fbpx

बौद्ध विद्धान हर्षमूनि शाक्यया याेगदान लुमंकल

सुगत रत्न सिन्दुराकार

युवा बौद्ध समूहया संस्थापक नायः, वरिष्ठ सल्लाहकार एवं शाक्यरत्नपाखें विभूषित जुयादी धुंकूम्ह हर्षमूनि शाक्य मदुगुलिइ वय्कलं बौद्ध ख्यःया विकास यायेगु ज्याय् यानादीगु क्वातुगु योगदानयात कयाः युवा बौद्ध समूहलं गुणानुस्मरण ज्याझ्वः संघाराम विहारय् मंसिर २१ गते शनिवाःकुन्हु यात ।

संघाराम विहारय्  भिक्षु उपतिस्स महास्थवीरजुं पंचशील प्रदान याना न्ह्याकूगु थुगु ज्याझ्वलय् मदुम्ह समूहया संस्थापक नायः हर्षमुनि शाक्यजुया किपातय् समूहया सल्लाहकार न्हूच्छेरत्न नकःमि लगायत उपस्थितपिन्सं खादां न्यय्का सम्मान नं यात । थुगु गुणानुस्मरण ज्याझ्वलय् शान्तरत्न शाक्यजुं दकले न्हापां वय्कया गुणानुस्मरण यासें वय्कःया योगदानयात चर्चा यानादिल ।

भिक्षु तपतिस्स महास्थवीर जूगु  ज्याझ्वलय् बौद्ध विद्धान देवकाजी शाक्यजुं मदुम्ह भाजु शाक्यजुया गुणयात लुमंका दिल । वय्कलं थःगु नुगः खँया झ्वलय् वय्कःया हस्तकलाया शीप दुगु बारे नं चर्चा यासें वय्कया गुण झीसं गवलें नं लोमंके मफइगु खँ कनादिल ।

वय्कःयात लुमंकेगु झ्वलय् उगु ज्याझ्वलय् समूहया सल्लाहकार त्रिरत्न तुलाधरं मदुम्ह हर्षमुनि शाक्यजुं युवा बौद्ध समूह नीस्वनेत म्हितादीगु भूमिका निसें कयाः थुगु समूह नीस्वने धुंकाः समूहलं न्ह्याकूगु बौद्ध जनजागरण अभियानय् वय्कलं म्हितादीगु खँयात तकं कयाः थःगु खँ तयादिल । थौं थीथी जनजातित बौद्ध ख्यलय् सक्रिय जुयाच्वंगु नं थुगु हे बौद्ध जनजागरण अभियानया लिच्वः जूगु खँ नं वय्कलं न्ह्योने न्ह्यथनादीगु दु ।

थुगु ज्याझ्वलय् मदुम्ह शाक्यजुयात लुमंकेगु झ्वलय् बौद्ध विद्धान डा. गौतम वीर बज्राचार्यं हर्षमुनि शाक्य छम्ह वीर्यवान व कर्मशील व्यत्तित्व जूगु धयादिल । नाप नापं वय्कः छम्ह झीत उर्जा विइफूम्ह व्यत्तित्वया धनी नं खः धासें झीपिं कर्मशील जुइत वय्कःया प्रेरणा काय्माःगु खँय् नं बः बियादिल ।

थुकथं हे शाक्य महाविहार संघया छ्याञ्जे संघरत्न शाक्यं  मदुम्ह भाजुु हर्षमूनि शाक्ययात थुगु महाविहारं शाक्यरत्न उपाधि विया हनावना याना तयाम्ह व्यत्तित्व जूगु खँ उलादिल । नाप नापं भाजु हर्षमूनिंशाक्यतय्गु बारे क्वातुक हे अनुसन्धान याना सफू पिथनादीगुलिं थौं शाक्यत गु्कथं खः धकाः सीका काय्गु आधार चूलानाच्वंगु खँ लुम‌ंकादिल ।

थुगु ज्याझ्वलय् समूहया पूर्व नायः डा. त्रिरत्न मानन्धरजुं नं मदुम्हेसियागु गुणानुस्मरण यानादिल । नापं नापं म्हिगःया न्हि न्ह्याका वंगु बौद्ध जागरण अभियान थें जाःगु ज्याझ्वः नं न्ह्याका बौद्धतय्त जागरण याना न्ह्याःवनेमाःगु खँय् वः बियादिल।

थुगु गुणानुस्मरण ज्याझ्वलय् युवा बौद्ध समूहया छ्याञ्जे रजनी ताम्राकारं सुभाय् देछानादीगु खःसा सुभाय् देछाय्गु झ्वलय् समूहलं बौद्ध जागरण अभियान न्ह्याका वनेमाःगु वाःचाय्का च्वनागु खँ तयादिल । थुकथं हे थुगु ज्याझ्वलय् युवा बौद्ध समूहया नायो मदनरत्न तुलाधरं सभापतिया थासं थःगु खँ तसें समुहलं मदुम्ह भाजु शाक्यया योगदानयात कयाः मेमेगु ज्या याना वनेगु खँ तयादिल ।

थुगु मुँज्याय् भिक्षु तपतिस्स महास्थवीरजुं ओवाद वियाः बिज्यासें पुण्यानुमोदन नं याना बिज्यागु खः । भिक्षुपाखें ओवाद विया विज्याय्गु झ्वलय् थौंया अवस्थाय् बौद्ध धर्मयात चीर स्थायीत्व याना तय्त नेवाःत भिक्षु जुया बौद्ध धर्मयात संरक्षण याय्गु ज्याय् ल्यूने लानाच्वंगु खँय् बःविसें नेवाःतय्त ध्यानाकर्षण नं याना बिज्यागु खः । थुगु ज्याझ्वलय् थीथी संघ संस्थाया प्रतिनिधिपिनिगु उपस्थिति दुगु खः ।

 

rzm

 

Leave a Reply

Your email address will not be published. Required fields are marked *