fbpx

नेपाल आदर्शय् पुलांम्ह प्रअ हरिशंकर श्रेष्ठयाया झ्वाता उलेज्या जुल

झीगु संवाददाता

येँ, कौलागा षष्ठी । वंगु न्हय्गू दशकनिसें येँया छगू प्रतिष्ठापित सामुदायिक विद्यालय कथं नाःजाःगु नेपाल आदर्श माध्यमिक विद्यालयय् अन तःदँ तक प्रधानाध्यापक जुयाःदीम्ह स्व. हरिशंकर श्रेष्ठया झ्वाता थनेगु ज्या जूगु दु । उगु झ्वाताया उलेज्या वाङ्मय शताब्दीपुरुष सत्यमोहन जोशीं शनिवाः छगू ज्याझ्वःया दथुइयानादिल ।

ज्याझ्वलय् न्ववासें शताब्दीपुरुष जोशीं देशया विकासय् शिक्षाया महत्व लुमंकाबिसें नेपाल आदर्श विद्यालयपाखें देय्या थीथी ख्यलय् सक्रिय जुयाच्वंपिं नांजाःपिं व्यक्तित्वत उत्पादन याःगु खँया नं चर्चा यानादिल । न्यनेदयाः थः लय्तायागु खँ कनादिल । लिसें वय्कलं नेपाली समाजय् हरिशंकर धैगु नां व उकिया धार्मिक महत्वया बारे नं खँ तयादिल ।

व हे ज्याझ्वलय् मदुम्ह स्व. हरिशंकर श्रेष्ठया परिवारजनपाखें ‘हरिशंकर शिक्षा पदक’ पलिस्था यायेगु घोषणा नं जुल ।

श्रेष्ठया छेँजःपाखें वय्कःया नामं उगु हे ज्याझ्वलय् शताब्दीपुरुष सत्यमोहन जोशीयात दोसल्लां न्ययेकुसें अभिनन्दन यायेगु ज्या नं जूगु खः । वय्कःयात विद्यालय व विद्यार्थी परिवारलगायत वडा नंं २२ या वडा अध्यक्ष चिनिकाजी महर्जनं अभिनन्दन यानादीगु खः ।

ज्याझ्वलय् विद्यालयया पुलांम्ह प्रधानाध्यापक लिसें विद्यालय व्यवस्थापन समितिया अध्यक्ष शारदाभक्त श्रेष्ठं पुलांम्ह प्र.अ. हरिशंकर श्रेष्ठं विद्यालय विकासया लागिं यानादीगु योगदानया चर्चा यानादिल । अथे हे छेँजःपाखें वय्कःया काय् ओमशंकर श्रेष्ठं वय्कःया विद्यालयया विकास यायेत थःगु जीवन पाःगु खँ लुमंकादिल ।
ज्याझ्वलय् नेपाल आदर्श माविया निर्वतमान प्र.अ. वरुणप्रसाद वैद्य, वर्तमान प्र.अ. रविन रन्जित लिसें मेमेपिन्सं नं नेपालय् शिक्षाया विकास, सामुदायिक विद्यालयया अवस्था व विद्यार्थीतय्गु थी थी पक्षयात कयाः मदुम्ह प्र.अ. हरिशंकर श्रेष्ठया कायभाजु ं नुगःखँ तयादीगु खः ।

उगु ज्याझ्वलय् सचिव रामकृष्ण श्रेष्ठं लसकुस यानादीगु खःसा उपाध्यक्ष केदारेश्वरमान स्थापितं सुभाय् बियादीगु खः । ज्याझ्वलय् झ्वाता पलिस्था यायेत आर्थिक यानादीपिं दातापिं, झ्वाता पलिस्था उपसमितिया दुजःपिं व विद्यार्थी परिवारया पदाधिकारीपिंत नं हनेगु ज्या जूगु खः ।

ज्याझ्वः नेपाल आदर्श विद्यार्थी परिवारया नायः करुणा शाक्यया सभापतित्वय् जूगु खः ।

Leave a Reply

Your email address will not be published. Required fields are marked *