fbpx

कृष्ण बहादुर महरा, रोशनी शाही व यौ*न दुव्र्यवहार प्रकरण

राजमाया पुतवार

देशया आमूल परिवर्तनया लागि धकाः युद्ध यानाः सत्तालिसे सतीम्ह अले गणतान्त्रिक नेपाःया सभामुख कृष्ण बहादुर महराया पुलांगु राजनीतिक यात्रा निन्हु स्वन्हुया नाटकीय घटनाक्रमं बांमलाक्क चुंदंगु दु ।

सभामुख कृष्णबहादुर महरायात छम्ह संसदय् ज्या याइम्ह इहिपा जुइधुंकूम्ह मिसा कर्मचारीं महरा थः याकःचा दुबलय् बहनी लिबाक्क थःगु क्वथाय् अय्लाः ज्वनाः वःगु, नापं अय्लाः त्वनेत बाध्य याःगु अले यौन सम्पर्कया प्रस्ताव तःगु अथवा यौन दुव्र्यवहार याःगु व अस्वीकार यायेवं दागादुगु यानाः वंगु आरोप बिउगु दु ।

थ्व घटना लिपा महरां अल्पकालिन राजिनामा बिइगु (व लिपा मेगु नं), पीडित धकाः धाःम्ह रोशनी शाहीं थःगु बयान हिलाः जितः छुं हे याःगु मदु धायेगु निसें कयाः लिपताय् वया भाःतं व लिसे सम्बन्ध विच्छेद याःगु तक खँ प्यन्हुया दथुइ छ्यालब्याल जुल । हानं अजू चायापुक्क हे व हे मिसां महराया विरुद्ध किटानी जाहेरी बिइवं वयात ज्वंगु खःसा हानं त्वःतेधुंकल धइगु खँ वःगु दु ।

स्वभाविक खः थ्व घटना सार्वजनिक चासोया विषय जुल । छथी देशया हे सभामुख थज्याःगु गरिमामय पदय् च्वंम्हसित थन सालाहःगु दुसा मेखे यौ*नलिसे स्वापू दूगु खँ जुइवं थुकिं जनताया दथुइ यक्व चर्चा याकीगु स्वाभाविक जुल । थी थी खँ न्यनेदत, सामाजिक सञ्जालय् स्वाभाविक, बौद्धिक विश्लेषणयालिसें लाक्वपाक्व धयाहयेगुयात नं पनेगु अवस्था मन्त । थथे खँ जुइबलय् सुं सुया पक्षय् अले सुं सुया पक्षय् लिइगु नं अस्वाभाविक मखु । हरेक घटना समाजया न्हाय्कं खःसा उकियात कयाः समाजं बिइगु प्रतिक्रिया नागरिक समाजया बौद्धिकताया परीक्षा नं खः ।

गुलिस्यां सभामुखयात तसकं यौनपिपासु, करपिनि कलाःयाथाय् बहनी अय्लाः ज्वनाः छु नियतं वनीम्ह धकाः धाल । उमिसं मिसायात यौन दुव्र्यवहारया पीडित अले वयात तत्काल न्याय बिइमाः धकाः सहानुभूति प्वंकल । गुलिस्यां मिसाया चरित्र ठिक मजू धासें थः भाःत दयेक दयेकं परपुरुषयात बहनी लिबाक्क थःगु क्वथाय् वयेकेबिइम्ह गज्याःम्ह धकाः न्वात । हानं वं लिपा बयान हिलेवं ला वयात सुनां छुं धायेत बाँकि हे मतल । दक्वस्यां थः थःगु हैसियत, योग्यता अले बौद्धिकताया बलय् हे प्रतिक्रिया बिइ । न उमिसं सुयातं सजाय बिइ, नत उमिसं सुयातं पुरस्कार हे बिइफइ ।

सभामुख महारा छम्ह प्रतिष्ठित व उच्च पहदाया मनू खः ।  ६१ दयेधुंकूम्ह बांलाःगु पारिवारिक जीवन हनाच्वंम्ह मनू गथे यानाः छम्ह सामान्य स्वास्थ्य कर्मचारी मिसाया क्वथाय् बहनी, वनं अय्लाः त्वनाः, अय्लाः ज्वनाः वनी, अन न्ह्यागु हे कारणं नं हिंसा जुइ, चस्मा त्वधुली, लाकांया तुलवा लिहाँवइ अले अन मिसाया ख्वालय् व म्हय् घाःखू व वँचुगु दाम दइ धइगु न्ह्यसः प्राथमिक जुइ । व वने जिउम्ह मनू खःसा वं वनागु मदु धकाः धाइमखु, अले वया प्रेस सल्लाहकारं गनं वंगु मदु अले व आरोप निराधार व कपोलकल्पित धकाः तत्काल विज्ञप्ति पिकायेगु आवश्यकता जुइमखु जुइ । अनया सिसिटिभीं व अन वंगु हे खः धकाः पुष्टी जुइधुंकूगु अवस्था दु आः । देशया सत्तारुढ पार्टीया निम्ह अध्यक्षं थुकिया बारे वयात सःताः हे न्यनेकने याःगु खँ अथें वइमखु ।

थुकियात यक्वस्यां मिसा व मिजंया सहमतिया आधारय् यक्व न्ह्यःनिसें सम्बन्ध दयाच्वंगु अले अन्तिम घटनाय् जक प्रतिकार याःगु व प्रहरी व पत्रकारयात जानकारी बिउगु धइगु खँ वःगु दु । जाजरकोटया मिसाया न्ह्याथेयानाः सां राजधानी च्वनेमाःगु अले थःगु सरुवा पिने जिल्लाय् जुइगु जुइवं महराया ग्वहालि कायेगु यानाच्वंगु व उकियालागिु शरीरया लेनदेन जुयाः नं थः धइथे मजूगुलिं प्रतिकार जूगु धकाः हुइनाभुइना वःगु दु । यद्यपि थथे जुइमाः धइगु मदु । बरु सत्ताया आडय् व पदोन्नतिया लोभय् उम्ह मिसायात यौ*न दुराचार धाःसा यानाच्वंगु संभावना खनेदत ।

महराया हे गुगुं इलय् सहचारी डा. बाबुराम भट्टराइं थुकियात सत्ता–शक्तिया धाकय् छम्ह मिजनं परस्त्रीगमन याइगु अले भेद खुले जुइवं ह्ययेकाः ख्यानाः युटर्न याकेगु अले थःगु छ्यं बचेयायेगु धकाः ट्वीटरय् प्रतिक्रिया बिइगु धइगु वं सत्यया यक्व पक्षया खँ सिउगु दइ धकाः अनुमान यायेफु । थःत माःगु शारीरिक आवश्यकताया पूर्ति यायेत हे मेपिनि कलाःयाथाय् बहनी अय्लाः ज्वनाः वनजुइ धकाः न्ह्याम्हस्यां अनुमान याइ । अझ प्रस्ताव तःगु अले अस्वीकार यायेवं ल्हाः वाःगु जक मखु, न्हापां २९दँ निसें यातना सहयानाच्वनागु धइगु आशयया अभिव्यक्ति नं थन न्ह्यथनेबह जुइ । थःगु परिवार दुम्ह मनू मेपिनि कलाःया छेँय् याकःचा दइबलय् न्ह्याबलें न्ह्याबलें वनाच्वनेगु धइगु नैतिकता दुम्हस्यापाखें जुइमखु । जुइफु, तर थज्याःगु घटना पिहाँ वयेधुंकाः वं न्ह्याक्व भिं जुयाः खँ ल्हाःसां वयागु दोष सुचुकेगु थाय् ल्यनी मखु । थज्याःगु खँ वयेवं तुरन्त हे महरां थ्व धइगु समायोजन जूगु चित्त बुझेमजुयाः तं प्वंकेत जक धाःगु धकाः स्पष्टीकरण बिउसां घटनाक्रमं उलिजक धकाः खँ सिधयेके मबिउ ।

थुलि आरोप मेपिं समान्य मिजंयात सामान्य मिसां बिउगु जूसा, उलि जानकारी पुलिसयात बिउगु जूसा, अनया स्थलगत निरिक्षण धुंकाः व मिजंयात प्रहरीं थःगु नियन्त्रणय् कयाः अनुसन्धान यायेधुंकल जुइ । अझ उखे मिसा अधिकारवादीतय्सं जुलुस पिकायेगु निसें कयाः पीडकयात कडा सजाय बिइमाः धकाः आन्दोलन यायेधुंकल जुइ । तर थ्व थज्याःगु घटना जुयाबिल कि न प्रहरी छुं यायेत तयार जुल, न महिला अधिकारवादी हे तप्यंक सतकय् वा मिडियाय् वयाः नवायेत तयार जुल । दक्व पियाच्वं व स्वया सिद्धान्तय् च्वनाच्वन । न्ह्यागुसां थ्व घटनां अमेरिकाया पूर्व राष्ट्रपति बिल क्लिन्टन वा मोनिका लेवेन्स्कीया घटनायात लुमंकाबिउगु दु । दोषीयात दोषी धकाः सिइकाः नं सजाय बिइमखनीगु अवस्था वयेयः गबलें गबलें ।

मेखे खयेत ला यक्व मिस्तय्त थज्याःगु खँ यइमखु, उपिं स्वभाविक कथं हे मिसाया दोष खनेत तयार जुइमखु, मिजं हे जक वयाः जबर्जस्ती याःवल धइगु खँ हे जक वइ । तर नं भाःत पिहाँ वनाच्वंबलय् बहनी ८ ताई धुंकाः अय्लाः ज्वनाः वःम्ह मेपिनि भाःतयात लसकुस यानाः थःगु क्वथाय् सामान्यतयाः दुकाइमखु । अन छगः हे गिलासय् निम्हस्यां अय्लाः त्वनेगु खँ वःगु दु, अय्लाःयात ल्वसा तुसि तानाः महरां ज्वन वला लाकि वं हे तानाः न्ह्यचाकलकि धइगु नं न्ह्यसः दु । थःगु स्वार्थया लागि वा शरीर सुखया लागि करपिनि भाःत काःजुइपिं मिस्तय्गु लागि नेवाः भासं छगू खँग्वः दु ।

न्ह्याम्हस्यां न्ह्यागु हे धाःसां अन अनैतिक सम्बन्ध अले सहमतिइ जुयाच्वंगु विवाहेत्तर सम्बन्धया अनुमान यक्वस्यां याःगु दु । अझ निन्हु हे लिपा, वं जितः छुं हे मयाः, अबु समानम्ह मनू व धइगु थःगु भनाइ थम्हं त्वाःल्हाइगु कथंया मेगु अन्तर्वार्ता वयेवं मनूत वप्रति झन् नकारात्मक जूगु सकस्यां चाः । तर आः वयाः थज्याःगु खँय् संवेदनशिल मजुसे थज्याःगु हे इलय् उमिसं सम्बन्ध विच्छेद यायेगु निर्णय याना धइगु खँ पित हल । अले उखे वया हे अमेरिकाय् च्वनाच्वंपिं मस्तय्सं तकं वयात फान छकः हे मयाः धइगु खँया आधारय् नं व मिसा असामान्य अवस्थाय् म्वानाच्वंगु जुइमाः धइगु अनुमान याकू । आः वयागु यथार्थ भावावेशय् वयाः स्वयाः गहन अनुसन्धान यानाः हे जक पित हयेमाःगु अवस्था दु ।

न्ह्यागु हे जूसां थुकिं छम्ह युद्धया पृष्ठभूमिं देशय् संसदीय व्यवस्थां हइगु स्वयाः बिस्कं व बांलाःगु परिवर्तन हये, विपन्न, विभेदय् लाःपिं व भौगोलिक कारणं लिउने लाःपिं मनूतय्त मूलधारय् हये धकाः युद्ध हे याःम्ह छम्ह होनहार राजनीतिज्ञया आगं प्वलेगु ज्या जुल । मालावन धाःसा थज्याःगु यौ*नया मामलाय् लिफःमस्वइपिं नेतात झीगु राजनीतिक वृत्तय् यक्व लुयावइतिनि ।

थज्याःगु सम्बन्धया खँय् छम्ह वा छगू पक्षया पक्ष अले मेम्हस्या विपक्ष च्वनेगु बुद्धिमत्ता जुइमखु । बरु अध्ययन अनुसन्धान जुइमाः, थुकिया राजनीतिक, आर्थिक, समाजिक पक्षयात दुवालेमाः । अले सत्य तथ्ययात न्ह्यःने हयाः हे जक दोषीयात सजाँय बिइमाः । जनता सचेत जुइगु धइगु तःधंगु खँ खः, अले सामाजिक सञ्जालय् थथेभनं खँ जूगुलिं नं थ्व घटनायात सरकारं ढाकछोप यानातयेमफत धइगु खँ थन स्थापित जूगु दु । आशा याये याकनं हे जनदबाव वइगु भयं सां हे थ्व प्रकरण दोषीयात सजाय बियाः पीडितयात न्याय याइ ।

Leave a Reply

Your email address will not be published. Required fields are marked *