fbpx

लुम्बिनीइ जूगु निक्वःगु अन्तर्राष्ट्रिय त्रिपिटक पाठ क्वचाल

झीगु संवाददाता
लुम्बिनी, , कछलागा चौथी । थी थी देसं वःपिं द्वलंद्वः भन्ते गुरुमां व मेमेपिं उपासक उपासिकां नाप्रं त्रिपिटक पाठ याइगु ज्याझ्व बुद्धया जन्मभूमि लुम्बिनीइ क्वाचाल ।

लुम्बिनी अन्तर्राष्ट्रिय त्रिपिटक पाठ समारोहको आयोजनाय् कछलागा दुतिया तृतिया व चौथी (सन् २०१९ नभेम्बर १४निसें १६ तक) लुम्बिनीइ निक्वःगु अन्तर्राष्ट्रिय त्रिपिटक पाठ ज्याझ्वः जूगु खः ।

ज्याझ्वलय् नेपाःया नापनापं भारत, श्रीलंका, थाइल्याण्ड, म्यान्मार, भियतनाम, कोरिया, जापान अले अमेरिका व क्यानाडा व मेमेगु देय्या भिक्षु भिक्षुणी एवं उपासक उपासिकापिं लुम्बिनीइ वःगु खः । स्वन्हुतक उमिसं अन त्रिपिटक दुने लाःगु छुं छुं सुत्रत थः थःगु पहलं पाठ यात । थथे याइबलय् थेरवादी देय्यापिन्सं थःथःगु देय्या लिपिं च्वयातःगु व हे सुत्रया पाठ यात अले महायानी देय्यापिन्सं धाःगु थःथःगु परम्परा कथं त्रिपिटक दुने हे लाःगु धयातःगु सुत्रत पाठ यात ।

भगवान बुद्धया महापरिनिर्वाण जुइवं अबलय्या भिक्षुपिन्सं बुद्धया बचन सितिं मवनेमा अले इलं ल्हाना मवनेमा धकाः दक्व अर्हत् भन्तेपिं नापं तयाः बाचन याकल, उकियात संघायना धाइ । थज्याःगु थ्व २५००दँ दुने थी थी देसय् यानाः खुक्व तक जुइधुंकल । आः वयाः दक्व बुद्धबचन दुने लाःगु ८४,००० स्खन्ध बुद्ध बचन संकलन व संरक्षण यानाः भविष्यया निंतिं सुरक्षित यानातयागु दु धाइ ।

भगवान बुद्धं कनाबिज्याःगु थ्व दक्व उपदेशया संग्रहयात त्रिपिटक धाइ । थुकिइ मुख्य यानाः स्वंगू ब्व दइ — सुत्तपिटक, विनयपिटक व अभिधम्मपिटक ।

थुकिइ विनयपिटक दुने भिक्खु विभङ्ग, भिक्खुनीविङ्ग, महावग्ग, चुलवग्ग व परिवार दु । सुत्तपिटक दुने दीघनिकाय, मज्झिम निकाय, संयुक्तनिकाय, अङ्गुत्तरनिकाय व खुद्दक निकाय तयातःगु दु । अले अभिधम्मपिटक दुने धम्मसङ्गणी, विभङ्ग, धातुकथा, पुग्गलपञ्ञती कथावत्थु, यमक व पट्ठान तयातःगु दु । थुकथं त्रिपिटक दुने लाःगु दक्व ग्र्रन्थत मुनेबलय् स्वीगु स्वयाः मल्याक्क खाःवइ ।

स्वन्हुयंकया पाठ यायेगु क्वचायेकाः जूगु समापन ज्याझ्वलय् लुम्बिनी अन्तर्राष्ट्रिय त्रिपिटक पाठ समितिया नायः भिक्षु मैत्री महास्थविरं न्हापा न्हापा इतिहासय् थी थी देसय् संघायना जुइबलय् अनया जुजुं हे संरक्षक जुइगु जूगुलिं आः थन नं राज्यं हे थुकिया नेतृत्व कयाः ज्या यायेमाः धयाबिज्यात ।

अन्तर्राष्ट्रिय त्रिपिटक पाठ परिषद्का दुजः वाङ्मो दिक्सें लुम्बिनीया त्रिपिटक पाठ ज्याझ्वलय् थन वःपिं सकस्यां थः जहान वा पासापिन्त नं हयाः दक्वसित थुकिया बारे जानकारी बिइमाः धयादिल ।

लुम्बिनी विकास कोषया उपाध्यक्ष मेत्तेयं नं थज्याझ्वलं विश्वय् नेपाःया बौद्धतय्गु इज्जत तइगु खँ धयादिल ।

ज्याझ्वःया उलेज्या जूकुन्हु उलेज्या यानाः अनया मूपाहाँ प्रदेश नं ५ या मुख्य मन्त्री शंकर पोखरेलं लुम्बिनी विकासं नेपाःया बौद्धत लय्ताःगु खँ कनादीगु खः अले आः वइगु दँय् नं थन थी थी विकासया ज्या जुइत्यंगु जानकारी बियादीगु खः ।

स्वन्हु मध्ये न्हापांगु दिनय् नेपाली व श्रीलंकाया भिक्षुपिन्सं व सुत्तपिटकया पाठ यानाबिज्यात । निन्हुकुन्हु म्यानमार, चीन, कोरिया व भियतनामी भिक्षुपिन्सं अभिधम्मपिटक अन्तर्गतया सुत्रतय्गु पाठ यानाबिज्यात । लिपांगु दिनय् गुरुजुपिन्सं पाठ यायेधुकाः थेरवाद गुरुमांपिन्सं सुत्रहरुको पाठ यानाबिज्यात ।

न्हापांगु दिनय् बोधिसेन भन्तेनं धर्मश्रवणयाबारे व सिंगापुरया तथा सुमनासिरी भन्तेनं बुद्ध नेपालय् जन्मेजूगु धइगु खँय् धर्मदेशना यानाबिज्यात । अले लिपागु दिनय् आचार्य राणा रिम्पोचें नेपालय् हे मदुगु त्रिपिटक मेमेगु देसय् दयाच्वंगु व अन अज्याःगु ग्रन्थया बांलाक इज्जत दूगु इतिहासया खँ कनाबिज्यात ।

ज्याझ्वः सिधयेकाः अन उपस्थित भन्ते गुरुमांपिं व उपासक उपासिकापिन्सं जवगु ल्हातिं मैनमत च्याकाः दीपयात्रा नं याःगु खः ।

धायेत ला २५ देय्यापिं १०००म्ह भन्ते गुरुमांपिं ब्वति काःबिज्याइ धयातःगु खः । तर अनया उपस्थिति उलि दुथें खनेमन्त । मेमेगु स्वयाः नेपाःया हे भन्तेपिं अन उल्लेख्य उपस्थिति खने मदयेवं सहभागीपिन्सं थुकियात नेपाः थेरवाद दुने भन्तेपिनिगु संगठन छ्वासूगु तायेकल । मेगु स्वयाः नं अखिल नेपाल भिक्षु महासंघया जिम्मेवाद पदाधिकारी तकं हे उपस्थित मजूगुयात अर्थपूर्ण कथं स्वःगु खनेदत ।

अथे हे लाओसया सहभागी खने मन्त धाःसा लुम्बिनीइ हे दकलय् तग्वःगु द्यःगः दयेकाः गेस्ट हाउस तकं चायेकाच्वंपिं कोरियन भन्तेपिंपाखें नं छम्ह हे जक भन्ते पाठ यायेत बिज्याःगु खनेदत । अथे हे भियतनामी भन्तेपिं दुने नं तःदँनिसें नेपालय् च्वनाः राजनीतिक प्र्रभाव दयेकाच्वंम्ह भन्ते नं अन उपस्थित मजुल ।

उकियालिसें गुलि नं उपस्थित जुल, उपिं दक्व हे थःथःगु पालय् थःथःगु पाठ यायेगु अले मेपिनिगु पालय् दनावनेगु जुइवं अन छगू देशयापिन्सं गथेयानाः पाठ याइधइगु सिइके मखन सा अले थ्व बुद्ध बचन धइगु भाय् मथूसां न्यनाः जक हे नं पूण्य संचय याये जिउ धइगु खँय् भन्ते गुरुमांपिन्सं हे विश्वास मयाःगु खनेदत ।

थगुने स्वयाः म्हो जक उपस्थि दत धाःपिं उपासक उपासिकात हे नं थातं मच्वंबलय् हल खाली खाली जूगु सकस्यां खन ।

थुकियात व्यवस्थापकीय कमजोरी धकाः आयोजकं हे स्वीकार याःगु अवस्थाय् आकिवं जुइगु पाठ ज्याझ्वः थ्व स्वयाः क्वातुइमा धकाः सहभागीपिन्सं कामनया याःगु न्यनेदत ।

Leave a Reply

Your email address will not be published. Required fields are marked *