fbpx

थिमिइ नेपालभाषा र संस्कृति ख्यलय् ज्या यानाच्वंपिन्त सम्मान व सिरपाः

झीगु संवाददाता
थिमि, तछलागा पञ्चमि । नेपालभाषा व संस्कृति ख्यलय् थी थी योगदान यानावयाच्वंपिं व्यक्तित्वतय्त थौं थन सम्मान व सिरपाः बिइगु ज्या जूगु दु ।

दबुलि नेपालं छगू ज्याझ्वलय् साहित्य ख्यलय् तिलक प्रकाश कायष्ठयात, सम्पदा ख्यलय् कृष्णलाल ग्वःजायात, संगीत ख्यलय् वीर प्रसाद भंसारीयात, लिपि अभिलेख ख्यलय् शरद वीर कंसाकारयात व ल्वहं मुर्ति ख्यलय् चन्द्रमाया वज्राचार्ययात सिरपाः बिउगु खः । वय्कःपिन्त शताब्दी पुरुष सत्यमोहन जोशीं हनापौ लःल्हानादिल ।

किपाः रेखा शाक्य

 

किपाः रेखा शाक्य

लिसें न्हूपुस्ताया प्रतिभायात कदर यासें लिपि च्वज्याय् बिकी वज्राचार्य व मुहालि पुइगु ज्याय् रोशिका जधारीयात सम्मान नं यात । अथेहे आयोजक दबुलि नेपालं उगु हे ज्याझ्वलय् सत्यमोहन जोशीयात सम्मान नं यात ।

किपाः रेखा शाक्य

 

किपाः रेखा शाक्य

ज्याझ्वलय् नवासें सत्यमोहन जोशीं नेवाःत क्रमिक रुपं थःगु भाय् त्वःतानाच्वंगु तथ्य न्ह्यब्वसें यदि झीगु भाय् मन्त धाःसा धर्म, संस्कृति छुं हे दुसां झीगु पहिचान ल्यनामच्वनीगु खँ कनादिल ।

थिमि नगरपालिकाया मेयर मदन सुन्दर श्रेष्ठं थःगु नगरपालिकां कला संस्कृतिया संरक्षणय् यानाच्वंगु ज्याया विवरण बिसें आः नकतिनि सरकारं हःगु गुथि विधेयकं नेवाःतय्गु धर्म व संस्कृति नितां हे मदयेकीगु जुयाः उकिया विरोधय् दक्व दनेमाःगु खँ कनादिल ।

अथे हे नेवाःगुथि सेन्टर कमिटीया नायाः पवित्र वज्राचार्यं गुथि विधेयकयात सम्पूर्ण नेवाःत थःगु राजनीतिक पूर्वाग्रह छखे तयाः छधी छपँ जुयाः खारेज हे याकेमाःगु खँय् जोड बियादिल ।ज्याझ्लय् दछि न्ह्यः आयोजक संस्थाया ग्वसालय् लछियंक भारतया थी थी राज्ययापिं नेवाःतय्त नेवाः भाय्, संस्कृति व संस्कारया प्रशिक्षण बिउगु बारे विवरण दूगु स्मारिकाया उलेज्या नं सकल पाहाँपिं पाखे जुल । अले प्रशिक्षणया झ्वलय् प्रशिक्षार्थीपिन्सं अभियनय याःगु पहिचान नांगु छगू वृत्तचित्रया नं क्यनेज्या जुल ।

किपाः रेखा शाक्य

अथे हे रोशिका जधारीं अन मुहालि पुयाः प्रस्तुति नं यानादिल ।

किपाः रेखा शाक्य
किपाः रेखा शाक्य
किपाः रेखा शाक्य
किपाः रेखा शाक्य
किपाः रेखा शाक्य
किपाः रेखा शाक्य

Leave a Reply

Your email address will not be published. Required fields are marked *