fbpx

जिं दक्व तिसा पार्टीयात बिया : अष्टलक्ष्मी शाक्य

अष्टलक्ष्मी शाक्य

नेकपा –मालेया कामरेडपिंलिसे नापलायेगु जुइवं पार्टीइ आर्थिक समस्या दु धइगु जिं थुल । थबलय् पार्टीया आः थें व्यापक सम्पर्क जुइगु खँ मजुल । कार्यकर्ताया दुखकष्ट ला खँ ल्हानां मब्याः । पार्टीयात मदयेक मगाःगु खर्चबर्च तकं मुंकेत तसकं थाकु ।

जिं छेँ त्वःतावयाबलय् थःके छुंभचा तिसा, लुँ व हिराया टप, लुँचुरात, अंगूत, लुँसिखः व लकेट व मेमेमगु दूगु खः । व तिसा मध्ये गुलिं जिं न्हापा हे सुचुकातयागु खः । गुगुं भ्वय् वनेमाल धकाः मांयाके कयागु खः । जिं न्हापालिपा गबलें तिसां मतिया । जिं कम्युनिष्ट विचार थुयावःलिसे सरल जीवन व उच्च विचार कयाजुइमाः धकाः मति तयेगु ।

अले जि भूमिगत जुयाः ज्या याइम्ह मनूयात छाय् तिसा माल ? उकिं पार्टीयात ज्या वइ धकाः क. श्याम मार्फत पार्टीयात बुझेयाना । वयां लिपा जिं सिल, जिं बियागु तिसा दक्व मियाः भूमिगत प्रेस स्थापना यायेत अप्वः ग्वाहालि जुल खनी । थ्व खँ न्यनाः जि तसकं लय्ताल ।

जिं छेँ त्वःतेवं छेँय् मेगु संकट वल

जिं छेँ त्वःतेवं मां बाःया दथुइ तसकं ल्वापु जुल खनी । तारातता व केहेँ नारायण देवी बाहेक प्यम्हं केहेँपिन्सं छेँ त्वःताः थःथःगु लँय् वन खनी । नारायण देवीया तेबहालय् च्वंम्ह गोविन्द डंगोल लिसे इहिपा जुइधुंकल । जिं छेँनं पिहाँ वनेवं जिलिसेया तं दक्व जिमि केहेँपिन्त प्वंकल । मां बाः व दाजुं दाःगु सहयायेमफयाः केहेँ पिन्सं नं छेँ त्वःताः वन । बुद्धलक्ष्मी अमेरिका वन, पूर्णलक्ष्मी वया पासा अञ्जु व रञ्जुया ग्वहालि कयाः ग्याग्यां याकःचा दिल्ली वन ।

अनितां वया यःम्ह मिजं सुनिललिसे इहिपा यात अले केहेँ सुनितां नर्स ब्वनेत नेपालगंज वन धइगु खबर वल । बाःनं म्ह्याय्पिन्त छेँनं पितिन धकाः मांयात न्ह्याबलें ब्वह बिइगु व दाइगु यात । दाइ व बाःया दथुइ नं तःधंगु हे ल्वापु जुल । जःलाखःलां नं धायेगु यात, “नाइ(जिगु छेँय् सःतेगु नां) ला भिंम्ह ज्ञानीम्ह अले भ्वासिचाःम्ह नं मखु, सरल मनू । सुंलिसे वंगु ला पक्का हे खइमखु, गन वन जुइ ?” धकाः मालेगु यात ।

दाइनं बालसेवा विद्यालयया हेडसर कृष्णभक्त मानन्धरयात छेँय् सःताः पुलिसं केरकार यायेथें केरकार यायेगु, शंकाया मिखां स्वयेगु, थुमिसं हे केहेँयात सुचुकातःगु दइ धकाः न्यनेकनेयात । तर बालसेवा विद्यालयया शिक्षकपिन्त जिगु बारे छुं हे खँ सिइकेमबिया जिं । कृष्णभक्त सर व सावित्री मिस ला जिलिसे तसकं सतिइ, उमित नं छेँ त्वःतेगु खँ धयामतया जिं । उकिं ला वय्कःपिं अजूचायाच्वन ।

तर उमिसं धाःगु दाइनं भ्याः हे पत्याः मयाः उकिं तःन्हु तक दुख बिइगु व केरकार यायेगु यानाच्वन । ब्वनेकुथिइ लेखाया ज्या याइम्ह दु शारदा कोइराला । बिचाः ज्वःलाःम्ह पासा खः व । छेँय् वयाच्वनीम्ह जुयाः दाइ व मांयापाखें वं बांमलाक्क ब्वह नयेमाल ।

च्वमिया सफू“मेरो पाइला मेरो अनुभव”पाखें । भाय् हिउम्ह ः राजेन मानन्धर

One thought on “जिं दक्व तिसा पार्टीयात बिया : अष्टलक्ष्मी शाक्य

  • June 18, 2019 at 12:33 am
    Permalink

    खुब बाँह्लाउ ज्या यातका बर्ह्मु च्योनि न ……. थुक्क !!

    Reply

Leave a Reply

Your email address will not be published. Required fields are marked *