fbpx

भ्वाथःगु नँ (लँ) चिबाखं

“अजि, छ गना वानेगु गाडी लङ च्वङागु ? सुथाय् खु ता इलय्निसें छ थाना फल्चाय् च्वङच्वंगु खाङागु । छेँ वानेगु लाँ द्वना ला कि छु ? छं जाः, बजि नं नये म्वःल ला ? न्हिछिं थाना फेतुङ च्वंगु खाङा ।” चाँगुइ वानेगु बस स्टपय् फल्चाय् न्हिछिं फेतुङ च्वंम्हाः चये ङादाति दःम्हा अजि धाये लाइकम्हा बुरीम्हा खाङ जिगु नुगःलय् धौबजि वालेथें जूगुलिं थीकसंतु वाङ नेङा ।
“जि गाडी लङ च्वङागु मखु, पुता । जि तरीम्हाः काय् नं छेँय् ब्वङ येंकेता कःवइ धक लङ च्वङागु । जि मेलम्चीया छगु गाम्चाय् न वयाम्हा । जि प्येम्हाः काय् दः । माइलाम्हा साउदी अरबय्, अले साइँलाम्हा अष्ट्रेलिया वङच्वंगु दः । जिता थाना चिचाय्रिम्हा काय् नं छंता तःरीम्हा दाइ नं कःवई धायो त्वतःथकुगु । सुथाय् न्हेता–च्याता ईलय्तुं कःवई धकः धायो वांगु । डाक्टर मनू, लि मलाता ला ? अः तक हे कः मवोनि कः ।” बुरीं थुुसुथुसु मुस ततं धाल ।
“द्यःलुकुंबिये ताने धुंकल । थौं अजियाता कःवइ मखुत ज्वी । थौं छन्हु जिगु हे छेँय् च्वङ वानेनु, अजि । कन्हे छं काय्याता मालः स्वयेक मज्यु ला ?” जिता जिम्हा मदयेधुंकम्हा अजि लुमः वोगुलिं थः हे अजि भःपियो धाया ।
“छं थुलि धाल, पुता । छंगु जय जय जुयेमः । माः वोइबले जि काय् नं जिता मखानकि ख्वई । जि थाना काय्याता हे लङ च्वने मानि । जिम्हा काय् येँय् बराय्धांगु अस्पतालय् डाक्टर जुयोच्वंगु दः । चाँगुइ ङाताजाःगु बराय्खाःगु छेँ दयेके धुंकगु दः धाःगु । भाचा लिबासां जिता काःवइतिनि । छुं न मधाःसें जि मेथाय् वानेबले जि काय् अमा गना वानाधकः ख्वयोच्वनि ।” बुरीयागु थः काय्यागु मतिना खाङ जिगु मिखां ख्वबि सर्र बः वल । बुरी नं मखांक ख्वपुसाः लिकया जिं थःगु मिखा हुया ।
“छंम्हा काय्यागु छेँ गना धायेगु छं खाङागु दः ला अजि ? मखुसा जिं हे छंता मोटरसाइकलं काय्या छेँय्तक तये येंके काः मज्यु ला ?” छाय् छाय् जिता व बुरी अजियाता अलपत्र त्वताः वानेगु मति हे मवोल ।
“थ्व भ्वँतय् जिम्हा चिच्यारिम्हा काये नं तरीम्हा काय्यागु छेँ गना धायेगु च्वयोब्यूगु दः । ना, छक स्वःसा पुता ।” बुरी नं थम्ह फियोतःगु पुतुनंया म्हेचाय् वास्या वास्या याङ भ्वँ छक्वचा लिकायो जिता ज्वंकल ।
भ्वँःतय् च्वँयोतःगु खाँ ब्वङाबले जि छथुं सिमां कुत्युँवोम्हा मनूथँे जुल । भ्वँतये बुरीया काय्यागु थेकाना मखु, मेगु हे च्वयोतःगु जुयोच्वन । भ्वँतय् थथे च्वयोतलः
दाजुकिजा तताकेहेँपुङ,
थ्व बुरीम्हा मनूया काय् म्ह्याय् सुं हे मदु । थ्व बुरीया भाःत नं च्यादा न्हापा हे सियेधुंकल । थःधायेपुङ सुं हे मदुगुलिं थ्व बुरी ऊँई जुयो गामय् सकसितां हायेकः जुल । हने लागु नइगु । खांक्व मनूतयेता अपां कयेकाः दुःख ब्यूगुलिं थ्वयाता गामय् मतसें पितिङ हयागु जुल । थ्व बुरीयाता नपालाम्हा छिं दुःख मतासेँ छक लगनखेलय् वँये–ऊँईतयेता वासः याइगु अस्पतालय्तक थ्येंक बिल धःसा छिगु जय जय जुई । सुभाय् ।
गामय्यापुङ भिन्तुनामि
बुरी जिगु ख्वालय् तुलुतुलु स्वयो जिं छु धाई धक लङच्वन । भ्वँतय् छु च्वयोतल धायेगु खाँ काने मछाल जि इतिमिति कङच्वङा । छम्हाः बुरीम्हा मिखांनपां बाँलाक मखाने धुंकम्हा अजि थेँजाःम्हसिता वाय् हयेफःम्हा काय् गज्याम्हा ज्वी धायेगु मति लुयोच्वन ।
ने.सं. ११३९ कौलाथ्व एकादशी
किपा बाखंलिसे सम्बन्धित मखु इन्टरनेटं कयागु खः । बाखं चिबाखं साहित्य पुचलय् लूगु खः ।

—बाबुकाजी सुवाल ‘विकेश निराशी’

One thought on “भ्वाथःगु नँ (लँ) चिबाखं

  • September 25, 2019 at 12:38 pm
    Permalink

    जिता जिम्हा मदयेधुंकम्हा अजि लुमः वोगुलिं थः हे अजि भःपियो धाया ।
    बाखं थ्वहे खः थः ल्वमनि कतः लुमनि !

    Reply

Leave a Reply

Your email address will not be published. Required fields are marked *