fbpx

सिक्किमया नेवाःतय्सं नं हन इन्द्रजात्रा

झीगु संवाददाता

येँ, यंलाथ्व चतुर्दशी । नेपाःया लिसें उत्तरपूर्व भारतया नेवाःतय्गु ख्वातुगु बस्ती दूगु सिक्किमय् नं येँयाः वा इन्द्रजात्रा हंगु दु । अनया नेवाः समुदायं विशेष यानाः अनया नेवाः संगठन सिक्किम नेवार गुठीया आयोजनाय् दँय् दसं थी थी ज्याझ्वः यायेगु यानाच्वंगु खः ।

दँय्दसं थें थुगुसिइ नं अन खः दयेकाः उकिइ जीवित देवी कुमारीया किपा तयाः सालाः देय् चाःहिइकल । नकतिनि हे दयेकाच्वंगु अनया नेवाः छेँ दूगु थाय् सिचेनिसें बाइपासतक व अनं हानं सिचेतक अन छगू साँस्कृतिक रयालि जूगु खः । अथे हे लाखय् व झ्यालिंचा नं पिदन । थुगुसिइ नं अन यक्व धयाथें नेवाः भाजुमय्जुपिं परम्परागत वसः पुनाः धिमय्या तालय् प्याखं हुहुं ब्वतिकाःगु खः ।

 

थ्व वर्ष इन्द्रजात्रा मेमेगु दँस्वयाः चिसकं जकः याःगु दु । अथे याःगु कारण वइगु नभेम्बरय् गुठीया २५दँ रजत जयन्ती तःजिक थी थी ज्याझ्वःसहित हनेत्यंगुलिं खः धकाः स्थानीय नेवाःतय्सं सामाजिक संजालमार्फत जानकारी बिउगु दु ।

पश्चिम सिक्किमया देन्तामय् जूगु इन्द्रजात्रा महोत्सवय् भौतिक स्वास्थ्य इन्जिनियरिङ मन्त्री भीम हाङ सुब्बा सहितया सरकारया हनेबहपिं पाहाँपिं उपस्थित जुयादिल । ज्याझ्वलय् थी थी ख्यःयापिं १२ व्यक्तित्वपिन्त हंगु नं समाचार वःगु दु । उगु ज्याझ्वलय् साँस्कृतिक ब्वज्या नं जूगु खः ।

 

किपा ग्वाहालि सामाजिक संजाल

Leave a Reply

Your email address will not be published. Required fields are marked *