fbpx

सरकारं हःगु गुथि विधेयक विरुद्ध नेवाःतय्गु जनसागर

झीगु संवाददाता

येँ, तछलागाः दुतिया । नेवाःतय्गु गुथिलिसे प्यपुनातःगु जग्गा थःगु यानाकायेत अले नेवाःतय्त उमिगु द्यःगः, बहाः व जात्रा पर्वपाखें पितना छ्वयेत नेकपाया सरकारं हःगु गुथि विधेयकया विरुद्ध नेवाःत छसः जुयाः थौं फिब्वख्यः (माइतिघर)या जःखः मुन ।

उलिमछि जनतापाखें विरोध जुल नं सोमबार सनिलय् भूमि व्यवस्था, सहकारी तथा गरिबी निवारण मन्त्री पद्मा अर्यालं जनमतयात भचा हे कदर मयासे हानं जनतां भ्रम सिर्जना याःगु वा वातावरण स्यंकूगु द्वपं बिसें लितकया धकाः दर्ता मिति तकं मदुगु अले सही व छाप नं मदूगु प्रेस विज्ञप्ति पिकयाः जनतायात ध्वंलायेगु कुतःयात, अले व हे खनाः जनता झं तंचाःगु खनेदत ।

किपाः रेखा शाक्य

न्हिनय् ११ बजे स्वयाः न्ह्यःनिसें हे बानेश्वरं ख्वप लागायापिं, थापाथलिं यल व किपू लागायापिं अले सिंहदरवारं येँ लागायापिं नेवाःत छकलं फिब्वःख्यःया जःखः मुनेवं अन यातायात सञ्चालन जुइगु संभावना मन्त । येँया पुचः थी थी पुचः जुयाः थ्यन सा यलया पुचः थापाथलीनिसें फिब्वय्तक छस्वा जुल सा ख्वप व थिमिया पुचः बबरमहलनिसें फिब्वतक छस्वा जुल ।

किपाः रेखा शाक्य

थी थी न्हूगु व पुलांगु संस्थांया आह्वानय् गुथियारत, पुजारीत व म्हय्त न्हापं थःगु हे इच्छां वयाः मुंगु उगु खबरदबारी प्रदर्शनयात स्वनिगलय् नेवाःत नेवाःराज्यया घोषणा सभा धकाः रंगशालाय् मुंगु प्रदर्शन स्वयाः लिपाया तःधंगु धकाः धायेगु अवस्था वल । तःधंगु मिडियां तकं थुकियात जनआन्दोलन लुमंकीगु मुना व जनसागर धकाः धाःगु दु ।

किपाः रेखा शाक्य

उमिसं लँ धुछि अले ख्यलय् थ्यंकाः नं गुथि विधेयक खारेज या, लितकाःगु धाःगु धोखा खः, नेवाःतय्गु अवमूल्यन याइगु विज्ञप्ति पितबिउम्ह मन्त्रीनं माफी फ्वँ धकाः माग यात । अथे हे नेवाःतय्गु मर्म मथुइक नेवाःतय्त उत्तेजित जुइकथंया अभिव्यक्ति बिउपिं प्रधानमन्त्री केपि ओली, गृहमन्त्री रामबहादुर थापा, सञ्चारमन्त्री गोकुल बाँस्कोटा व भूमि व्यवस्था मन्त्री पद्मा अर्यालंया राजीनामा नं फ्वन ।

किपाः रेखा शाक्य

उमिसं नेवाःतय्गु पहिचान धइगु हे गुथि खः, गुथियात मसिइकं मथुइकं संकेदइमखु, गुथि धइगु जग्गा जक मखु, गुथिया जग्गाय् मिखातयेमते धकाः न मागयात । अथे हे गुथिया विधेयकया पूर्ण खारेजी अले हानं गुगुं कथं मेबलय् मेगु रुपय् नं गुथियात कयाः कानून हइमखु धइगु विश्वस्त मजूतले आन्दोलन दिइमखु धकाः नं हाथ्याबिल ।

किपाः रेखा शाक्य

आयोजक धकाः थी थी संस्थाया ग्वसालय् जूगु छगू सभाय् नेवाः देय् दबूया नायः, न्हूगु दर्ता जूगु नेपालभाषा मंकाः खलःया नायः दुर्गालाल श्रेष्ठ, अधिवक्ता शंकर लिम्बुयालिसें युवा अभियन्तात सुमन सायमी, सुदय शिलाकार, गणपतिलाल श्रेष्ठ, अनिष बैध व मेमेपिन्सं सम्बोधन यात । उमिसं आन्दोलन न्ह्याना हे वनीगु धकाः विश्वास बिउगु दु ।

किपाः रेखा शाक्य

प्रदर्शनया झ्वलय् ममेगु व्यवस्था बां हे लाःगु, केन्द्रीय मानन्धर संघ व ज्यापु समाज लगायतया संस्थां बोटल व जारया लः त्वनेगु व्यवस्था याःगु दुसा स्वयंसेवकपिन्सं मनूतय्सं त्वंगु लःया बोटलत मुंकाः छखे तयाच्वंगु खः । गुलिखे नेवाःतय्गु लःगुथियापिन्सं उकुन्हु नेवाःतय्त लःया फोहरां छ्वाकूपिं प्रहरीतय्त तकं लःत्वंका क्र्ररताया लिसः करुणा क्यनाः बिल ।

किपाः रेखा शाक्य

थ्व आन्दोलनय् वःपिन्सं थुलिमछि मनूत थ्व गुथि धइगु थःगु अस्तित्व धकाः मुंगु अले छगू संस्था वा सुं व्यक्ति विशेषं यानाः कुहाँ वःगु मखु धासें थुकिया लबः कायेथें ख्वाः ब्वयेत दबुलिइ जक च्वंवयेगु नेवाः नेतातय्गु पुलांगु मानसिकता हिलेमाःगु धइगु विचार नं प्वंकूगु खनेदत ।

This slideshow requires JavaScript.

Leave a Reply

Your email address will not be published. Required fields are marked *