fbpx

हःखाया सर्गः क्वय् स्वयम्भुराजया स‌ंगीत

झीगु संवाददाता

यल, तछलाथ्वः षष्ठी । यक्व दत नेवाःतय्सं चकंगु सर्गः क्वय् नेवाः म्ये न्यनेमखंगु । थ्व हे कारणं जुइ हःखा त्वालय् शनिबार सनिलय् मन्ह्यं मन्ह्यं हे मनूत मुनाच्वंगु । दक्वस्या थःगु मांभाय्या सिर्जना त्वनेगु प्याःचाः दु । थ्व प्याःचा लंकेगु भाला ज्वनाः दबुलिइ दंझाल हःखाया हे पुलांम्ह गायक स्वयम्भुराज शाक्य ।

स्वंगू दशकतक नेवाःतय्गु म्हुतुइ म्हुतुइ घानाच्वंगु म्येत हःखाया सर्गः क्वय् शनिबारकुन्हु थ्वल । सार्वजनिक थासय् थथे नेवाः म्ये हाः हे मदयेधुंकल धइथेंज्याःगु वातावरणय् पुलांम्ह नेवाः म्ये हालामि स्वयम्भुराज शाक्यया सलय् जूगु सांगीतिक ज्याझ्वलं हानं व हे युगय् यंकूगु दु पुलांपिं व न्हूपिं न्यनामिपिन्त । अथे हे वय्कलं थःत यःगु धकाः माइतीघर नेपाली संकिपाःया छपू म्ये  प्रेमध्वज प्रधान व उषा मंगेशकरया सलं थ्वयाच्वंगु खय् भाय् या  ज्वः म्येयात संगीता शाक्यया साथ कयाः  नं न्यंका दिल ।

किपाः रेखा शाक्य

न्हापान्हापा नापं रसिक म्ये हालाः स्वकुमिपिन्त मनोरंजन यानादीम्ह वय्कःया पासा चन्द्रमान शाक्यया लिसे हालादिइगु निपुम्ये “वया ला छ थन माया मदुम्ह” व “जात्राया हुलय् द्यः स्वः वना ल्यासेपिं नाप लात ” विशेष यानाः वातावरणयात रंगीन व मनमोहक दयेकत ग्वाहालि यात । २५दँ लिपा जक निम्हं नापं दंवःपिं गुगुं ईया सेलेब्रेटी जोडीं न्हूपिं व पुलांपिं स्वकुमिपिन्त पुलांगु सवाःया न्हूगु रुप बियाः बिस्कं मनोरंजन यात ।

किपाः रेखा शाक्य

ज्याझ्वलय् वय्कलं हालादिइगु म्येलिसे नीशा देसारं सःबियाः ग्वहालि यानादिल सा वय्कःया संगीतय् तयारजूगु म्ये “छन्त जिं नाप ला वये घण्टाघरया क्वय्” म्येय् सुमन कपाली व नीशा देशारं हालाबिल । अथे हे न्हूगु पुस्ताया पाहाँ म्येहालामि कथं अनु शाक्य व प्रियंका शाक्यया छपु छपु खय् म्ये नं व दबुलिइ थ्वल ।

 

स्वंगू दशकनिसें नेवाः म्ये हालावयाच्वनादीम्ह शाक्यया आःतक न्यागू याकः एल्बम व स्वंगू याकः सांगीतिक ज्याझ्व नं मंचन जुइधुंकूगु दु । ‘ओ प्रिय लिफः स्वयाः, वरिष्ठ गायक स्वयम्भुराज शाक्य, सांगितिक सनिल नां बियातःगु थुगु ज्याझ्वः मंगल इन्टरटेनमेन्टं आयोजना याःगु खः ।

किपाः रेखा शाक्य

थज्याःगु उत्कृष्ट सांगीतिक ज्याझ्व ला टिकट कयाः बांलाःगु हलय् यायेमाःगु धइगु माग नं न्यनेदत धाःसा नेवाःतय्गु चलन हे लँय् दनाः दक्व नापं च्वनाः म्ये न्यनेगु जुगुलिं पुलांगु वातावरण लितः हःगु बांलाः धइगु प्रतिक्रिया नं न्यनेदत । मेखे साउण्ड सिस्टम या प्राविधिक कमजोरी गनं गनं म्ये न्यनेबलय् समस्या वःगु दु धइगु नं प्रतिक्रिया वल ।

किपाः रेखा शाक्य
किपाः रेखा शाक्य

 

 

Leave a Reply

Your email address will not be published. Required fields are marked *