नया गुणानुस्मरण, सत्यया गुणानुस्मरणं जायाच्वंगु पवित्र परित्राण सुत्रया पाठ यात धाःसा प्यखेरं वय्फूगु भय, विध्न वाधा, उपद्रव, रोग, शोक, अनिष्ट आदि दुःख कष्टपाखें रक्षा जुया पुण्यफल प्राप्त जुइगु खँ कना बिज्यागु दु ।

खास याना पवित्र महापरिणात्र पाठ छाय् याइ धैगु खँय् नं आपोसिके जिज्ञासा दयाच्वनेफु । खास याना बौद्ध विद्धानपिनिगु धापुकथं महापरित्राण पाठ धैगु हे भगवान बुद्धं देशना याना विज्यागु पवित्र महापरित्राण सुत्र उपदेशयात जनमानसय् प्रचार प्रसार याना समाजय् सुख, शान्ति कायम याय्गु खः । थुकथं हे बुद्ध जन्मभूमि नेपाः लगायत विश्व शान्तिया कामना याना नं महापरित्राण पाठ याय्गु ज्या याना वयाच्वंगु दु । अथेहे सकल प्राणीपिनिगु सुख शान्तिया नितिं थुकथंया पाठ याय्गु ज्या याना वय्गु नं यानाच्वंगु खःसा भगवान बुद्धया मौलिक उपदेशयात सपुरक्षित याना तय्गु नितिं नं महापरित्राण पाठ याना वनाच्वनेमाःगु आवश्यकता जुयाच्वंगु दु । थुकथं हे थौं विश्वया थीथी देशय् महापरित्राण पाठ याना वःथें हे नेपालय् नं पाठ याय्गु ज्याखँत न्ह्याका अन्तर्राष्टिय ऐक्यवद्धता कायम याना देय्या प्रतिस्था उच्च तय्गु ज्या नं जुयावयाच्वंगु दु ।

 

Leave a Reply

Your email address will not be published. Required fields are marked *