fbpx

लुरनारांया देसभ्रमण

राेशन श्रेष्ठ

थौं लुरनारां यक्व दं लिपा थ:गु देसय् लिहाँ वल । अबु अमा अजि अजा सकलें नाप छझा खँ ब्याकल । मचाबलय् या पासा लतंकाजि लुमना वल। गुरुजु चुकय् वयागु हे छेँ वना नापलाना वये धका पिहाँ वल । चुकय् दुहाँ वनेगु गल्लिचाय् द्य: थापना याना तल खनी । न्हापाला मरु । मस्यु छुं जात्राया नितिं जक तैत:गु ख:ला? थय्‌क द्य:या लिउनं प्वालं उखे दुने चुक पाखे स्वयेत मिखा यंकुबलय् लुरनारांया म्हुतु थ्वँ लात । उखेपाखें छम्हसिनं द्य:पुजा यासें थ्वँ हायेकुगु लुरनारांया म्हुतुइ लायेवं छखे इत:मित: कंगु थें जुल मेखे थ्वँया चाकुसवा: वयात न्ह्यइपु नं ताल ।
‘हे, सु व द्य:या ल्यूने सुला सुला प्रसाद नइम्ह हाँ? माँवेचरां’
थथे धका छम्ह ज्याथम्ह मय्‌जु लपा लम्हुया लुरनारांया न्ह्य:ने दंवल । लिलिचिला ‘आसे आसे’ याये भावं ल्हा:चिं याना लुरनारां गल्लिचां पिहाँ वल ।
‘मछा: मजू ला? द्य:या ल्यूने सुला सुला प्रसाद नयेत । सु छ? गनं वयाम्ह? जिमि भाकल यानां पुजा याना तइम्ह द्य:या प्रसाद नया छु यानागु छं हाँ? छ द्य: ख:ला? छं जित बरदान बिये फुला ?’
लसिं थें तिं तिं न्हू हाला थथे जात्रा न्यायेकेवं लुरनारां यात छु याये छु याये जुल । नाइसे च्वंगु सलं धाल
‘जि थ्व गल्लिचां न्हापा मचाबलय् जुयागु लुमंसे वया थन वयागु । द्य: दु धका जिं सत्ते सत्ते मसिल । म्वाल का आ: जिं छु यानाब्यूसा छि लस ज्वइ?’
तं क्वमल्हागुलिं फुं फुं यानाच्वंम्ह ज्याथ: मयजुं धाल
‘का ल्ह्व: । जिगु पुजाया खर्च दक्वं ल्ह्व । जिमि सुथं निसं ब्रत च्वना द्य:पुजा याना च्वना थासय् बिघ्न यायेत वइम्ह माँवेचरां…’
हालाच्वना खइमखु धका म्हिचाय् ल्हा: दुछ्वत । ५०० तकाया लोठ छपा: पिकाल । ज्याथ: मय्‌जुया ल्हातय् तया बिया निपा ल्हा: ज्वजलपिसें लुरनारां लिखतं वना छ्वत ।

लँय् व वं नुगलय् खँ वात्तुवाल ।
‘गजा:म्ह मिसा जुइ? जिं बिघ्न यानागु हे मखु ।अत्थें जि नाप हा:वल । थौं जि दसा जकं मभिन ला? गजा:गु साइतय् पिहाँ वये लात ।’
हाकनं नुगलं भर बिल ।
‘द्य:यात छा:गु थ्वँ हे म्हुतुइ ला:गु तिनि । थ्व ला भाग्यमानी जूगु जुल । जित देवं हे प्रसाद नके हल । बरु ब्व: फयेका: व ५०० तका पुइका प्रसाद बिल । गजा:म्ह द्य: जुइ ।’

थथे हे नुगलय् खँ ब्याकु ब्याकुं लुरनारां लँय् न्यासि वनाच्वन । आ: चा:हिला व हे चुकय् वने मास्ते मवल । मेथाय् गन वने धका क्व:मछी नि; मेम्ह पासा दिपेन्चाया छेँ पाखे वने ला, छेँ हे लिहाँ वना: छ्वयेला जुयाच्वन । न्ह्याथाय् वंसां जिइक लाय्‌कू जुया वनेकथं गल्लि पिचायेक न्यासि वनाच्वन ।

अबलय् लाक्क अजु चायापुक छम्ह मय्‌जु व छम्ह मचा उखेपाखें न्यासि वयाच्वंगु खन । तापाकं स्वयेबलय् व मय्‌जु हेराथकुं ख:थें ख:थें च्वन । मचाम्ह धा:सा ती फ्याये मफुत । गथे जूगु थ्व? हेराथकुं ला तापालय् वनां च्वन धका लुरनारां नं न्यनात:गु । थन गथे हेराथकुं नापलाइ? खै मखु जुइ मेम्ह हे जुइ धका मतिइ ततं मय्‌जुयात स्वस्वं वन । छझा: मिखा नं ल्वात । मिखा ल्वायेवं मयजुं उग्रिमे मिखा मेखे फस्वकल । लुरनारांयात छु याये छु याये जुल । थ:पाखे पुला वनेवं लुरनारां नं लिफ: स्वत ।

‘ख: जुइ थ्व पक्का हे थ्व मिसा हेराथकुं हे ख: जुइ । मजिल बि । छक्व: स हे स:ते ।’ धका मतिइ तया लुरनारां नं स:तल ।

‘हेराथकुं, ए हेराथकुं’
मयजुं लिफ: स्वल । ल्हातय् ज्वनात:गु ची प्व: प्लास्टिकया झोला मचायात बिया लुरनारां पाखे वल ।
‘सु छ? जिं म्ह मस्यू ।’
लुरनारांयात पक्का जुल हेराथकुं हे ख: खनीसा । यक्व दँ लिपा खंगु जुया म्हसिइके थाकुया च्वन। तर छक्व: खँ ल्हायेवं हेराथकुंया न्यतालय् च्वंगु गा:चा व न्हासय् या चीग्व:गु ती खनेवं लुरनारां धुक्क जुल ।
‘जि लुरनारां का, म्हमसिल ला?’
‘म्ह मस्यू जिं लुरनारां सुरनारां धा:म्ह’
‘धात्थें म्हमसिल ला? ए! म्वाल का । सरी न्हां । जि ला हेराथकुं जुइ धया स:ता:गु । मेता छुं मखु । जि वने न्हिं ।’
लुरनारां फस्वया वनेत बुलुहुँ पला न्ह्याकल ।
‘ए च्वाकिं छ छेँय् हुँ न्हिं । माँयात जि लिपा वइ धया ब्यु न्हि’
ल्यूने थथे धा:उ स: तायेवं लुरनारानं लिफ: स्वल । छुं मधासें हेराथकुं थ:हे लुरनारां या ल्यू ल्यू न्यासि व:गु खन ।
लुरनारां अवाक जुल ।

छुं मधासें ल्यू ल्यू व:बलय् लुरनारांयात मछिं थें च्वना वल । तक्क दिना धाल ।
‘छ हेराथकुं हे ख: खला? धा रे, जि धात्थें कन्फ्यूज जुल ।’
‘अज न्यनाच्वनेमानिउ ला? मस्यू पह याना !!!’
मिखा ल्वाका: थुलिइ धया हेराथकुं नं मिखा मेखे फस्वकल । लुरनारां आतां जुल । लिखतं हेराथकुंया न्यता: ह्याँउया वंगु वा: चायेकल । फहिला हेराथकुंया ख्वा:पाखे न्ह्याना वना लुरनारां नं स्व:बलय खन । हेराथकुंया मिखां ख्वबि स्व: स्व: वयाच्वन ।

कथहं ।……
थ्व काल्पनिक बाखँ ख: । सुयाँगु जीवनय् पाय्‌छि जू वन धा:सा थजु । )

Leave a Reply

Your email address will not be published. Required fields are marked *