fbpx

नेवाःतय्गु गुथि विधेयक विरुद्धया आन्दोलनय् जनजातितय्गु ऐक्यबद्धता

झीगु संवाददाता
दिल्लाथ्वः तृतिया । नेपाःया थी थी जातीय खलःपुचःया प्रतिनिधिपिन्सं थौं शुक्रबार येँय् नेवाःतय्सं यानाच्वंगु गुथि विधेयकया विरुद्धया आन्दोलनय् समर्थन व ऐक्यबद्धता क्यन ।

थौ अन जूगु ऐक्यबद्धता व खबरदारी सभाय् थारु, राइ, मगर व मेमेगु संस्थाया नेतापिन्सं नेवाःतय्सं याःगु आन्दोलन जायज खः धासें उमिसं नं थुकिइ समर्थन बियागु खँ कन ।

उमिसं नेवाःतय्गु थ्व तःजिगु जात्रापर्व व मेमेगु संस्कृतियात द्वलंद्वःदँ म्वाकातयेत थनया गुथिं भूमिका म्हितूगु लुमंकुसें सरकारयात स्वनिगःया गुथि व स्वनिगःपिनेया गुथियात छगः हे दालाय् तयाः मस्वयेत इनाप नं यात ।

उमिसं नं नेवाःतय्गु आन्दोलन खनाः ग्यानाः सरकारं व विधेयक लित ला काल तर उकियात पूर्णरुपं खारेज हे मयाःतले नेवाःतय्सं थःगु आन्दोलन दिकेमजिउगु सुझाव नं बिल ।

तर अन जनजातितय्गु ऐक्यवद्धता धयातःसां अन गैर नेवाःतय्गु उपस्थिति धाःसा खने मदु । वक्ताया रुपय् नवायेत जक थी थी जातीय संगठनया नायःत वयाः नवाना वंगु खनाः कन्हय् सतकय् वयेमालकि अथवा सरकारयात दबाव बिइमालकि व हे संस्थां गुलि मनूतय्गु समर्थन ज्वनाः सतकय् वइ धइगु न्ह्यसः दूगु अन उपस्थित सहभागीपिन्सं तःगु दु ।

आः जुयाच्वंगु गुथि विधेयक विरुद्धया आन्दोलनय् नेवाःत बाहेक मेपिं खनेदयेक कुहाँ वयाच्वंगु मदुनि अले मेमेगु जातीया खलः पुचलं ऐक्यबद्धता क्यनेकथंया अज्याःगु ज्याझ्वः तःगु नं खनेमदुनि धइगु नं उमिगु धापू दु ।

Leave a Reply

Your email address will not be published. Required fields are marked *