fbpx

रानीवनय् बज्रवाराही साधना यानाः बज्रयानी पुजा

सुगत रत्न सिन्दुराकार

बज्रयान बुद्धधर्म विकासया नितिं सकलें बज्राचार्य गुभाजुपिं थीथी थासय् वना बुद्धधर्मयात च्वन्ह्याकेगु ज्या याना वनेमाःगु खँय् सुयागुं नं निगू मत दइमखु । उकिं थौंकन्हय् बज्रयान पुजा विधियात अझ च्वन्ह्याका बज्रयान बुद्धधर्मयात लोकय् चीर स्थायीत्व विया वनेत समूहगत रुपं थीथी महायानी लामा गुरुपिन्थाय् वना नं धर्मिक ज्याखँत न्ह्याका हय्गु ज्या यानाहःगु दु ।

 

थुकथंया पलाखं हे बुद्ध धर्मयात बांलाक थुइकेगु व साधना याय्गु ह्वःताः चुलाना च्वनीगु खः । थ्वहे झ्वलय् जि नं रानीवनय् च्वंगु तःधंगु सेरेभिलुंग गुम्वाय् जूगु बज्रवाराही द्यःया आव्हान याना याःगु होम पुजाय् मंसिर १६ गते सोमवाःया न्हि अवलोकन याय्गु ह्वःताः चूलागु दु । नापं आपालं बज्राचार्यजुपिन्सं थःगु सिद्धि प्राप्तिया नितिं साधना याय्गु ज्या नं याना बिज्यागु दु । थ्व छगू नेवाः बज्रयानीतय्गु नितिं तःधंगु अवसर नं खः धकाः धाय्माःगु अवस्था दु ।

वर्तमानया इलय् माःगु कथंया ज्या न्ह्याकावन धाःसा हे जक बुद्धधर्मयात कन्हय्या बज्रयानी बुद्ध धर्मया नितिं बांलागु दिशाय् ल्यंका तय् फयाच्वनी । उकिं थौं लामा गुरुपिन्सं थीथी थासय् जग्गा न्यना थीथी आकार प्रकारया गुम्वा दय्का बुद्ध धर्मयात बांलाक थुइकेगु ज्या यानावयाच्वंगु दु । नाप नापं शिक्षा बिइगु ज्या नं जुयावयाच्वंगु दु । वय्कःपिनिगु थुकथंया पलाःयात झी बज्राचार्य गुरुपिन्सं नं बांलाक चिन्तन मनन याना अनुशरण यानावन धाःसा झीसं नं याय् मफइगु ला पक्का हे मखु । उकिं थौंया इलय् झीसं न्ह्याकेमाःगु ज्यायात बांलाक कःघाय्गु ज्या याना भविष्यया पुस्तापिन्त बांलागु लँपु त्वःता वनेमाःगु दु ।

म्हिगःया पुस्तापिन्सं थीथी बहाः बहि दय्का बुद्ध धर्मया विकास याना जीवनयापन याना वनेत आधार सिर्जना याानावंगु खःसा थौंयापिन्सं नं उकथं हे थीथी थासय् तःगू मछि हे विशेष कथंया योजना हे दय्का न्ह्याः वनेगु ज्या याय् धकाः प्रण याना दय्का वनेगू कुतः जुया वनाच्वना धाःसा जीवनयात सार्थक याःगु सावित नं जुया वनाच्वनी । खला स्वय्बलय् थाकुथें ताया वनाच्वनगिु स्वभाविक हे खः । तर मतिइ तयाः पलाः न्ह्याकेगु ज्यायाना न्ह्याचिला वन धाःसा थीथीकथंया भाग्य व सत्यता हे थःत बांलाक साथ बिया च्वनेगु नं यानाच्वनी ।

रानीवन स्थिति तःधंगु सेरेभिलुंग गुम्वाय् बज्रवाराहि द्यःया साधना याना पुजा होम मंसिर १६ गते सोमवाःया न्हि याःगु खःसा थुगु होम ज्याझ्वलय् जि नं सौभाग्यवस थ्यन । थुगु पुजा ज्याझ्वःया नेतृत्व राजगुरुजु मञ्जूश्री रत्न बज्राचार्यजुं याना बिज्यागु खःसा थुगु पुजा होमय् येँ,यल, किपू, थिमि, ख्वपया आपालं बज्राचार्य गुरुपिनिगु उपस्थिति दुगु खः । लामा गुरुपिन्सं थःगु महायानी बुद्ध धर्मया विकास यायेया नितिं तःतःजिगु गुम्वा दयेका न्ह्याःवनाच्वंगु दु । थुगु थासय् बिज्याना पुजाआजाय् सरिक जुृयाविज्यापिं गुजूपिन्सं नं थःगु भावि दायित्वयात बांलाक कःघाना बिचाः यानावन धाःसा जीवनयात अझ सार्थक याय्त तःधंगु तिवः जूवनाच्वनिगु आशा काय्छिं । छाय्धाःसा साधनाय् आपालं शक्तिं बास यानाच्वंगु दयाच्वनी ।

 

Leave a Reply

Your email address will not be published. Required fields are marked *