fbpx

यलय् मेयर कप टेबलटेनिस कासा जुइगु

रेखा शाक्य
यल, कछलाथ्व अस्तमि । ललितपुर जिल्लाय् टेबल टेनिस कासायात स्थानीय तहत थ्यंकेत यल महानगरपालिका लिसे सहकार्य यानाः न्हापा थें हे नगरपालिकाया दक्व वडात सम्मिलित जुइकथं मेयरकपया आयोजना याइगु जूगु दु ।

थ्व वर्षय् १६ नं वडा कार्यालयया तत्वावधानय् ललितपुर ज्रिल्ला टेबल टेनिस संघ व ईतिल्हने युथ क्लबया मंकाः आयोजनाय् निक्वःगु मेयर कप २०७६ टेबल टेनिस प्रतियोगिता थ्व हे वइगु २०७६ कार्तिक २३ गते शनिबारनिसें २०७६ कार्तिक ३० गते शनिबारतक वडा नं १६ स्थित नागबाहालय् तःजिक सम्पन्न जुइगु खँ आयोजकतय्सं थौं छगू पत्रकार सम्मेलन यानाः जानकारी बिउगु खः ।

कासा सनिलया ५ बजेनिसें बहनी ९ बजेतक संचालन जुइ अले थी थी १२ कथंया इभेन्ट संचालन जुयाः महानगरपालिका अन्तर्गतया २९गू हे वडां करिब प्यसःम्ह स्वयाः यक्व मिसा मिजंपिं कासामिपिन्सं थ्व प्रतियोगिताय् ब्वति काइगु खँ नं धाःगु दु ।
थुकिइ मेन्स टीम इभेन्ट, मेन्स सिंगल, मेन्स डबल, मेन्स डबल (ग्र्रुप बि), बुमन्स सिंगल, मिक्स डबल, ब्वाइज जुयनयर सिंगल (यु १६), गर्लस जुनियर सिंगल (यु १६), भेटरान सिंगल (+४०), भेटरान सिंगल (+५०), भेटरान सिंगल (+६०), वुमन्स भेटरान सिंगल (+४०) यानाः झिंनिता इभेन्टत दुथ्याकातःगु दु ।

अथे हे आयोजकं थुक्रिइ ८,५०,००० तका अनुमानित लागतय् १६ वडा कार्यालयं २,००,००० तका तइगु जूगु दुसा मेमेगु संघसंस्थापाखें नं प्रायोजन वा ग्वाहालि काइगु जूगु दु । थुकिइ न्हाप लाम्हसित १०,००० तका, लिउ लाम्हसित ५,००० तका व लियांलिउ लाम्हसित ३,००० तकाया सिरपाःया नं व्यवस्था दु ।

थ्व कासाया उद्देश्य धइगु देय्यात माःगु अन्तर्राष्टिय पदक त्याकेफुपिं कासामिपिं निर्माण यायेगु धकाः नं आयोजकं धाःगु दु ।

Leave a Reply

Your email address will not be published. Required fields are marked *