fbpx

हनुमानध्वाखाय् इन्द्रजात्रा सम्बन्धी अस्थायी ब्वज्या

झीगु संवाददाता
येँ, गुंलाथ्वः चौथि । वंगु प्यदँ न्ह्यः वःगु तःभुखाय् लिपा जूगु हनुमानध्वाखा लाय्कूया क्षति व थी थी देय्या ग्वहालिं जुयाच्वंगु पुनःनिर्माणया जानकारी बिइत व इन्द्रजात्रा सम्बन्धी छगू अस्थायी ब्वज्या जूगु दु ।

उगु ब्वज्याया उलेज्याया झ्वलय् मूपाहां सत्यमोहन जोशीं पुनःनिर्माण विशेषांकया छगू स्मारिकाया चिखिफ्यने ज्या नं यानादिल ।

किपाः रेखा शाक्य

वय्कलं थः पुरातत्व धइगु हे छुं मसिउनिबलय् पुरातत्व विभागया डाइरेक्टरया जिम्मेकारी कयागु अले अबलय् ततःधंपिं द्यःखुँत पाखें अमूल्य प्राचीन मूर्तित बचेयायेत चां चां हे लाजिम्पाटया बामन अवतारया मूर्ति ल्ह्ययाः राष्ट्रिय संग्रहालय तयेहयागु प्रसंग लुमंकादिल । लिसें सुनांनं वय्कःयागु शताब्दी पुरुष धइगु उपाधिइ इख तयाः वय्कःया बेइज्जत यायेगु नियतं लेख च्वयाहःसां थम्हं उकियात सकारात्मक कथं कयागु खँ नं कनादिल ।

किपाः रेखा शाक्य

ज्याझ्वलय् प्रदेश नं ३या सांसद राजेश शाक्यं थनया नेवाःत थः विभिन्न कथं सुसंस्कृत व सम्पन्न जूगुलिं थन अज्याःगु सुन्दर व बहुमुल्य कृतित दयेकाथिके फूगु खँ धासें व गबलें विश्व सम्पदाया धलखय् लाइ वा मलाइ धकाः बिचाः यानाः दयेक्रूगु मखु धकाः धयादिल ।

किपाः रेखा शाक्य

पुरातत्व विभागया उपमहानिर्देशन दामोदर गौतमं नेपाःया हे थज्याःगु अद्वितीया सम्पदाया धनी काठमाडौं जूगुलिं थुकिया विकास यायेबलय् संस्कृति व सम्पदाया बांलाका बिचाः यायेमाः धयादिल ।

किपाः रेखा शाक्य

हनुमानढोका संग्रहालय विकास समितिया कार्यकारी निर्देशक अरुणा नकर्मीं नेपाःया हे छगू महत्वपूर्ण नखः इन्द्र जात्रा जूगु व थ्वलिसे तःगु किंबदन्तीत स्वानाच्वंगुलिं थुकिया विविध पक्षयात कयाः ब्वज्या यानागु खँ कनादिल ।

 

किपाः रेखा शाक्य

Leave a Reply

Your email address will not be published. Required fields are marked *