fbpx

जिं नं छगू प्रेस विज्ञप्ति पिकाये !

राजमाया पुतवार

धन–सम्पत्तिं मखु, नेवाःत संघसंस्थां धनी । छम्हेसित प्यंगूया दरं जक ल्याः खायेगु खःसां ग्वःगू संस्था दु जुइ नेवाःतय् ! लँय् थ्याक्क छम्ह मनूया ल्हाः ज्वनादिसँ । खल्तिइ छामछुम यानाः स्वयादिसँ । व मनू छगू संस्थाया अध्यक्ष, मेगुया उपाध्यक्ष, मेगुया महासचिव अले मेगुया कोषाध्यक्ष जुयाच्वनी ।

साधारण सदस्यला व ग्वःगु संघसंस्थाया जुयाच्वनी वं हे सिउगु खइमखु । थ्व धइगु नेवाःत गुलि संगठित जुइ न्ह्याः ? इमिसं संगठनया महत्व गुलि सिउ धइगुया दसि खः । चानचुन खनादिया ला नेवाःतय्त?आः स्वयादिसँ । नेवाःतय्त प्यखेरं मछिनाच्वंगु दु । इमिगु भाषा, जाति, संस्कृति, भेषभूषानिसें आः वयाः पुख्र्यौलि जग्गा जमिनतकं सुरक्षित मजुल । इमिगु भाषाय् नं बुल्डोजर, इमिगु जमिनय् नं बुल्डोजर । आः छु यायेगु ? यायेगु खःसा यक्व दु झी ।

मयासे मगाःगु हे नं यक्व दु । गबलय् यायेगु, सुनां यायेगु धइगु जक खँ खः । संस्था दयेकेगु वा दयेका तयागु धइगु हे यायेत, अले मयासें जिल ला ? कन्हय् छम्ह सुं हू वःम्ह दातां छगू संस्थाया गःतां ज्वनाः थुगु संस्थायात सिरपाः बी माल धाइ धकाः जकला संस्था दयेकातःगु खइ मखु, अले हाकनं मेगु संस्थालिसे म्ह्याय् बिसिकूगु व जिलाजं दुमचायेकूगु खँ ल्ह्वनाः ल्वाकातयेगु नं मखइमखु ।

अथे मखुसा हाकनं निगू संस्था मिले जुयाः मेगु स्वंगूगु संस्थायात बस्वायेत धकाः दयेकातःगु धकाः धायेगु अवस्था नं मदु । आः छु ले ? अथे धायेवं इमिगु सामुहिक सो¥ह श्राद्ध यानाछ्वये जिल ला ?तर मेगु छगू नं विशेषता दु नेवाः संघसंस्थातय्गु । संघसस्थात ग्वाःग्वाः । अप्वयां अप्वः दुसा कार्यसमिति । साधारण सदस्यतय् ला छु खँ ल्हाये बासःम्ह कार्यकारिणी दुगु संस्थाया नं बागू दर्जन मनू आन्दोलनय् थ्यनीमखु ।

“जाजि नयाः प्वाः धुस्स च्वनीबलय् कउचय् च्वनाः ल्यापटप मुलय् तयाः प्रेस विज्ञप्ति पिकायेगु । गाडीं क्यःसां विज्ञप्ति, खापां काःसां विज्ञप्ति, जग्गा काःसां विज्ञप्ति, नखः हने माःसां विज्ञप्ति । उलि जक ला, कलाः सीसां विज्ञप्ति, कलाः पय्नं वंसां विज्ञप्ति । क्या खास्सागु काइदा थ्व !”

द ला दु, तर इपिं सकलें सकलें दक्व दक्व हे मलाःपिं । लाइगु नं गथे ? छम्ह मनू छगू संस्थाय् जक जूसा खः धाये ! हाकनं इलय्ब्यलय् पार्टी नेतातय् थाय् चाकरि वने हे माल । छम्ह हे मनुखं न्हय्गू संस्थाया पद घयेपुना तसेंलि लाइगु खँ हे मजुल । उकिं छुं संस्थाया नं मनू मुनाच्वनी मखु । हदं दुसा च्याम्ह झिम्ह (समय्बजि नयेथाय् जक थ्याइपिनिगु ल्याःचाः तयां मब्याः) ।

अथे जुसेंलि सिइके माल, कि नेवाःतय् संस्था यक्व, दुजः कम । उकिं ला सतक आन्दोलनया आह्वान याइपिं यक्व दु, सतकय् वइपिं धाःसा म्हो । दक्वसिनं थःथःगु संस्थाया ब्यानर ज्वनाः वा ब्यानरया लिउने नेपाःया झिंखुगू लाख नेवाःत लुरुलुरु वया बिउसा यः । मवसे मगाः धाइगु । उमिगु संस्थाया लिउलिउ मवल कि नेवाःत संगठित जुइ मसः धाइगु, नेतृत्वयात स्वीकार मयाःधाइगु ।

चा–न्हिं यानाः, खुसामद यानाः, म्हाःम्हाः धकाः पहः क्यँक्यं अले मत मदुथासय् भोट ल्याः खाकाःसां चुनाव हे त्याकाः नं अध्यक्ष जुयाया सुनां नं ल्याखय् मतःसा छु याये ? अले थः अध्यक्ष जुयाः थःगु कार्यसमितिया दुजःपिंत तक नं सतकय् आन्दोलन जुइबलय् क्वकाये मफुत धायेवं छु याये ? थः अले सलिंचाय् क्वब्वाये नं ला मजिल नि ।

उकुन्हु अमेरिकाय् वनाबलय् छगू चीज ज्वना वयागु । थन नं द ला दु तर अन छय्यात चिकं बुकाः काय्भलिं सिरपाः बिया हःगु जुयाः थ्व भचा पक्कागु का । थुकियात धाइ ल्यापटप । सेकेण्ड हाय्ण्डसां ज्या वः सिक्क । आः थः कार्यकर्ता मुने मफइगु, मेपिंसं मंच दयेका मबीकं भासण यायेगु ह्वःताःचूमलाइगु जुसेंलि, अथे जुयाः नं थः नेवाःतय्त नेतृत्व बिया च्वनाम्ह धकाः इलय्ब्यलय् मन्त्री सन्त्रीतय्थाय् ध्वाँस त्वःतः वने माःगु हे अवस्था वयाच्वंबलय् थथे सुम्क ल्हाः प्वःचिनाः च्वनाः नं मजिल धकाः जिं छगू जुक्ति पिकाना । छु ले व जुक्ति ?

अखबार इखबार ब्वनेगु, फेसबुक फिसबुकय् सुनां छु छु च्वयातल चिवा कायेगु । अले इमित छु धाःसा लय्ताइ उकिया बारे नं छम्ह निम्ह बिचाः क्वातुपिं कार्यकर्तातय्त फोन फिन यानाः खँ थ्वयेकेगु । अले जाजि नयाः प्वाः धुस्स च्वनीबलय् कउचय् च्वनाः ल्यापटप मुलय् तयाः प्रेस विज्ञप्ति पिकायेगु । गाडीं क्यःसां विज्ञप्ति, खापां काःसां विज्ञप्ति, जग्गा काःसां विज्ञप्ति, नखः हने माःसां विज्ञप्ति । उलि जक ला, कलाः सीसां विज्ञप्ति, कलाः पय्नं वंसां विज्ञप्ति ।

क्या खास्सागु काइदा थ्व ! थौंकन्हय् न्हापा थें विज्ञप्ति पिथनाः पत्रकार सममेलन नं यायेम्वाः, पत्रपत्रिकाया अफिसय् वनाः सम्पादक नं नाप लायेम्वाः । बस, फेसबुकया वालय् पोस्ट यानाः म्हसिक्व धाक्व नेवाःतय्त ट्याग याना बिउसा गाः । सकसिनं लिफः न्ह्यफः मस्वसे लाइक याना हे बी । अले छिमिगु संस्थाया ज्या विज्ञप्ति जक पिकायेगु ला धकाः सुनां नं आँट यात धाःसा नेवाःतय्गु थ्व हे पहः, बानी ला मजिउ, नकारात्मक अथवा ब्वह जक बीगु धकाः धाये थ्याः ।

अन नं मगात धाःसा जिमिसं धाःबलय् लुरुलुरु सतकय् कुहां वइमखु, जिमिगु झण्डा ज्वनीमखु धकाः लित्तुलिना छ्वःसां जिल ।ज्या यानागु धकाः उकिया बयान यायेम्वाः, सिरपाः कयागु धकाः उकिया नं बयान यायेम्वाः । थ्व विज्ञप्ति धइगु ला उत्तर कोरियाया मिसाइल स्वयां ग्यानापु धकाः ले सा ।

छम्ह नेवाः संस्था (नेवाःतय्गु प्रसंगय् संघसंस्थात धइगु नं व्यक्तिवाचक नाम हे जूगुलिं छम्ह धाःसा पाय्छि जुइ ताया)या छगू विज्ञप्ति खन कि ओली सोली धाःपिंसं छु धाःगु तक हे तये छाली मखु हँ ! ख नं खः, नेवाःत छकः सतकय् वल कि ४६ साल वइ हँ ! ६३ साल वइ हँ ! मवःगुलिं जक ला खः नि । माल धाःसा आः हे चुटकीया भरय् लखौंलख नेवाःतय्त सतकय् क्वकायेफु धकाः भासण यायेगु चुनावय् जमानत जफत जुइम्ह उम्मेदवारं तकं धायेगु त्वःतीमखु ।

अज्याःगु विज्ञप्ति छगू जक पिकाःसां थः सलंसः कार्यकर्ता सतकय् क्वकयाः आन्दोलनया नेतृत्व बियाथें हे मेरिट लिस्टय् नां च्वनी । उकिं आः जि थन च्वनाः छुं याये मफुसेंलि मेगु मयासे विज्ञप्ति पिकायेगु हे बांलाइ । कपि पेस्टया सुविधा दुगुलिं अःपु जिगु संस्थायात । धाथें, आः थौंकन्हय् छु छु विषयय् विज्ञप्ति पिकाःसा बांलाइ ? खसुक्क जितः इन बक्स याना हयादिसँ न्हैं !

नेपालभाषा टाइम्स

Leave a Reply

Your email address will not be published. Required fields are marked *