fbpx

वज्राचार्यपिन्सं नं यात गुथि विधेयकया विरोध

झीगु संवाददाता
येँ, ज्याःपुन्हि । नेवाःतय्गु जीवन व सभ्यतालिसे स्वानाच्वंगु गुथि विधेयक हयेवं स्वनिगःया अल्याख बौद्ध सम्पदा व परम्पराया नाश जुइधगु धासें येँया वज्राचार्य संगठनतय्सं थुकिया खारेजी नितिं सकल वज्राचार्यत छपँ जुयाः विरोध यायेमागु खँ न्ह्यःने हःगु दु ।

येँया छुस्या बहालय् जूगु छगू वज्राचार्यपिनिगु भेलाय् उमिसं थुगु विधेयकया सशक्त कथं विरोधय यायेमाःगु व न्ह्यागु हालतय् नं खारेज हे याकेमाःगु खँ तःगु दु ।

किपाः रेखा शाक्य

राजगुरुजु मञ्जुश्री वज्राचार्यं उक्त विधेयक पारित जुल धाःसा थन सलंसःदँ न्ह्यःनिसें वज्राचार्यपिनिगु संरक्षणय् दयाच्वंगु बौद्ध बहाः बहि व मेमेगु द्यःगःत नं मदयावनी अले दँय्दसं न्ह्यानाच्वंगु दक्व जात्रा पर्वत न्हनावनीगु खँ कनादिल ।

संघरत्न शाक्यं थ्व गुथि विधेयक धइगु नेवाःतय्गु सभ्यता व संस्कृतिइ हमला हे यायेत वःगुलिं थुकियात सशक्त ढंगं विरोध यायेमाःगु खँ धयादिल ।

किपाः रेखा शाक्य

सागरमान वज्र्राचार्यं नेवाःत दक्व छपँ जुइमाःगु व दक्व मिलेजुयाः थ्व विधेयकयात खारेज यायेमाःगु धासें नेवाः सभ्यता मसिउपिं चौधरीतय्सं झीत थथे संसदय् लाथेपाथे धायेकाः नं नेवाः सांसदत सुम्क च्वनाच्वंगुया नं विरोध यानादिल ।

ज्याझ्वलय् सकारकारया नेतृत्व यानाच्वंगु नेकपायापाखें प्रदेश सांसद डा. अजयक्रान्ति शाक्यं प्रधान मन्त्री केपी ओली स्वयम् हे नेवाःविरोधी मखुगु अले प्रशाशनं यानाः जक अज्याःगु विधेयक तयार जूगु खँ धयादिल ।

अथे हे मेम्ह नेकपाया प्रदेश सांसद राजेश शाक्यं नेवाःत राजनीतिक रुपं सक्रिय मजूगुलिं हे थज्याःगु अवस्था वःगु धकाः थःगु खँ तयादिल ।

अले नेका सांसद भिमसेनदास प्रधानं झी नेवाःत छकः जक सांसद जुइगु तर न्ह्याबलें नेवाःतय्गु दथुइ हे म्वानाच्वनेमाःगुलिं थज्याःथाय् दक्वं जानाः सरकारया थ्व गुथि विधेयक खारेज यायेत न्ह्यचिलेमाःगु खँ कनादिल ।

किपाः रेखा शाक्य

प्रा. डा. नरेश मान वज्राचार्यं देसय् उलिमछि गुथि विधेयक धकाः विरोध जुयाच्वंबलय् नं येँया बौद्ध संघसंस्था व बहाः बहिया प्रतिनिधित जुयाच्वंपिं वज्राचार्यतय्सं थ्व विषयय् खँ तःगु खनेमदुगुलिं थुकिइ स्पष्ट यायेत व वज्राचार्यपिनिगु मंकाः धारणा संसदपिन्त कनेत थ्व ज्याझ्वः तयागु धयादिल ।

Leave a Reply

Your email address will not be published. Required fields are marked *