fbpx

गुथि विधेयकया खारेजीया माग यासें यलय् जनसागर

झीगु संवाददाता ।
यल, तछलागा दसमि । नेवाःतय्गु संस्कृतिया ईल्वहं जुयाच्वंगु गुथि व्यवस्था धराशायी यायेत सरकारं हःगु गुथि विधयेयकया विरुद्ध यलय् थौं जनसागर मुन । गुथि विधेयक खारेजी यायेत माग यासें सहभागीत यलया छगू लागाय् नाराबाजीया जुलुस यानाः हानं मंगलबजारय् हे आमसभा यात ।

किपाः रेखा शाक्य

यलया लिसें, ख्वना, बुंग, थेचो, लुभु आदि अले येँ व ख्वपया तकं द्वलंद्वः संस्कृति व गुथिप्रेमी जनताया सहभागिता दूगु उगु र्यालि प्रदेश सभा सांसद शोभा शाक्य, ज्यापु समाजया नायः चन्द्र महर्जन, ताम्राकार समाजया नायः रविन्द्र ताम्रकार व मेमेपिनिगु नेतृत्वय् न्ह्याःगु खः ।

किपाः रेखा शाक्य

आमसभाय् नवासें नेवाः देय् दबूया नायः नरेश ताम्रकारं नेवाःतय्गु आन्दोलनया लहर खनेवं सरकार ग्याःगु व आः हे वार्तायानाः न्ह्याःवनेगु धइगु सन्देश वयाच्वंगु धासें थ्व विधेयक खारेज मजूतले सुनं वार्ता वनीमखु धयादिल ।

किपाः रेखा शाक्य
किपाः रेखा शाक्य

जनताया पहिचान जुयाच्वंगु गुथि व उकिया आयस्ता सरकारयात बुझेयायेगु धइगु हे नेवाःत पतन जुयावनीगु खँ जुइ धकाः नं वय्कलं स्पष्ट यानादिल ।

आदिवासी जनजाती वकिलतय्गु संगठन लाहुर्निपया सचिव शंकर लिम्बुं सरकारं थ्व विधेयक हयाः स्वनिगःया जग्गाया कानूनी डकैती यायेत्यंगु आरोप बियादिल ।

किपाः रेखा शाक्य

वय्कलं नेवाःत आन्दोलन जूगु खनाः वार्ता याःवा धयाच्वन तर आः जनता सरकारया थाय् वनेगु मखु, सरकारया मन्त्रीत जनतयाथाय् वयाः खँ ल्हाःवयेमाः धयादिल । थ्व विधेयक संविधानया हे मर्म विपरित जूगुलिं थुकियात खारेज यायेगु बाहेक मेगु विकल्प मदु धइगु नं वय्कःया धापु जुल ।

किपाः रेखा शाक्य

वय्कलं सरकारय् च्वंपिन्त यदि उमित स्वनिगःया गुथिया जग्गाय् लोभ हे दूगु खःसा गं थनाः म्हय् नौ बुलाः जोगी जुयाः वःसा बियाबिइ धकाः नं धयादिल ।

ज्यापु समाज यलया नायः चन्द्र महर्जनं थ्व गुथि धइगु जग्गा जक मखसे नेवाःतय्गु दक्व जात्रा पर्व व संस्कृतिलिसे हे स्वाःगुलिं थ्व यदि मन्त धाःसा नेवाःतय्गु छुं नं जात्रा मल्यनीगु जुयाः नेवाःत इलय् हे सचेत जुइत इनाप यानादिल । उकियालिसें थ्व गुथि विधेयक हयाः सरकारं नेवाःतय्त छधी छपँ यायेत ग्वहालि जुइकथं या ज्या नं याःगुलिं आः थुकिया हे बलय् सां दक्व नेवाःत संगठित जुयाः थःगु अस्तित्व ल्यंकेत ल्वायेमाःगु आवश्यकता नं कनादिल ।

किपाः रेखा शाक्य

अथेहे ललितपुर बौद्ध विहार संघया उपाध्यक्ष करुणा रत्न वज्राचार्यं सरकारं थ्व गुथि विधेयकया नामय् नेवाःतय्गु सभ्यता, संस्कृति व पहिचानय् हे हमला याःगुलिं थुकियात दक्व नेवाःत अझ संगठित जुयाः प्रतिकार यायेत इनाप यानादिल ।

किपाः रेखा शाक्य

थ्व हे झ्वलय् भूमि व्यवस्था सहकारी तथा गरिबी निवारण मन्त्रालयं छगू विज्ञप्ति पिकयाः जनभावनाया कदर यायेगु धकाः खँ हिइकूगु अले निम्ह प्यम्ह नेवाःत थःत नेवाःतय् नेता धकाः हे सरकारय् वनाः वार्ता याःवंगु हुइनाभुइना वयेवं स्थानीय मनूत क्रुद्ध जुयाः उकियात नेवाःतय्सं मानेमयाइगु धकाः आन्दोलनया आयोजकतय्सं धाःगु दु ।

किपाः रेखा शाक्य

स्वनिगलय् नेवाः सभ्यताया अस्तित्वय् हे थुभनं आक्रमण यातनं स्थानीय जनता थः हे स्वस्फुर्त रुपं विरोध यानाः प्रहरीया कसा नल नं नेवाःतय्गु भोटं चुनावय् त्यनावंपिं नेकपाया सांसदतय्सं आःतक थुकिया बारे छसः हे मतःनिगुयात स्थानीय मनूतय्सं अर्थपूर्ण तायेकाः उमित सामाजिक बहिष्कार यायेगु धकाः नं स्थानीयबासीतय्सं धयाहःगु दु ।

किपाः रेखा शाक्य

येँ व यलय् अपाय्जि आन्दोलन जुइधुंकाः नं ख्वपय् धाःसा जात्रा पर्व ल्यंकेत माःगु गुथि भूमिइ आक्रमण याइगु थ्व विधेयकया विरुद्धय् छुं नं कथंया विरोधया सः तायेमदुगु धइगु खेदया खँ धकाः नं धयाहःगु न्यनेदु ।

किपाः रेखा शाक्य
किपाः रेखा शाक्य

 

 

 

Leave a Reply

Your email address will not be published. Required fields are marked *