fbpx

पचली भैरवया गुथि जग्गाय् स्कुलं भवन दयेकूगुया विरोधय् मुँज्या

झीगु संवाददाता
येँ, दिल्लागाः तृतिया । येँ महानगरपालिका वडा नं १२ दुने लाःगु टेकु पचली भैरबया द्यःगः लिक्क व हे द्यःगःलिसे सम्बन्धित पुखू दयेमाःगु जग्गाय् अनया छगू स्कुलं कयाः अनुमति हे मकासे बिल्डिङ दयेकेत्यंगु खँय् स्थानीयबासी विरोधय् छपँ जूगु दु ।

क्वःने लागाया नेवाःतय्सं दकलय् हनाबना तयातःम्ह पचली भैरबलिसे स्वापू दूगु करिब १२ आनाया जग्गा आः सडक विभागं कयातःगु जग्गा व पुलांगु महानगरपालिका न्ह्यःने जगन्नाथ द्यःगःया लिक्क लाःगु श्री महेन्द्र सरस्वती सेवा आधारभूत विद्यालय नांगु स्कुलं सुयाकें अनुमति मकासे पक्की भवन दयेकेत ज्या शुरु यायेवं स्थानीयबासी चासो क्यंगु खः ।

किपाः रेखा शाक्य

वंगु छवाः न्ह्यः उगु थासय् छेँ दयेकेत शुरु यायेवं अले सम्बन्धित गुथियारयत्सं अन अथे मययोत धाःवनेवं स्कुलपक्षं प्रशासनयात हे धम्की क्यना हयेवं जनदबाव बिइत संगठित जुइमालाः थौं गुथिया हे ग्वसालय् स्थानीय मनूतय्गु छगू मुँज्या च्वन । उगु मुँज्याय् गुथियारत, स्थानीय मनूत अले सम्पदा संरक्षण अभियन्तातय्गु नं उपस्थिति जूगु खः ।

किपाः रेखा शाक्य

गुथिया गुथियार द्यःसिं महर्जनं व स्कुलं काःगु जग्गा पचली भैरवयालिसे स्वापू दगु पुखू जूगुलिं उकिया संरक्षण याये तसकं आवश्यक धयादिल । व जग्गा ध्इगु जग्गा हे मखु । अन छगू पुखू दूगु खः । व पुखू लिपा सुनावन । अले स्कुल चलेयानाच्वंपिन्सं उमिमस्त म्हितेत थाय् माल धाःगुलिं त्वःतातयागु खः तर अन अन व थाय् कायेत तःकः हे कुतः जूगु दु । जिमिसं सु सु लिसे जक ल्वायेगु? झीगु गुथि धइगु हे मदयेकीन थ्व सरकारं, वय्कलं धयादिल ।

किपाः रेखा शाक्य

वय्कलं उगु जग्गा संरक्षण यायेत मेयर विद्यासुन्दर शाक्ययात नापलानाः धयां हे संरक्षण यायेगु खँ मल्हासे उकिया आयस्ता मालाः उलि हे आयस्ता मालाबिइ तर व जग्गा आः छेँ दनेत वःपिन्त बिउ धकाः रहस्यमय खँ ल्हाःगुलिं मेयर स्वयम हे व जग्गा नयेत वयाच्वंपिं भूमाफियालिसे मिलेजूगु खने दु धकाः नं वय्कलं धयादिल ।

अथे हे गुथियारत मध्ये छम्हस्या काय् महेन्द्र महर्जनं व जग्गा गुथियागु हे जूगुलिं गुथिया हे कायम जुयाच्वनेमाःगु अले उकिया निंतिं गुथियारत स्थानीय जनताया साथ कयाः ल्वानाः लित हे कयावनेत प्रतिबद्ध जुयाच्वनागु कनादिल ।

किपाः रेखा शाक्य

वय्कलं उगु जग्गा गुथियागु हे खःसां स्कुलया मस्तय्त म्हितेत माः धाःगुलिं बियातयागु खःसां अन पटक पटक छेँ दनाः आम्दानी उठेयायेगु कुतः जूगुलिं आः व जग्गा खुला हे जु्रइमाःगु अले पुखूया हे रुपय् संरक्षण यायेगु खँ कनादिल ।

किपाः रेखा शाक्य

कालिमाटीया स्थानीय बासिन्दा रवीन्द्र मानन्धरं अज्याःगु सार्वजनिक जग्गा स्कुलं हडपेयायेगु कुतःयात धाःसा जनता स्कुलविरुद्ध हे मुद्धा तयेत तयार जुइमाःगु धयादिल ।

किपाः रेखा शाक्य

स्थानीय सम्पदा अभियन्ता गणपतिलाल श्रेष्ठं सरकारं क्रमिक रुपं हे स्थानीय आदिबासी नेवाःतय्गु भाषा, सडकय् अतिक्रमण यायेधुंकाः नियोजित ढंगं हे गन गन गुथिया जग्गा दु अन अन छुं न छुं बहाना दयेकाः जनताया जग्गा लाकाकायेगु स्वयाच्वंगु जुयाः थुकिया विरुद्ध जनता दनेमाःगु खँ कनादिल ।

 

अथे हे मेम्ह अभियन्ता विद्या श्रेष्ठं दक्व दक्वस्या नां विद्या जुयाः नं विद्या मदुपिन्सं थें ज्या यानाच्वंगु जुयाः आः जनताया जग्गाय् सरकारया गुगुं कथं हस्तक्षेप वयेके मजिउगु खँ कँसें जनता संगठित जुयाः जनताया जग्गा सुरक्षित यायेत सतकय् वयेमाःगु खँ कनादिल ।

किपाः राजेन मानन्धर

स्थानीयबासीत मुँज्या धु्ंकाः स्कुलया परिसरय् वनाः स्वःवंबलय् भवन दयेकेमाः धइगु पक्षय् च्वंपिं मनुत लिसे सामान्य वादविवाद नं जुल । उमिसं व भवन मदयेकूसा गुथियारपिन्सं मियाः नइगु व उकियालागि कित्ताकाट यानाः लालपूर्जा तकं कयातयेधुंकूगु आरोप नं बियादिल ।

किपाः रेखा शाक्य

 

Leave a Reply

Your email address will not be published. Required fields are marked *