fbpx

नेपाल संवत्‌यात राष्ट्रिय गौरवया संवत् कथं न्हूदँ हने : समारोह समिति

व‌ंगु प्यंगू दशक निसें नेपाल संवत्‌यात राष्ट्रिय मान्यता बिइकेगु आन्दाेलन व न्हूदँया भिंतुना इनेगु ज्याझ्वःकथं थुगुसिइ नं थी थी ज्याझ्वःयानाः उल्लासमय वातावरण थःथःवय्या शत्रुता व वैमनुष्यता ल्वःमंका छधी छपँ जुयाः न्हूदँ नेसं ११४० हनेगु जूगु दु । आइतबार येँय् जूगु छगू पत्रकार सम्मेलनय् उगु ज्याझ्वया जानकारी न्हूदँ समाराेह समितिं बिउगु जुल ।

नेपाःया राष्ट्रिय विभूति शंखधर साख्वालं देय्या नामं नीस्वंगु नेपाल संवत् ११४० न्हूदँया लसताय् दकलय् न्हापां सकसितं भिंतुना देछाना । नेपाः देय्या नामं नीस्वनातःगु नेपाल संवत्या ऐतिहासिक महत्व नेपाःया निंतिं छगू तःधंगु म्हसीका नेपाल संवत् खः । दँय्दसं थें थुगुसी नं नेपाल संवत्या न्हूदँ तःजिक हनेगु निंतिं नेपाल संवत् न्हूदँ राष्ट्रिय समारोह समिति ११४० भाजु रमेश महर्जनया नेतृत्वय् नीस्वनेज्या जुइधुंकूगु दु । लिसें न्हूदँ तःजिक हनेगु निंतिं ७४ म्ह दुजः दुगु समारोह समिति गठन यानाः ४० सदस्यीय सचिवालय समिति नीस्वनेगु ज्या जूगु दु ।

थ्व हे वइगु ११४० कछलाथ्वः पारु (कार्तिक १२ गते) मंगलबाः बसन्तपुरं न्ह्याइगु भिंतुना रयाली व्यवस्थितरुपं न्ह्याकेगु निंतिं व माःकथंया तयारीया निंतिं व्यवस्थापन समिति, आर्थिक समिति, सञ्चार समिति, सांस्कृतिक समिति, रयाली व्यवस्थापन समिति, नेपाल संवत् न्हिल्याः पौ समिति, प्रतिनिधि मण्डल समिति, न्हूदँ लुमन्तिपौ समिति, मिसा समिति, देसय् दुने व पिने जुइगु न्हूदँ ज्याझ्वःया गतिविधि मुना समिति, माइक मञ्च व्यवस्थापन समिति नीस्वनेगु ज्या जुइधुंकूगु दुसा थुगु समितितपाखें थीथी ज्याझ्वः न्ह्याके धुंकूगु दु ।

नेपाल संवत्या प्रवर्तक शंखधर साख्वालं ११४० दँ न्ह्यो नेपाःमि जनताया ऋण मोचन यानाः निस्वना थकुगु थुगु संवत् हलिमय् हे देय्या नामं पलिस्था जुयाच्वंगु छगु हे जक सम्वत् कथं दुगु खँ स्यूगु हे जुल । नेपाल सरकारं ने.सं. ११२९य् थुगु संवत्यात राष्ट्रिय सम्वत्या औपचारिक मान्यता बिसें घोषणा यायेधुंकुगु जुल ।

थुगु दँय् पञ्चांग समितिं सार्वजनिक याःगु तिथि मितिया लिधंसाय् पिदंगु छुं छुं पात्रोय् न्ह्यथनातःगु तिथिमितिं नेपाःमि दत्थुइ भ्रम ब्वलंगु खँय् थुगु समारोह समितिया ध्यानाकर्षण जूगु दु । पञ्चांग समितिया विज्ञतायात कयाः थुगु समारोह समितिया छुं धायेगु मदु । तर पञ्चांग समितिं तिथि कथं हनावयाच्वंगु थीथी जात्राय् ब्यवहारिकता व जनमानसय् सलंस दँ न्ह्योनिसेंया जनपरम्परायात हनाबना तयेगु यानावयाच्वं थें नेपाल संबत् न्हूदँ हनिगु तिथि कछलाथ्व पारुइ किजापुजा धकाः न्ह्यथनातःगुलिइ नेवाःतय्ुसं म्हपुजा नं न्यायेकी धकाः न्ह्यथनाः म्हपुजा याइपिसं कन्हय् द्वितियाखुन्हु किजापुजा न्यायेके फइगु कथं न्ह्यथनाब्यूगु जूसा पञ्चांग समितिया हे गरिमाय् थपु जुइगु जुइ ।

थुगु समारोह समितिं थुगु खँय् हनेबहम्ह बाङमय शताब्दी पुरुष सत्यमोहन जोशीज्यु लिसे मेपिं हनेबहपिं बिज्ञ विद्वान भाजु मय्जुपिं नाप सहलह ब्याकाः थुगु दँय् लक्ष्मि पुजा, नेपाल संबत् ११४० न्हूदँ म्ह पुजा व किजापुजा क्वय् न्ह्यथना कथं हनेत सकलसित इनाप यानागु जुल ।

लक्ष्मिपुजा ने.सं. ११३९ कौलागा आमै कार्तिक ११ गते

नेपाल संबत् न्हूदँ व म्हपुजा ने.सं. ११४० कछलाथ्व पारु कार्तिक १२ गते

किजापुजा ने.सं. ११४० कछलाथ्व द्वितिया कार्तिक १३ गते

नेवाःतय्सं पारुया न्हिखुन्हु नेपाल संबत् न्हूदँ हनेगु नापं म्हपुजा याइ व द्वितियाखुन्हु किजापुजा याइगु सँस्कृति व परम्परा दयावयाच्वंगु दु । नेपाःमि दत्थुइ एकता अझ अप्व क्वातुकेमाःगु थौंया इलय् समुदायतय्गु दत्थुइ बिभाजन मवयेमा धैगु खँय् सचेत जुइगु झी सकलसियागु कर्तव्य व दायित्व खः धइगु समितिं क्वःछिउगु दु ।

नेपाल संबत् न्हूदँया लसताय् थुगुसी नं थीथी ज्याझ्वःत स्वस्फुर्त थीथी संघसंस्था, राजनीतिक पार्टीतय्सं तुच्चा ज्याझ्वः यानावयाच्वंगु दु । नेपाल संबत्या महत्व व थुकिया गरिमायात सकल नेपाःमि राजनीतिक पार्टीया नेतातय्सं थुइधुंकुगु खःसां नेपाल संबत्यात राष्ट्रिय संबत् घोषणा यायेधुंका लिपा नं थ्व संबत्यात ससम्मान राज्यं थाय् धाःसा अझ हे ब्यूगु मदुनि । उकिं नेपाःया मुद्रा व नोटय् नेपाल संबत् उल्लेख यायेमाःगु, विद्यालय व क्याम्पसय् राष्ट्रिय विभुति शंखधर साख्वाः व नेपाल संबत्या पठन पाठन याकेमाःगु, राष्ट्र प्रमुख व सरकारी थीथी निकायया आधिकारिक दस्ताबेजय् नेपाल संबत् छ्यलेमाःगु, नेपाल संबत् प्रतिष्ठान निस्वनेमाःगु, राज्य स्तरं हे नेपाल संबत् व शंखधर साख्वाःया बारे अनुसन्धान याकेमाःगु ज्या यायेमाःगु झीगु तत्कालया माग खः । थ्व दँय् ‘नेपाःया म्हसीका, नेपाःया गौरव, राज्यं हे छ्यलेमाः, नेपाल संवत्’ धइगु नारा बियागु दु । नेपाल संवत् राष्ट्रिय संवत् जूगुलि थ्व सम्वत्यात मतिना याइपिं थ्व संवत्यात नेपाः देय्या संवत् कथं छ्यलेमाः धकाः माग याइपिं सकल जनता धात्थें राष्ट्रवादी व राष्ट्रिय भावनां बिलिबिलि जाःपिं नेपाःमित खः धइगु भावना जनस्तरय् तक अझ अप्वः थ्यंकेगु कुतः झीसं यायेमाःगु दु  धकाः विज्ञप्तिइ धयातःगु दु  ।

ज्याझ्वलय् नवासें नायः रमेश महर्जन‌ं थन शंखधर साख्वाःयात राष्ट्रिय विभूति घोषणा याकेत व नेपाल संबत्यात राष्ट्रिय संबत् घोषणा याकेत भूमिका म्हितादीपिं सकल हनेबहपिं ब्यक्तित्वपिन्त सुभाय् देछानाच्वना । अथेहे नेपाःया मौलिक संबत् राष्ट्रिय संबत् नेपाल संबत्या न्हूदँ क्यनिगु लसताय् थीथी ज्याझ्वः ग्वसाः झःझः धाय्क हनावयाच्वंपिं खलः पुचः राजनीतिक पार्टी लिसें सकल नेपाःमिपिन्त नेपाल संबत् ११४० न्हूदँया लसताय् दुनुगलं निसें भिंतुना देछानाच्वना  धयादीगु दु ।

 

Leave a Reply

Your email address will not be published. Required fields are marked *