fbpx

येँयाः क्वःनेयाः क्वचाल

झीगु संवाददाता
येँ, यंलाथ्व चतुर्दशी । येँ देय्या दकलय् न्ह्यइपुक्क हनीगु नखः येँयाःया दकलय् महत्वपूर्णगु दिं कथं थौं श्री कुमारी, श्री गणेश व श्री भैरवया रथ सहित क्वनेयाः क्वचाल ।
रथयाः न्हयायेन्ह्यः नेपाःया राष्ट्राध्यक्षया हैसियतं राष्ट्रपति विद्या भण्डारी सहित देय्या उपराष्ट्रपति, प्रधानमन्त्री, प्रधानन्यायाधिश, लगायत विदेशी कुटनीतिक नियोगया सदस्यपिं नं उगु जात्रा स्वयेत झाःगु खः । राष्ट्रपतिं जात्रा न्ह्यायेन्ह्यः द्यःपिनिगु संकल्प पुजा यानादीगु खःसा मेमेपिन्सं नं गद्दी बैठकय् च्वनाः जात्रा न्ह्यायेवं रथय् बिज्यानाच्वंपिं द्यःपिन्त ज्वजलपा नं यानादिल ।


उकियालिसें थुगुसिइ येँ महानगरपालिकाया ब्वनाय् थी थी देय्या न्याम्ह मेयरपिं व अथे हे ४५म्ह विशेष अथितिपिं नं येँयाः स्वयेत वःगु खः ।
रथ मरुं चिकंमुगः, न्हूघः, लगं, ब्रम्हत्वाः, वन्दे, ह्यूमत, क्वहिति, भिंद्यः चाःहिलाः मरुइ लिथ्यंगु खः । थी थी कारणं थुगुसिइया जात्रा लिबाक्क क्वचाःगु खँ धाःगु दु ।
खःयाः क्वचायेवं दागिं वनेग धकाः इन्द्रया मांया रुप कयातःम्ह तुयगु ख्वाःपाः पुनातःम्ह दागिं मरु लुकुफल्चां पिकाइ अले थुगुसिइ थः मांबौ वा मेपिं थःथिति मदुपि गुता बीबः ह्वला नाप लिउलिउ वनीगु चलन दु । दागिं बाचाःहिलाकि साय्मितय्पाखें बौमत चाःहिइकी ।

Jibitesh

येँयाःयात स्वनिगःया हे दकलय् तःजीगु नखः धयातःसां थुकिया स्थापना सुनां गबलय् यातधइगु बारे थी थी मनूतय् बिस्कं बिस्कं धारणा दु । न्यनेदुकथं थुकियात स्वर्गय् इन्द्रया मांयात अपसं च्वनेगु नितिं पालिजाः स्वां खुया काःवःम्ह इन्द्रयात ज्वनाः चिनातःगु बाखंलिसे स्वाइ । तर थ्व नखः न्हापाहे चलेजूगु अले थ्व बाखं हिन्दुकरणया लिच्वः जक खः धाइपिं नं दु । कुमारी खःयाःया चलन धाःसा मल्लकालया लिपांम्ह जुजु जयप्रकाश मल्लं न्ह्याकूगु धयातःगु दु ।
प्यदँलिपा तक नं हनुमान ध्वाखा लाय्कू लागाया द्यःगःत ल्ह्वनेसिमधयेकूगुलिं मनूतय् जात्रा स्वयेगु थाय्या अभाव थुगुसिइ नं जुल । अथे हे धर्म व संस्कृतिप्रति सम्मान व च्यूताः मदुपिं मनूत यक्व हे वयाः जात्राः हन्ताः यायेगु व थाय् थासय् ल्वापु थनेगु ज्या नं जुयाच्वन । वःगु वःगु मछि जात्रा व्यवस्थापन समितित दयाः नं अज्याः ज्याय् नियन्त्रण यायेत व हुलयात सामान्य कथं भद्र दयेकेत धाःसा सुयागुं च्यूताः मदुगु खनेदत । अथे हे येँया भाय् व संस्कृतिलिसे स्वापू मदुपिनिगु समुदायया मनूत हनुमानध्वाखा लाागाय् वयाः झ्याउरे म्ये हालाः मनोरन्जनया नामय् स्थानीय संस्कृतियात अतिक्रमण यायेगु ज्या नं जुयाहे च्वन ।

Jibitesh

व बाहेक थौंया जात्राय् राष्ट्रपति लगायतया पाहाँपिन्त हाकुगु ध्वाँय् क्यनेगु धकाः योजना दयेकूगु नामय् पुलांम्ह प्रहरी डिआइजी व पुलांम्ह मेजर सहित सम्पदा अभियन्तातय्त तकं ज्वनायंकूगु समाचार नं वःगु दु ।

थ्व दिनय् नेसं ८८८य् गोरखाया जुजु पृथ्वी नारायण शाह नं नेपाः एकिकरणया नमाय् षडयन्त्रमुलक कथं आक्रमण यानाः त्याकाः थः राजगद्दिइ च्वंगु नं थन न्ह्यथनेबह जू । अथेसां व जुजुं थनया कुमारी जात्रा न्ह्याकेगु हे बचं बिउगुलिं उगु ज्यायात सकारात्मक कथं काइपिं नं दु । तर नं कला, संस्कृति व भाषाया विकासया दसू जुयाच्वंगु मल्लकालया अन्त्य व थ्व नखःया तप्यंगु स्वापू दु । वयांलिपाया शाहकालया यक्व हे ई मचाम्ह युवराजयात गद्दीइ तयाः थापा खलः व पाण्डेखलःया ल्हातिइ पालंपाः नेपाःया सत्ता बागडोल लायेधुंकाः लिपाः जंगबहादुरं एकछत्र पारिवारिक शासन चलयेयात । राजतन्त्र दतले जुजु हे वयाः स्वःवइगु थ्व जात्रा लिपा राष्ट्रपति वइगु चलन जुल ।

Jibitesh

तर राष्ट्रपति वइगु जुइवं अनया जात्राया वातावरणय् आतंक हे मचेजुइक सुं हे न्ह्यने वये मजिइ उमिगु लागि जात्रालु जक मखु द्यः व लाखे पुलुकिसि हे पिने च्वनाबिइमाःगु अवस्थायात धा्रःसा जनतां ययेकाच्वंगु मदु, अले उकिया कारणं राष्ट्रपतियात बहिष्कार हे यायेगु सः नं पिहाँ वयाच्वंगु दु ।
जात्राया मेगु आकर्षण शनिबार थःनेयाः व मंगलबाः ननिचायाः यानाः अले वयां लिपा यःसिं क्वथलाः जात्रा क्वचायेकी ।

किपा ग्वाहालि : जीवितेश मानन्धर तुलाधर

Leave a Reply

Your email address will not be published. Required fields are marked *