fbpx

स्थानीय जनतां स्वये हे मखंक सिधल बुंगद्यःया जात्रा

झीगु संवाददाता
यल, तछलागा सप्तमि । विशेष पाहाँपिन्त कडा सुरक्षा बिइगु नामय् जात्राय् वःपिन्त हे द्यःया न्ह्यःने वने मबिसे उमिउमि जक भ्वत क्यनाः थुगिसीया नेपालय् हे दकलय् तःहाकःगु जात्रा धयातःगु बुंगद्यःया जात्रा आइतबार क्वचाल ।

न्यँकँ बाखं कथं नेवाः समाजय् म्वानाच्वंगु भ्वत वा प्वाकलंया अस्त्वि न्ह्यब्वयेथें दछिया छकः अन आः गुथि संस्थानया स्वामित्व लानाच्वंगु उगु भ्वतयात अनया हे छम्ह प्रशासकं खःया प्यकुनय् दनाः क्यनेवं थुगसीया जात्रा सिधःगु जुइ ।

फाइल किपाः रेखा शाक्य

छगू इलय् छम्ह नागराजा थःगु ल्वय् लंकाबिउगु लसताय् छम्ह ज्यापुयात सिरपाः बिउगु उगु बहुमुल्य भ्वत तन अले उगु हे भ्वत छम्हस्यां फिनाः जात्रा स्वःवःगु अले उमि दथुइ ल्वापु जुइवं आः उगु भ्वत सुयागु धइगु क्वःमजिउतले बुंगद्यःया हे जिम्माय् धकाः तयाबिउगु जनविश्वास दु । अथे ला थ्व आः क्यनीगु भ्वत हे नक्कली अले सक्कलीगु भ्वत विदेशय् मियाछ्वयेधुंकल धकाः धाइपिं नं मदूगु मखु ।

फाइल किपाः रेखा शाक्य

थुगु बाखंया हे अंश जुयाच्वगु उगु भ्वत क्यनेवं जगत संसारया उद्धार यायेमाति धकाः बुद्ध मजुसे च्वंम्ह बोधिसत्व धकाः विश्वास यानातःम्ह करुणामय अथवा लोकनाथया लछि तःहाकःगु जात्रा क्वचाल ।

जात्रा क्वचायेवं द्यःयात उगु खतं क्वकयाः प्यम्हस्यां क्वबिइगु खतय् तयाः न्यासि हे वनाः बुंगय् यंकेगु चलन दु । थथे बुंगय् हइबलय् लँदुछि स्थनीय मनूतय्सं छ्वालि च्याकाः लसकुस याइ । बुंगद्यःया जात्राया थ्व अन्तिम दिनय् यलया जीवित देवी कुमारीया नं उपस्थित जुइ । तर भ्वत क्यंगु धाःसा यक्व स्थानीय मनूतय्सं हे स्वये मखंगु गुनासो यक्वसिगु दु ।

स्वीगू स्वयाः मल्याक्क गुथि व थी थी समुदायया मंकाः ज्यासना कथं खः तयार जुइ । दक्वसिगु सहभागितां खः साली, त्वाःत्वालय् पुजा जुइ, थःगु जीवनया छगू अंग कथं जात्रा हनी । तर अन्तिम दिनय् धाःसा राष्ट्रपतिया नामय् न्हिनय्निसें सवारी वंके मबिउगु जक मखु, मनूतयगु आवागमन हे बन्द यानाबिइवं जात्रा स्वःवःपिं अधिकांश मनूत जात्रा स्थल स्वया १०० मिटर तापाक्क हे च्वनाः द्यः दर्शन यानावनेमाल ।

उगु जात्रा स्वयेत अन राष्ट्रपतिया लिसें उपप्रधान तथा रक्षा मन्त्री ईश्वर पोखरेल व मेमेपिं मन्त्रीत, यलया मेयर व उपमेयर अले ललितपुरं त्यनावंपिं सांसदत नं उपस्थित जूगु खः ।

Leave a Reply

Your email address will not be published. Required fields are marked *