fbpx

राजकर्णिकारया “यःदाइ” विमोचन जुल

झीगु संवाददाता
यल, यंलाथ्वः नवमि । पलिस्था चिनाखँ मुँज्याया झ्वलय् नेपालभाषा कवि व निवन्धकार डा पुष्पराज राजकर्णिकारया न्हूगु सफू यःदाइ (नियात्रा+) या उलेज्या शताब्दी पुरुष सत्यमोहन जोशी व नेपालभाषा एकेदमिया चान्सलर चित्तरंजन नेपालीजुं मंकाःकथं यानादिल ।

ज्याझ्वलय् नवासें जोशीं नेपालभाषा साहित्यया ख्यलय् नियात्रा यक्व मदुगु अवस्थाय् न्हूगु नियात्रा सफूयात लसकुस यायेमाःगु खँ धयादिल ।

अथे हे नेपालीं नेपालभाषा साहित्यया विकासय् सकसिगु भूमिकाया आवश्यकता दु धयादिल ।

प्राध्यापक प्रेमशान्ति तुलाधरं यः दाइ सफुतिइ नियात्राया बारे कयाः च्वमिं अन वनेबलय् उगु थाय्या वर्णन जक मयासे थःत मनय् थिउगु अनूभुतियात नं छतिं मसुचुकुसे ब्वमिपिनि न्ह्यःने तयादिउगुयात च्वछायादिल ।

उगु ज्याझ्वलय् १४म्ह कविपिन्सं थःगु कविता बियातःगु मध्ये ९म्ह कविपिं उपस्थिति जुयाः कविता पाठ यानादिल । कविता पाठ यायेत डा. योगेन्द्र प्रधान, प्रा नर्मदेश्वर प्रधान, शाक्य सुरेन, प्रतिसरा सायमि, नारद वज्राचार्य व मेमेपिं कविपिं झाःगु खः ।

कविता पाठ धुंकाः कविताया बारे नवासें डा राजकर्णिकारं नेपालभाषाया कविताया अनिकाल हे जूगु मदुनि गुलिं गुलिं कविता उतिमग्यंसां बाबांलाःगु कविताया सिर्जना नं जुयाच्वंगु हे दनि धयादिल ।

लिसें वय्कलं थम्हं यःदाइ सफू च्वयाबलय्या अनुभव नं अन कनादिल ।

Leave a Reply

Your email address will not be published. Required fields are marked *