fbpx

“बुद्धधर्मय् दुने हे पशुबलि बिइगु चलन दिकेमाल”

झीगु संवाददाता
येँ, बछलागाः त्रियोदसि । नेपालभाषाया बौद्ध लेखकपिन्त सिरपाः बिइगु छगू ज्याझ्वलय् बज्राचार्यपिन्सं पशुबलि बिइगु ज्यायात प्रोत्साहन मयायेमाःगु खँ सहभागीपिन्सं कन ।

नेवाःभाय्या न्हिपौ नेपालभाषा टाइम्सय् पिदंगु बुद्धधर्म सम्बन्धी लेखत मध्ये निम्ह लेखकपिं मय्जुपिं पाखें अकिल शोभा ताम्र्राकार व भाजुपिं पाखें मुनिन्द्ररत्न वज्र्राचार्ययात शनिबार युवा बौद्ध समूहं पञ्चवीरसिंह बिइगु ज्या जुल ।

गणमहाविहारया प्र्रमुख भिक्षु सोभितं उगु सिरपाः थौं थन विहारय् छगू ज्याझ्वःया दुने च्वमिपिन्त सिरपाः बियाबिज्याःगु खः । लिसें ख्वपया मैत्री युवा संघयात बुसं २५६२ या लागि इलोहं पञ्चवीर परियत्ति सिरपा नं लःल्हात ।

थ्व सिरपाःया दाता पञ्चवीरसिंह तुलाधर खः । वय्कलं पुरस्कृत व्यक्तित्वपिन्त नगद ध्यबा नं लःल्हात ।

दाता तुलाधरं नेपालभाषाय् बुद्ध धर्मया लेखकपिं यक्व दयावःगु लसताया खँ खः धयादिल ।

धर्मोदय सभाया महासचिव सागरमान वज्राचार्यं नेवाः तय् दुने वज्राचार्यपिन्सं हे पशुबलि यात संरक्षण यायेगु ज्याः ल्हाः मतयेमाल धयादिल ।

नेपालभाषा टाइम्सया सम्पादक सुरेश किरण मानन्धरं थ्व पञ्चवीर सिरपाः दयेवं नेपालभाषां बुद्ध धर्मसम्बन्धी लेख च्वयेगु लहर वःगु खँ कनादिल ।

सिरपाःया निर्णायक डा. गौतववीर वज्राचार्यं मुनिन्द्र वज्राचार्यया लेखय् वज्रयान बुद्धधर्मय् दुने हे पशुबलि बिइगु चलन दूगुलिं थ्व तसकं मछालापुसे च्वंगु खः धाथें थज्याःगु लेख मार्फन वज्राचार्यतय्त बुद्धधर्मया मर्म थुइकेगु ज्या जूगुया प्रशंसा यानादिल । उकियालिसें करुणामया धयातःम्ह बुंगद्यःया जात्रा बलय् हे पशुबलि बियाच्वंपिं बौद्ध पुचारी पान्जुतय्त बुद्धधर्मया ज्ञान बिइगु कुतःयानागु खँ नं वय्कलं कनादिल ।

इलोहं पत्रिकाया सल्लाहकार नरेशवीर शाक्यं परियत्ति ब्वनाः उत्कृष्ट ल्याः हःपिंपाखें हे बुद्धधर्मसम्बन्धी च्वसु वयामच्वगु खँय् दुख तायेकादिल ।

पुरस्कृत व्यक्ति मुनिन्द्र रत्न वज्र्राचार्यं थम्हं तःगु हे बुद्धधर्मया सफू अध्ययन यानास्वयाः नं वज्रयान बौद्ध पूजाविधिइ पशुबलिया उल्लेख मजूगु अले गन गन बलिया उल्लेख जूगु दु अन अन उकियात पराक्रम वा बांलाःगु ज्याया प्रतिकया रुपय् जक कयातःगुलिं वज्राचार्यपिन्सं कमसेकम तत्काल हे पशुबलियात निषेध याये हथाय् जूगु खँ कनादिल ।

पंचशीलय् च्वनीपिं व दशांकुशल पाप मयायेधाइपिं पाखें पशुबलि याकेगु वा यायेगु धइगु सम्भव मदु धइगु वय्कलं स्पष्ट यानादिल ।

मेम्ह पुरस्कृत व्यक्ति ताम्राकारं पुरस्कार फयेदयाः तकसं लय्ताःगु खँ कँसें थुकिं थःत अझ जिम्मेवार जुयाः बुद्धशिक्षा बिइगु लेख च्वयेत अझ उत्साहित जूगु खँ कनादिल ।
आःतक ३३ म्ह बौद्धलेखकयात पञ्चवीर सिरपाः लायेधुंकूगु व छम्हनिम्हस्यां छकः स्वयाः यक्व हे नं सिरपाःकायेखंगु खँ आयोजकं धाःगु दु ।

Leave a Reply

Your email address will not be published. Required fields are marked *