fbpx

भिक्षु कौण्डन्यं पुरुष शाक्यवंशया सफू चिखि फ्यनाबिज्यात

झीगु संवाददाता

यल, यंलाथ्वः नवमि ।  अखिल नेपाल भिक्षु महासंंघया महासचिव भिक्षु कौण्डन्य महास्थविरं थौं शनिबार ८५ दँ दुम्ह पुरुष शाक्यवंशं च्वयादीगु सफू बुद्ध धर्म र बौद्ध सन्देशया चिखि फ्यनाबिज्यात ।

ज्याझ्वलय् नवासें वसपोलं नेपालय् बुद्ध बूगु खःसां तबि नं नेपालय् बौद्ध साहित्यया अभाव जुयाच्वंगु अवस्थाय् च्वमिया कृतिया सराहना यासें बुद्धधर्मया सैद्धान्तिक व व्यवहारिक पक्षया बारे मेमेगु नं सफूत च्वयाः पिथनाबिइत सकसितं इनाप यानाबिज्यात ।

अथे हे वसपोलं झीगु समाजय् थः मस्तय्त बेलायत, अष्ट्रेलिया वा युएसय् छ्वयातयागु धायेबलय् न्हाय् तपु यायेगु चलन दुहाँ वयाच्वंगु सन्दर्भय् लिपा वनाः मांबौपिं मफइबलय् बिचाः यायेत मवइगु जक मखु मन्तसां हे न्ह्याःने वये मलाः धयाहइगु खँ सामान्य जुयाच्वन धासें थःमस्तय् धर्म व संस्कार स्यनेगु कर्तव्य मांबौपिनिगु हे खः धयाबिज्यात । अथे हे ईकथं भन्ते गुरुमांपिन्सं मोबाइल ल्यापटप छ्यःगु यात नं ईया माग कथं कायेत नं धयाबिज्यात ।

सफूया च्वमि पुरुष शाक्यवंशं थः अतिकं सःम्ह मखुसां इलय् ब्यलय् च्वयेगु यानागु अले थ्व लेखत आनन्दभूमि पत्रिकां नियमित प्रकाशन यानाबिउगुलिं थःत तःधंगु हौसला दूगु व थः म्ह्याय्पिनिगु हे मिहेनतं थुलि लेखत सफूया रुपय् पिदनेखंगु धासें सकसितं सुभाय् धयादिल ।

सफूया समीक्षा यायेगु झ्वलय् प्रा डा बज्रराज शाक्यं च्वमिं बुद्धधर्मया दुने लाःगु दार्शनिक पक्षयात बांलाक अध्ययान यानाःच्वयातःगु दु धासें थुकिं बौद्ध ब्वमिपिन्त माःगु ज्ञान बिइगु खँय् विश्वास प्वंकादिल । ।

अथे हे नेपालभाषाया च्वमि व बौद्ध अध्येता सुवर्ण शाक्यं नेपालय् बुद्धधर्मया अवस्थाया बारे नवासें आः दक्व बौद्धतय्सं सैद्धान्तिक ज्ञान नं कायेमाल अले उकियात थःगु जीवनय् नं छ्यलेमाल धयादिल ।

सफुतिइ दुथ्याःगु लेखत सम्पादन यानादीम्ह नरेशवीर शाक्यं च्वमियाके बुद्धधर्मया इतिहास व सिद्धान्तया बारे गहन अध्ययन व ज्ञान दूगुलिं व सफू सम्पादन जक यानाबलय् हे थम्हं यक्व ज्ञान लाभ यानाथें च्वंगु अनुभव कनादिल ।

सफूया प्रकाशन संस्था लोटस रिर्सच सेन्टरमा नायः डा सुरेन्द्रमान वज्राचार्यं सेन्टर न्हापांनिसें हे बौद्ध साहित्यया सफूत प्रकाशन यायेत ज्या यानाच्वंगुलिइ थ्व सफू पिथनेखंगु धइगु तसकं बांलाःगु अवसरया रुपय् कयागु खँ कनादिल ।

Leave a Reply

Your email address will not be published. Required fields are marked *