fbpx

लुम्बिनी क्यबय् हानं थ्वल त्रिपिटक पाठया सः

राजेन मानन्धर
भगवान बुद्धया परिनिर्वाण धुंकाः वसपोलया बचनयात मुंकेगु कुतः तःकः जुल । खयेत ला थकालिं कनेगु व क्वकालिं लुमंकातयेगु हे जुयाः नं सलंसः दँ तक बुद्ध शिक्षा म्वानाच्वन, तर लिपा च्वयामतसे मगानावन, च्वज्या न्ह्यात । थथे यानाः मुंकातःगु बुद्ध बचनयात त्रिपिटक धाइ । थुकिइ हे बुद्धं कनाबिज्याःगु ८४द्वः उपदेशत दुथ्यानाच्वंगु दु ।

त्रिपिटक यात स्वब्वय् ब्वथलातःगु दु — विनयपिटक, सुत्तपिटक व अभिधम्मपिटक । थुकियात विशेष यानाः थेरवादीतय्सं बौद्ध शिक्षाया प्राथमिक श्रोतया रुपय् कयाच्वंगु दु । त्रिपिटक अन्तर्गतया विनयपिटकयात भिक्खुविभंग, भिक्खुनीविभंग, महावग्ग, चुलवग्ग तथा परिवारय् ब्वथलातःगु दु । सुत्तपिटकय् दीघनिकाय, मज्झिमनिकाय, संयुक्तनिकाय, अङ्गुत्तरनिकाय तथा खुद्दकनिकाय दुथ्याः । अथे हे अभिधम्मपिटक अन्तर्गत धम्मसङ्गणी, विभङ्ग, धातुकथा, पुग्गलपञ्ञती कथावत्थु, यमक र पट्ठान दुथ्याकातःगु दु । थ्व दक्व मुंकेबलय ४०गू धयाथें सफूत खाइ । दुखया खँ, बुद्ध नेपालय् बूगु हे खःसां थुकिया दक्व भाग नेपालय् सुरक्षित जुयामच्वं, आः नकतिनि हे जक विदेशं व दक्व सफूत झीथाय् थ्यने धुंकल । अले उकिया चकंछि हे नं झीगु भासं अनुवाद मजूनि ।

संसारया दक्व बौद्ध देसय तःधंगु व चीधंगु पुचलय् च्वनाः भिक्षु भिक्षुणी म मेमेपिं इलय् ब्यलय् त्रिपिटक पाठ यायेगु याः — सलंसःदँनिसें थथे जुयावयाच्वगुं हे खः । नेपाल लगायत विश्वया थी थी देसय् बौद्ध विहार, बहाल बहिलय् नं बुद्ध बचनयात थःथःगु पहलं पाठ यायेगु परम्परा दु ।

वंगु निद्वःदँ दुने दक्षिण एशियाया राजनीतिक, सामाजिक व धार्मिक अवस्थाय् यक्व हिउपाः वल । बुद्धं हे पिनाथिकूगु बुद्धधर्म थन लोप धयाथें हे जुयावन । नेपालय् नं ला बुद्धधर्मं राजनीतिक प्रहार अप्रत्यक्ष कथंसां फयेमाल । बुद्धया जन्मभूमि लुम्बिनीइ नं द्वलंद्वः दँ तक थनया अज्याःगु पवित्रस्थल चाया दुने ल्हानाच्वनेमाःगु अले थनया बौद्ध स्थानीयबासीततय्गु किपालु तकं ल्यनामच्वनेगु धइगु अथें जुल खइमखु । अज्याःगु अवस्थाय् थन त्रिपिटक पाठ यायेगु परम्परा लोप जुयावनाः गनं गनं महाविहार तथा गुम्बाय् कर्मकाण्डया रुपमा सां ल्यनाच्वन । त्रिपिटकया सुत्रतय्गु व्याख्या साधारण मनूतय्सं थुइक यायेफुपिं मनूत मदयावन ।

आः हाकनं संसार न्यंक मनूतय् बुद्धशिक्षाप्रतिया रुची अप्वयायेवं थ्व त्वाःदःगु परम्परायात हाकनं सम्भावना खनेदःवःगु दु । यक्वस्यां मालेकुले यानाहल, आखिर थ्व त्रिपिटक धइगु छु धकाः । थ्व हे सन्दर्भय् भारतया महाबोधी द्यःगलं त्रिपिटकको पाठ यायेगु परम्परा सन् २००६ निसें न्हयाकल । थुकिया लगभग १४ दँलिपा विश्वन्यंकया बौद्ध देय्तय्गु प्रतिनिधिया सहभागिता हयाः बोधिगयाय् त्रिपिटक पाठ यायेगु परम्परा हानं न्ह्यात ।

लुम्बिनी भगवान बुद्ध जन्म जूगु थाय् । झी बुद्ध नेपालय् जन्मेजूगु धकाः विश्वया हे पर्यटक दुत हयेत ज्याझ्वः न्ह्याकाच्वनाबलय् थन वइपिं तीर्थयात्रीत धाःसा थन धार्मिक क्रियाकलाप जूगु स्वयेमखन धकाः नुगलय् स्याकावनी । उपिं थन वइबलय् गथे पुलिं चुयाः घौछि त्रिरत्न शरण गमन यानाः वा शील प्रार्थना यानाः वनी, अथे हे थन च्वंपिं नं अथे हे यानाच्वंगु स्वयेचाहेजुइ उमिसं । तर थथे जुइफयाच्वंगु मदु । स्थानीय जनतायाके बुद्धधर्मप्रति श्रद्धा दनामवःगुलिं अले स्वनिगः व हिमाली भेगया तीर्थयात्रुहरुत वंगुइलय् जक व द्यःगःथें च्वनी । थज्याःगु अवस्था सकसियां अनुभव याःगु जुइमाः ।

थज्याःबलय् बोधिगयाय् जुयाच्वंगु नियमित त्रिपिटक पाठ कार्यक्रमपाखें प्रेरित जुयाः जुइमाः, नेपालयाः बुद्ध जन्मभूमि लुम्बिनीइ नं थगुने सन् २०१८निसें अन्तर्राष्ट्रिय त्रिपिटक पाठ समारोह यायेगु परम्परा न्ह्याःगु खः । थगुने घोषणा याःकथं लुम्बिनी अन्तर्राष्ट्रिय त्रिपिटक पाठ समारोह समितिया ग्वसालय् निक्वःगु अन्तर्राष्ट्रिय त्रिपिटक पाठ (अथवा च्यान्टिङ) कार्तिक २८गते न्ह्यात ।

थुकिया न्हापांगु कार्तिक २८ अथवा नभेम्बर १४कुन्हु सुथय् प्रतीकया रुपमा हयातःगु त्रिपिटक ग्रन्थ लिसें विशिष्ट व्यक्तितय्त न्ह्यःनेतयाः थीथी जिल्लां वःपिं नेपाली व थीथी देसं वःपिं भन्ते गुरुमांपिं व उपासक उपासिकापिनिगु पदयात्रा न्ह्यात । यलया बौद्धसमुदायया धाःबाजा न्हापां च्वन, वयांलिपा समाजया गन्यमान्य मनूत अले भन्ते गुरुमांपिं, अनं उपासक उपासिकापिं। शान्तिदीप स्थलनिसें न्ह्याःगु उगु पदयात्रा मायादेवी द्यःगः चाःहिलाः सभास्थलय् क्वचाल । त्रिपिटक पाठ लुम्बिनीया मायादेवी द्यःगःया उत्तर पुर्वया उद्यानय् दयेकातःगु जुयाच्वन ।

ग्वसाः खलकं २५ देय्या १००० स्वयाः मल्याक्क भिक्षु भिक्षुणी तथा उपासक उपासिकापिं ब्वतिकाःवःगु धकाः धयातःगु दु । धार्मिक कार्यक्रम हे मजुयाच्वंथाय् बुद्धधर्मप्रति श्रद्धा यानाः उलिमछि देसं उलिमछि मनूत थन वयेगु धइगु निश्चय नं उत्साहवर्धक ज्या खः ।

पदयात्रा सिधयेवं छाय्पियातःगु दबुलिइ औपचारिक ज्याझ्वः जुल । भन्ते, गुरुमांपिं व मेमेपिं पाहाँपिं थःथःगु थासय् च्वनेवं उपसंघनायक भिक्षु बोधिसेन महास्थविरं शील प्रदान यानाबिज्यात ।

थुकिया उलेज्या प्रदेश ५ या मुख्यमन्त्री शंकर पोखरेल, सांसद सुजिता शाक्य, लुम्बिनी सांस्कृतिक नगरपालिकाया प्रमुख मनमोहन चौधरी तथा थाइल्याण्डया पूर्वमन्त्री कुनिन सुधारतं मंकाःकथं त्वाःदेवाय मत च्याकाः यात । ज्याझ्वलय् मुख्यमन्त्री पोखरेलं सरकारं लुम्बिनी क्षेत्रय् पर्यटक कयेत यानाच्वंगु थी थी ज्याया बारे जानकारी बियादिल । अनं थी थी आयोजक व मेमेपिन्सिं थःथःगु नुगःखँ तयेगु ज्या जुल ।

उलेज्या धुंकाः ग्वसाःखलकं धयातःथे समय तालिका अनुसार थी थी राष्ट्रया प्रनितिधितय्सं थःथःगु अंशया त्रिपिटक पाठ यात । हरेक दिन न्हिनय् नयेगु व च्यात्वनेगु ई त्वःताः सुथय् ८ बजेदनिसें सनिलय ५ बजेतक पाठ यायेगु तालिका दयेकातःगु जुयाच्वन ।

न्हापांगु दिनया पाठ सत्रया नेपाली भिक्षुतय्गु नेतृत्वय् सूत्रपिटक अन्तर्गतया दीर्घनिकायया ब्रह्मजालसूत्र वाचन जुल । अनं श्रीलंकाली भिक्षुपिंपाखें सुत्रपाठ जुल । छखे नेपाली उपासक उपासिकापिं मुलपतिं थ्यानाः बुद्ध बचन न्यनाच्वन धाःसा मेखे सुं सुं ध्यान नं च्वनाच्वन ।

निन्हुकुन्हु कार्तिक २९ अथवा नभेम्बर १५ कुन्हु भियतनामी तथा क्याम्बोडियाली भिक्षुपिन्सं पाठ यानाबिज्यात । अनं लिपा चीनियाँ, जापानी तथा कोरियन भिक्षुपिनिगु नेतृत्व यायेगु पाः वल ।

स्वन्हुकुन्हु कार्तिक ३० अथवा नभेम्बर १६कुन्हु थाइ भन्तेपिनिगु नेतृत्वय् पाठ जुल । उगुकथं न्हापांगु दिनय् सुत्तपिटक, निन्हुकुन्हु विनय पिटक व स्वन्हुकुन्हु अभिधर्मपिटकया सुत्र यात । न्हिनय् वज्रयानी गुरुजुपिनिगु पुचःपाखें पाठ जुल । अनं नेपाली थेरवाद गुरुमांपिन्सं व महायानी आनीपिन्सं पाठया नेतृत्व कयाबिज्यात ।
थुकथं बुद्धबचनया मुना त्रिपिटकया छुं छुं ल्ययातःगु गाथात लगभग १ हजार भिक्षु भिक्षुणीपिं व मेमेपिन्सं स्वन्हुतक पाठ यानाः ल्वःमनेधुंकूगु परम्परायात पुनर्जीवन बिइगु ज्या जुल । थुकिइ नेपाल लगायत भारत, चीन, श्रीलंका, थाइल्याण्ड, म्यानमार, भियतनाम, लाओस, कोरिया, जापान तथा मेमेगु देय्या प्रतिनिधिपिन्सं ब्वति काःगु खः।

उकियालिसें निन्हुतक नेपालया व विदेशी प्रतिष्ठित बौद्ध विद्वानपिनिपाखें धर्मदेशना जुल । न्हापांकुन्हु धर्मदेशना उपसंघनायक भिक्षु बोधीसेन महास्थविरपाखें व सिंगापुरया भिक्षु सुमनासिरी महास्थविरपाखें, अनं निन्हुकुन्हु विद्याधर आचार्य महायोगी श्रीधर राणा रिम्पोचेबाट धर्मदेशना जूगु खः ।

भिक्षु बोधीसेन महास्थविरं बुद्धया शिक्षा जीवनोपयागी जूगुलिं थ्व ध्यान तयाः न्यनेमाःगु अले थुकियात थःगु जीवनय् नालेमाःगु खँ कनाबिज्यात । भिक्षु सुमनासिरी महास्थविरं बुद्ध नेपालय् बूगु खँय् सुयातं संदेह मदूगु खँ उल्लेख यासें दक्व नेपालीतय्सं आः बुद्धया शिक्षा अबलम्बन यानाः थःत बौद्ध दयेके हथाय् जूगु खँ कनाबिज्यात । अथे हे श्रीधर राणा रिम्पोचें भगवान बुद्धं कनाबिज्याःगु उपदेशया संग्रह त्रिपिटक हे खः तर नेपाल लगायत विभिन्न देशय् राजनीति कारणं गनं गनं तना वन अले छथाय् दूगु अनुवाद जूगु मेथाय् यंकाः आः विश्वयाके विभिन्न भासं विभिन्न रुपय् त्रिपिटक संरक्षित जुयाच्वंगु नं कनाबिज्यात ।

स्वन्हुतकया पाठ सिधयेवं औपचारिक समापन कार्यक्रम आयोजना जुल । थ्व ज्याझ्वलय् नवासें बोल्दै लुम्बिनी अन्तर्राष्ट्रिय त्रिपिटक पाठ समितिया अध्यक्ष मैत्री महास्थविरं सकसिया सहकार्य एवं सहभागितां हे थज्याःगु ऐतिहासिक कार्यक्रम सफल जूगु धासें आवंलि सरकारं हे थज्याःगु ज्याझ्वःया आयोजना व व्यवस्थापन यायेमाःगु खँ धयाबिज्यात । अथे हे अन्तर्राष्ट्रिय त्रिपिटक पाठ परषिद्या दुजः वाङ्मो दिक्सें सकलसिया ग्वहालिं जक थज्याःगु ज्या ताःलाइगु खँ कनादिल । लुम्बिनी विकास कोषया उपाध्यक्ष मेत्तेय भन्तेनं थ्व ज्याझ्वः बौद्धतय्गु जक मखु धासें थन दक्व शान्तिप्रेमी जनताया ब्वतिकायेजिउगु ज्याझ्व जुयाच्वंगु जानकारी बियाबिज्यात । थ्व झ्वलय् आयोजकयापाखें थ्व ज्या ताःलाकेत थी थी कथं ग्वहालि याःपिन्त मतिनाया चिं नं लःल्हायेगु ज्या जुल ।

थुलि औपचारिक ज्याझ्वः क्वचायेवं अन उपस्थित दक्व भिक्षु गुरुमां व लामा अले आनीहरुपिन्त उपासक उपासिकापिन्सं दान प्रदान यान । भिक्षु भिक्षुणीपिन्त दान दिनुयायेगुयात बुद्ध धर्मय् छगू कुशल कर्मया रुपय् काइ ।

अन्तय् ज्याझ्वलय् ब्वतिकाःपिं दक्व भिक्षु भिक्षुणी, लामा, आनी व सकल उपासक उपासिकापिं झ्वः छुनाः जवगु ल्हातिं मैनबत्ती ज्वनाः मायादेवी द्यःगःया जःखः दीपयात्रा यानाः विश्वशान्तिया कामना यात । बुद्धधर्मय् दीप प्रज्ज्वलनया विशेष अर्थ दु । भगवान बुद्धं थः शिष्यपिन्त थःगु मत थः हे जु धयाबिज्याःगु खः । थथे जुल धाःसा व मनू गथे थःगु मत ज्वनावंम्ह मनू लक्ष्य तक लँ स्वयाः वने खनी अथे हे अज्याःम्ह मनुखं जीवनकाछि थःगु जीवनया निर्णय थम्हं यायेफइ । । अथे धइथें थ्व स्वन्हुतक त्रिपिटक पाठ यायेधुंकाः थःगु ल्हातिं मैनबत्ती ज्वनाः पदयात्रा यानाः थ्व हे सन्देश बिउगु जुइ ।

थपाय् तःधंगु ज्या यानाः मगाःमचाः धइगु दइगु स्वभाविक खः । थन छुं छुं खँ कुलेगु स्वयागुया उद्देश्य आकिवं जुइगु थज्याःगु ज्या झन् भव्य जुइमा धइगु मनं तुना हे जक खः ।

दकलय् न्हापां आयोजक संस्थाया धिसिलाःगु थां धइगु अखिल नेपाल भिक्षु महासंघ हे खः । नेपालय् जूगु थज्याःगु थेरवादी बौद्धपिनिगु प्रखुताय् जुइमाःगु ज्याझ्वलय् महासंघया पदाधिकारीपिं हे सकलें मथ्यनेगुयात अन ब्वतिकाःवःपिन्सं तसकं अर्थपूर्ण कथं काल । कथिन नं सिधयेधुंकल, मेगु अज्याःगु येँय् छुं ज्याझ्वः नं मदु, अथेसां थज्याःगु पूण्यया ज्याय् हे सहभागिता क्यने मफुगु महासंघं आः नेपाःथज्याःगु बुद्धधर्मयात खनेदयेक वा मदयेक क्वत्यलातःगु देसय् थःगु पहिचान वा धार्मिक समानाधिकारया लागि गुकथं ल्वाइ धइगु न्ह्यसःचिं नं थुकिं थंगु दु ।

लसताया खँ खः कि थन थी थी देसं द्वलं द्वः धयाथें सहभागी जुल । भिक्षु, भिक्षुणी, लामा, आनीपिं नेपाः लगायत थी थी देसं वःपिं खनेदत । दकलय् सकलय् सःसिउपिं अले पाठया नेतृत्व याइपिं धकाः सकस्यां हनबना तःगु खः तर वसपोलपिं हे स्वन्हु तक धिसिलाक्क थःथःगु थासय् च्वनाः थःगु पालय् बाचन यायेगु व मेपिनिगु पालय् एकचित्तं श्रवण यायेगु मयाःगु खनेदुबलय् उपासक उपासिकापिं उसिचाइगु स्वभाविक खः । आःया सन्दर्भय् चिवर पुनातःपिन्सं धर्मसंघया नेतृत्व कायेगु जक मखु आदर्श जुयाः हे न्ह्यःने च्वनाः समाजयात लँ क्यनेमाःगु अवस्था दु । भन्तेपिं गुरुमांपिें थःगु पाःसिधयेवं दनावनेगु चलन वःबलय् समारोह स्थल खाली खाली खनेदइगु हे जुल । उकिसं विदेशं वःपिं नं गुलिं गुलिं ला थातं च्वं तर यक्व धयाथें थःगु पालय् जक वयाः ब्वनेगु अले लिपा वनेगु यायेवं थथे हे यानातःगु खःलाकि आयोजकया कमजोरी धकाः थुइके थाकुल । लाओस्या भन्तेपिं खनेमदइगु, भियतनामया भन्तेपिन्सं थःगु पालय् मब्वनेगु अले कोरियां छम्ह जक भन्ते उपस्थित जुइगु धइगु बांलाःगु खँ जुइफइमखु ।

किपा रेखा शाक्य

अनंलि उपासक उपासिकापिनिगु खँ । धायेम्वाः, लुम्बिनी बुद्ध जन्मेजूगु जूसां आःया अवस्थाय् अनया स्थानीयबासी बौद्ध मदु, वंगु सछिदँया अभियानं नं अन स्थानीयाबासीयात धाथें श्रद्धादुपिं बौद्ध दयेके मफयाच्वंगु दु । थज्याःगु अवस्थाय् लुम्बिनीइ गुगुं नं ज्याझ्वः जुइ उकियात सफल यायेत स्वनिगः व मेमेगु नेवाःलागाया नेवाःत व हिमाली प्रदेशया जनजातिपिन्सं हे छ्यं ग्वः खाकेगु अले उकियात भव्य यायेगु खः । थुगनेया स्वयाः थुगुसिइ स्वनिगःया नेवाःतय्गु सहभागिता म्हो जुल धइगु खँ अन बय्बय् जुल । न्यनेदुकथं अथे वनेगु आयोजना याःपिन्सं थगुनेस्वयाः थुगुसिइ तसकं यक्व ध्यबा म्हःगु खनेदत । ध्यबाकमेयायेगु स्वयाः म्हो खर्चं थज्याःगु पुण्यज्याझ्वलय् यक्व स्वयाः यक्व मनूत थ्यंकेगु कथं ज्याझ्वमुंकूसा दक्वं लय्तायेखनीगु खँय् शंका मदु ।

अन वयेगु धइगु त्रिपिटक पाठ यायेत खः । अथे खःसा थम्हं हे कण्ठ यानाः दक्व पाठ यायेसःपिं मदुगु अवस्थाय् अन पाठ जुइगु दक्व गाथाया दक्वस्यां ब्वनेजिइक सफूया व्यवस्था मजूगु धइगु नं कमजोरीया रुपय् कायेमाः । ल्हातिइ ब्वनेत सफू मदयेवं दक्वस्यां छसलं पाठ यायेमखनेवं दक्व उसिचाइगु, थःथवय् कालकुल खँ ल्हायेगु वा असभ्य तरिकां फ्यतुनाबिइगु वा स्थल हे त्वता वनसां अजू चायेमाःगु खँ तायेकेथाय् मन्त । स्वन्हु तक छु छु गबलय् पाठ यायेगु व दक्व गाथा दूगु सफूया व्यवस्था जूगु जूसा अन स्वन्हु च्वनाया अर्थ नं पिहाँ वइगु खइ ।

खयेत ला त्रिपिटक धइगु पवित्र बुद्ध वचन धायेवं उकियात पाठ हे मयाःसां न्यनाजक च्वंसां पूण्यलाभ जुइ । तर थज्याःगु खँ कनेगु, थःथःगु विहारय् वइपिं उपासक उपासिकापिन्त त्रिरत्न वन्दना व परित्राण दुनेलाःगु गाथा पाठ याकेगु स्वयाः मेगु स्यनेगु यानातःगु मदु जुइमाः । अथे मेमेगु गाथा पाठ स्यनामतःगुलिं हे झी उपासक उपासिकापिं थ्व पुण्यापाखें बन्चित जुल । अले अथे जूगुलिं झीगु थेरवाद बुद्धशासन पुनरुत्थान जुगू धयागु हे चय्दँ दतसां झी उपासक उपासिकापिन्के अज्याःगु तालीम वा शिक्षण अभाव जुयाच्वंगुलिं थज्याःगु ज्याय् उपिं सहभागी अले संयमित व अनुशासित जुयाः च्वनेमफुगु खनेदत ।

मनसे च्वनेफइमखु । भन्ते गुरुमांपिन्त थाइ विहार व चीनियाँ विहारय् अले उपासक उपासिकापिन्त गौतमी विहारय् नयेगु व्यवस्था यानातःगु अतिकं बांलाः। अथे हे थ्व ज्याय् स्वयंसेवकपिनिगु ज्या नं च्वछायेबहजू । तर लिक्कसं खाली थाय् दयेक नं अन थ्यंक नयेगु यानातःबलय् वये वनेत तापाःगु जक मखु, श्रद्धा मगाःपिं अनं हे लिहाँ मवयेगु तकं जूगु स्वयेमाल ।

मधासे मगाःगु खँ थ्व नं दु कि द्वलंद्वः स्वदेशी व विदेशी मनूत पाहाँ कथं सःतातःथाय् चःबि छगू हे गतिलाःगु व्यवस्था मदुबलय अन वःपिनि बेहाल स्वये लायक जुल । थपाय्धंगु लुम्बिनी उद्यानय् न्हियान्हिथं वइपिं द्वलंद्वः तीर्थयात्री व पर्यटकतय्त व हे प्यम्ह, च्याम्ह तक वनेजउिगु तसकं स्यंगु, नवःगु अले घचायापुचेस्वंगु चःबिहे जक दयाच्वनेगु धइगु आयोजक लुम्बिनी विकास कोषया लागि लज्जाया विषय खः ।

आयोजकयापाखें लुम्बिनी विकास कोषया कार्यकारिणी समितिया दुजः राजेश ज्ञवालीं आयोजना व्यवस्थापनय् छुं कमजोरी दूगु े स्वीकार यासें आकिवं थुकियात सुधार यायेगु बचं बियादीगुदु ।

आकिवं थ्व हे इलय् थन लुम्बिनीइ स्वकःगु अन्तर्राष्ट्रिय त्रिपिटक पाठ कार्यक्रमया आयोजना जुइ । आः लुम्बिनीइ हरेक वर्ष थी थी देशया बौद्ध भिक्षु भिक्षुणीपिं वयाः छसलं त्रिपिटक पाठ यायेगु परम्परा बसेजूगु दु । यक्व स्वयाः यक्व भिक्षु भिक्षुणी उपासक उपासिकापिनिगु अले थी थी संस्थातय्गु मिहेनत, लगन व सहकार्यं यानाः हे थ्व सफल जूगु दु । आकिवं थ्व स्वयाः अझ भव्य यायेमानि, राष्ट्रिय व अन्तर्रांष्ट्रिय स्तरं थुकियात व्यापक यायेमानि । उकिया लागि आवंनिसें हे पुलांगु इष्र्या व दम्भ त्वःताः, मगाःमचाःगु वाःचायेकाः, दक्व छथासं च्वनाः अझ यक्व सहभागी दयेकाः दक्वसिया सहकार्यं थुकिकात अझ यक्व व्यापक र सफल यायेमाःगु दु ।

नेपालभाषा टाइम्स

rzm

Leave a Reply

Your email address will not be published. Required fields are marked *