fbpx

धर्मोदय सभाया हिरक जयन्तीइ नेपाःया बुद्ध धर्मया अवस्थाया बारे सहलह

सुगत रत्न सिन्दुराकार

बौद्ध धर्मया ख्यलय् छगू तःजिगु व महत्वपूर्ण संस्थाया रुपय् स्थापित जुया न्ह्याना वयाच्वंगु धार्मिक संस्था धर्मोदय सभाया ७५ दँ हिरक जयन्ती स्वयम्भूया आनन्दकुटी विहारय् मंसिर १४ गते तःजिक हनेगु याःगु दु ।

संस्कृति मन्त्री योगश भट्टराईपाखें बोधि मत च्याकाः उलेज्या याना न्ह्याःगु थुगु ज्याझ्वलय् अखिल नेपाल भिक्षु महासंघया नायो भिक्षु मैत्री महास्थवीरजुं पंचशील प्रदान याना बिज्यात । थुकथं हे ज्याझ्वलय् मैत्री सुत्र पाठ टेन्डी लामाजुं याना विज्यागु खःसा स्वन्ति वाचन राजु बज्राचार्य, दशरत्न बज्राचार्य व सजन बज्राचार्यजुपिंपाखें याना बिज्यात।

धर्मोदय सभाया नायो यज्ञमानपति बज्राचार्यजुया सभानायोसुइ न्ह्याःगु थुगु हिरक जयन्ती हना ज्याझ्वलय् धर्मोदय सभाया न्वकु सुचित्र मान शाक्यजुं धर्मोदय सभाया संक्षिप्त म्हसीका बियादिल । विशेष पाहांया रुपय् झायादीम्ह येँ महानगर पालिकाया मेयर विद्यासुन्दर शाक्यजुं नं थःगु नुगः खँ तयादिल।

थुगु हिरक जयन्तीया लसताय् पीएचडी यानादीपिं बौद्ध विद्धानपिं डा. गौतमवीर बज्राचार्य, डा. इन्द्रसिद्धि बज्राचार्य, डा. सुरेन्द्रमान बज्राचार्य, डा. त्रिरत्न मानन्धरपिन्त दोसल्लां न्यय्का हनापौ देछाया हनेज्या नं यानादिल । धर्मोदय सभाया मूछ्याञ्जे सागरमान बज्राचार्यजुं न्ह्याका बिज्यागु थुगु ज्याझ्वलय् सभाया वरिष्ठ न्वकु लक्ष्मीदास मानन्धरजुं सुभाय् न्वचु बियादिल ।

थुकथं हे थुगु हरिक जयन्ती हना ज्याझ्वलय् निगूगू ब्वः कथं प्यानल सम्वाद ज्याझ्वः नं जुल । धर्मोदय सभाया नायः यज्ञमान पति बज्राचार्यजुया सभानायःसुइ न्ह्याःगु थुगु प्यानल सम्वाद ज्याझ्वः धर्मोदय सभाया छ्याञ्जे अशोक बज्राचार्यजुं न्ह्याका बिज्यात ।

थुगु ज्याझ्वलय् बौद्ध विद्धान नापं पूर्वमन्त्री केशवमान शाक्यजुं नेपाःया संविधानय् धर्म निरपेक्षता व बुद्ध धर्म बारे, इन्द्र बहादुर गुरुंगजुं नेपाःया जनगणनाय् बौद्ध जनसंख्याया बारे, भिक्षु मैत्री महास्थवीरजुं नेपालय् थेरवाद बुद्ध धर्मया बारे, आचार्य नोर्वु शेर्पाजुं नेपाःया हिमाली बुद्ध धर्मया बारे, डा. सुरेन्द्र मान बज्राचार्यजुं नेपालय् नेवाः वज्रयान बुद्ध धर्म बारे थःथःगु न्वचु तयादिल । वय्कःपिनिगु थुकथंया विषयलय् बियादीगु तसकं हे क्वातुगु न्वचुलिं नेपाःया बुद्ध धर्मया अवस्था सीका कायेत तःधंगु तिवः विइगु खनेदु ।

सम्वाद थुगु ज्याझ्वलय् सभानायो यज्ञमानपति बज्राचार्यजुं नं थःगु नुगः खँ तया बिज्यागु खःसा वखत बहादुर मानन्धरजुं नं थःगु खँ तयादिल ।

 

सम्यक वाःपौ
किपा ः आनन्दमान बज्राचार्य

Leave a Reply

Your email address will not be published. Required fields are marked *