fbpx

नेवाः मिसा दबूया स्वकवःगु दँ मुँज्या क्वचाल

झीगु संवाददाता

यल कछलाथ्व षष्ठी । देय्न्यंकया नेवाः मिसातयत संगठित यानाः आर्थिक, सामाजिक व राजनैतिक रुपं सक्षम यानाः नेतृत्व बिकास यायेगु तातुनां गठन जूगु नेवाः मिसातयगु राष्ट्रिय संगठन नेवाः मिसा दबूया स्वक्वःगु बुदिं शनिवाः हंगु दु ।

नेवाः मिसा दबूया नायः रश्मिला प्रजापतिया नायःसूइ न्ह्याःगु ज्याझ्वः मूपाहाँ प्रदेस नं. ३ या सांसद शोभा शाक्यजुं उलेज्या यानादीगु खः । ज्याझ्वलय् निम्ह नेवाः मिसापिन्त हनेगु नापं छम्ह नेवाः मिसायात ‘रत्नदेवी प्रजापति सिरपाः’ लःल्हागु दु । खुगू दसक निसें भाषिक आन्दोलनय् मदिक्क न्ह्याना नेपालभाषा साहित्य सृजना नापं राजनितिक ख्यलय् नं सक्रिय रूपं न्ह्यज्याना यक्वसित प्रेरित यानादीगुयात कदर यासें मय्जु सुवर्ण केसरी चित्रकारजुयात हंगु खः । सुक्ष्मबिज्ञानय् पि.यच.डी यानादीम्ह न्हापाम्ह मिसा नापं संबैधानिक आयोगया नायः जुयादीम्ह न्हापांम्ह मिसा कथं डा. कयो देवी यमियात नेवाः मिसा दबूपाखें हंगु खः ।


अथेहे झिदँ न्ह्यःनिसें मदिक्क नेवाः मिसा अधिकार ख्यलय् ज्या यानादीम्ह छम्ह नेवाः मिसायात रत्नदेवी श्यामदास प्रजापति ट्रष्ट पाखेँ झिद्व तका दांया ‘रत्नदेवी प्रजापति सिरपाः’ थुगुसि विकास कार्यकर्ता व जेन्डर विज्ञ
 मय्जु इन्दिरा श्रेष्ठजुयात लःल्हागु दु । वय्कः नेपालय् दकलय् न्हापां लैंगिक मैत्री ज्याझ्वः हयादीम्ह राष्ट्रिय योजना आयोगया दुजः जुया ज्यायानादी धुंकुम्ह खः ।

उगु ज्याझ्वलय् नेवाः देय् दबूया मूछ्याञ्जे माइलाबाबु द्यला, न्हुदँ समारोह समितिया नायः रमेश महर्जन, नेपालभाषा मंकाः खलः यलया नायः ऋषि प्रसाद श्रेष्ठजुं भिन्तुना न्वचु बियादिलसा नेवाः मिसा दबूया न्वकू कस्तुरी श्रेष्ठं लसकुस व दांभरी अर्चना तण्डुकारं सुभाय् देछा यानादीगु खः ।

नेवाः मिसा दबूया स्वंगु प्रदेस समिति, ४५ गु जिल्ला समिति व ४० गु नगररगाउँपालिका समिति गठन जुइधुंकुगु दुसा थ्व दँय् नगर, जिल्ला, प्रदेस व केन्द्रीय अधिवेशन जुइगु दु ।

बुखँ–अमिर मैया रञ्जित
किपा–राजेन्द्र रञ्जित

Leave a Reply

Your email address will not be published. Required fields are marked *