fbpx

नेवाःमिसा दबूया अधिकार प्रशिक्षण तालिम क्वचाल

झीगु संवाददाता
येँ, तछलागा षष्ठी । नेवाः मिसातय्गु संगठन नेवाः मिसा दबूया प्रदेश नं ३ या समिति दयेकाः थौं आदिवासी अधिकार व मिसा दबू बारे प्रशिक्षण समापन जुल ।

किपाः रेखा शाक्य

थौ आइतबार जूगु समापन ज्याझ्वलय् येँ महानगरपालिकाया उपमेयर हरिप्रभा खड्गी श्रेष्ठं तालिम सम्पन्न यानादीपिं ११गू जिल्लाया सहभागीपिन्त दसिपौ इनादिल ।

किपाः रेखा शाक्य

थौंया ज्याझ्वलय् नवासें उपमेयर हरिप्रभा खड्गी श्रेष्ठं आःया सरकारं हयाच्वंगु विवादास्पद गुथि विधेयक वस्तुतः नेवाःतय्गु गुथिया आधार जुयाच्वंगु जग्गा हडपेयाना कायेत हे खः धासें नेवाःतय्गु धर्म, संस्कृति व जात्रा पर्व ल्यंकेत उकियात खारेज हे याकेमाः धयादिल । अथे हे नेवाःतय्गु पहिचान व सांस्कृति धरोहर ल्यंकेत नेवाःत दक्व राजनीतिक विचार व पार्टीया ह्वीप त्वःताः हे विधेयकया विरोधय् वयेमाः धयादिल ।

किपाः रेखा शाक्य

उकियालिसें वय्कलं विशेष यानाः नेवाः मिस्त राजनीतिक ख्यलय् लिउने लानाच्वंगुलिं न्ह्यःने वयाः दबाव सिर्जना यानाः हे थःगु थाय् सुनिश्चित यायेत नं इनाप यानादिल ।

दबूया सल्लाहकार डा. चुन्दा वज्राचार्यं सरकारं झिदँ न्ह्यः अबलय्या सरकारं येँयाःलय् हस्तक्षेप यायेवं वःगु विवाद ज्यंकेत याःगु अध्ययनं हे गुथिया जग्गा गुथियारतय्त हे लित बिइमाःगु सुझाव सरकारयात बिल नं उकियात बेवास्ता यानाः गुथिया नामय् जनतां तयातःगु जग्गा दुकायेत हे थ्व विवादास्पद गुथि विधेयक हःगु धासें उकियात दक्व छपँ जुयाः हे विरोध यायेमाःगु खँ तयादिल ।

किपाः रेखा शाक्य

अथे हे मेम्ह सल्लाहकार राज्य लक्ष्मी श्रेष्ठं गुथि विधेयक धैगु नेपाःया हे धर्म व संस्कृतिया विपरित जूगुलिं खारेज यायेमाः धयादिल ।

नेवाः देय् दबूया महासचिव माइला बाबु द्यःलां नेवाःत थी थी थासय् विभाजित जुयाच्वंगुलिं लिउने लाःगु धासें दक्वसित संगठित जुइत आग्रह यानादिल ।

दबूया केन्द्रिय नायः रश्मिला प्रजापतिं नेवाःत थः सम्पन्न व शिक्षित जुयाः नं राजनीतिक रुपं सबल मजुयाः राज्यय् तक पहुँच कायेमफयाच्वंगुलिं आः थःत सबल दयेकाः संगठित दयेकाः राज्यया हरेक अंगय् उकथं हे थःगु हक दाबी यायांन्ह्याःवनेमाःगु खँ कनादिल ।

किपाः रेखा शाक्य

थौ गठन जूगु नेवाः मिसा दबूया प्रदेश ३या समितिइ इन्चार्ज कस्तुरी श्रेष्ठ, सहइन्चार्ज विणा महर्जन, छ्यान्जे अनुला महर्जन जोशी, ल्यू छ्यान्जे जीवन वज्राचार्य व दांभरिं निरु सुवाल ल्यःगु दु । अथे हे पदाधिकारीपिं शोभा उलक (सिन्धुपाल्चोक), राममाया श्रेष्ठ (धादिङ), सुनिला प्रधान (दोलखा), सुषमा श्रेष्ठ (चितवन), रोजिना (काठमाडौं), लक्ष्मी केशरी प्रजापति, (भक्तपुर), राजेश्वरी श्रेष्ठ (रामेछाप), बालकुमारी श्रेष्ठ (सिन्धुली), निलम श्रेष्ठ (काभ्रे) नं ल्यःगु दु ।

किपाः रेखा शाक्य
किपाः रेखा शाक्य
किपाः रेखा शाक्य

Leave a Reply

Your email address will not be published. Required fields are marked *