fbpx

नेपालभाषा ख्यःया विद्वान डा. मल्लया लुमन्तिइ श्रद्धान्जलि मुँज्या

झीगु संवाददाता

येँ, कछलाथ्व नवमि ।

नेपालभाषा व साहित्यया बारे दुग्यंक अध्ययन अनुसन्धान यानादीम्ह भाषाविद् डा. कमल प्रकाश मल्ल मदूगु न्हापांगु पुण्यतिथिइ लाकाः वय्कःया लुमन्तिइ छगू श्रद्धान्जलि मुँज्याया आयोजना जुल ।

ज्याझ्वलय् कमल प्रकाश मल्ल फाउण्डेशनं मदुम्ह मल्लं थःगु जीवनकालय् थम्हं च्वयातःगु व संकलन यानाःगु थी थी सफू, पत्रपत्रिका, अनुसन्धनपत्रत निगू सफू धुकू च्वसापासा व मार्टिन चाैतारी यात लःल्हात । उकथं अन च्वसापासायात ५०० चाःचू नेवाःभाय्या सफूत व मार्टिन चौतारीयात ४००० चाःचू मेमेगु भाय्या सफू व मेमेगु सामाग्रीत अन हे लःल्हायेगु ज्या जुल ।

किपाः नेवाः सूचना केन्द्र

उगु ज्याझ्वलय् कवि व च्वसापासाया नायः भुषण प्रसाद श्रेष्ठं नेपालभाषा साहित्य ख्यलय् मल्लं यानादिगु योगदानयात लुमंकादिल । अथे हे ज्याझ्वलय् त्रिभुवन विश्वविद्यालयया पुलाम्ह उपकुलपति केदार भक्त माथेमा, साहित्यकार अभि सुवेदीयालिसें अमेरिकाया संस्कृकितविद इयान आल्पसं मल्लया शिक्षा क्षेत्रया विकास, अंग्रेजी साहित्यया अध्यापन व नेवाःभाय्या संरक्षणया ख्यलय् यानादिगु योगदान यात कयाः थःथःगु मन्तव्य बियादिल ।

किपाः नेवाः सूचना केन्द्र

सभापतिया थासं प्रतिष्ठानया नायः जनकबि दुर्गालालं थःगु व मल्लया व्यक्तिगत खँयात लुमंकुसें वय्कःया नामय् थम्हं चिनागु कविता छपु नं पाठ यानादिल ।

कमलप्रकाश मल्ल प्रतिष्ठानया ग्वसालय् जूगु उगु ज्याझ्वलय् मदुम्ह मल्लयात लुमंका छगू मिनेट मौन धारणा यायेगुलिसेंं सकस्यां वयकःया किपाय् श्रदाया स्वां देछाःगु खः ।

 

RM

Leave a Reply

Your email address will not be published. Required fields are marked *