fbpx

अपर्णा प्रधानया छकलं प्यंगू सफू विमोचन

झीगु संवाददाता
येँ, कछलाथ्व पञ्चमि । थौं ७२ दँ दुम्ह च्वमि अपर्णा प्रधानया छकलं प्यंगू सफू विमोचन जुल । वय्कःया छगू निबन्ध, छगू समालोचना अले वय्कःया हे आत्मकथाया नेपाली व अंग्रेजी संस्करण थौं छगू ज्याझ्वलय् विमोचन जूगु खः ।

किपाः रेखा शाक्य

शताब्दी पुरुष सत्यमोहन जोशीं जि भमचा कतामरि (निबन्ध पुचः), नेपालभाषा एकेदमिया भाइसचान्सलर यज्ञरत्न धाख्वां झीगु साहित्यय् मथुरा सायमि (समालोचना पुचः), भाषासेवी व उद्यमी कृष्णलाल प्रधानं म र मेरो समय (आत्मवृतान्त, नेपाली) अले नेपाल साहित्य मन्दिरया नायः तिलक प्रकाशं दि टाइम अफ लाइफ (आत्मवृतान्त, अंग्रेजी) या विमोचन यानादिइगु खः ।

प्रधानया आत्मवृतान्तया नेपाली अनुवाद ईश्वरी मैंया श्रेष्ठं व अंग्रेजी अनुवाद सिल्भिया राजोपाध्यायं यानादिइगु खः ।

ज्याझ्वलय् नवासें सत्यमोहन जोशीं नेपालभाषा ख्यलय् थ्व उमेरय् तकं च्वयेगु व सफू हे पिथनेगु ज्याय् सक्रियता क्यनादीम्ह प्रधानया जाँगरयात च्वछासें वय्कःथज्याःपिनिगु लगनशिलतां हे नेपालभाषा साहित्यया विकास जूगु खः नं धयादिल । अथे हे वय्कलं पिकाकः कुतः पिकाकःया तःदँसिनेंया थी थी योगदानया नं सराहना यानादिल ।

This slideshow requires JavaScript.

नवायेगु हे झ्वलय् वय्कलं साहित्य न्ह्याक्व दःसां छेँय् छेँय् नेवाःभाय् ल्हाइपिं मदयावंगु खायुगु सत्या उलादिसें आः वइगु जनगणनाय् नेवाःतय् दुने नेवाः भाय् मल्हाइपिनिगु संख्या झन् भयावह जुइफइगुपाखे नं संकेत यानादिल ।

नेपालभाषा केन्द्रीय विभागया पुलांम्ह नाय सुन्दर कृष्ण जोशीं नेपालभाषा साहित्य ख्यलय् समालोचक मदयाच्वंगु अवस्थाय् अपर्णाया च्वसां अभावपूर्ति जूगुलिइ सन्तोष व्यक्त यानादिल ।

बाखं च्वमि हितकरवीर कंसाकारं च्वमि अपर्णाया च्वज्याय् वय्कःया जहान शान्तवीर प्रधानया योगदान दूगु खँ लुमंकादिल ।

उपन्यासकार व बाखं च्वमि मथुरा सायमिं थःगु कृतियात कयाः हे जक समालोचना सफू च्वयादिइगुलिं अपर्णायात सुभाय् बियादिल ।

समालोचक पूर्ण ताम्र्राकारं थौं कन्हय् छगू विधाया दुने मेगु विधा वइगु स्वभाविक जूगुलिं अपर्णाया निबन्ध सफुतिइ बाखंया तत्वत दइगुयात मेकथं मकायेत इनाप यानादिल । अथे हे वय्कलं समालोचकतय्के न्हूगु कथंया छुं वलकि उकियात मजिउ धकाः अस्वीकार हे यायेगु तकं जूगु खनाः अथे मयासे युगक कथं साहित्य व कृतिया परिभाषा पुलांगु चाकलं पिने च्वनाः न्हूगु कथं दयेकेत नं समालोचकपिन्त इनाप यानादिल ।

Leave a Reply

Your email address will not be published. Required fields are marked *