इतुम्बहालय् वृहत् तारापुजा क्वचाल

झीगु संवाददाता
येँ, थिंलाथ्व तृतिया । येँया इतुम्बहालय् शनिबार नेवाः व हिमाली बौद्धतय्गु मंकाः सहभागिताय् आर्यताराया सप्तविधानोत्तर सहितया पूजा जुल ।

गुरु दुचे साङगे पेमा रिम्पोचेचया प्रमुख आतिथ्य् जूगु उगु पूजाय् नेवाः व हिमाली परम्परा कथं व हे इलय् बिस्कं बिस्कं पूजा जूगु खः ।

अथे हे नेवाः वज्राचार्यया २१म्हगुरुजुपिनि पुचःया नेतृत्व मञ्जुश्री रत्न वज्राचार्यं यानादिल । उमिसं वन्दना, पूजा यायेगु अले थम्हं यानागु अकुशल कर्मप्रति प्रायश्चित यानाः पुजा न्ह्याकादिल ।

पूजा लिपा रिम्पोचें बुद्धधर्मया विविध पक्षयात कयाः प्रवचन बियादिल । अथे हे सहभागीपिन्त रिम्पोचें अभिषेक अथवा वाङ नं बियादिल ।

नेवाः बौद्धतय्गु आर्यताराया पूजा यायेगु न्हापांनिसेंया परम्परा दयाच्वंगु दु । नेवाःतय् शरीरय् रोगं कइबलय्, बांमलाःगु दिन वइबलय् तारापूजा यानाः सकसिया भिंजुइमा धकाः कामना यायेगु चलन दु ।

उगु ज्याभ्वः कपिलमान स्थापितया कुतलं सम्भव जूगु धकाः आयोजकं धाःगु दु ।

ज्याझ्वलय् स्वनिगःया नेवाःत व हिमाली भेगया बौद्धतयानाः द्वलंद्वः हे उपासक उपासिकापिं सहभागी जूगु खः ।

rzm