fbpx

तिथि कथं सत्य मोहन जोशीया १००दँ बुदिं हन

 

झीगु संवाददाता
येँ, बछलागा नवमि । शताब्दी पुरुष सत्यमोहन जोशीया तिथि कथंया १००दँ बुदिं थौं येँय् व यलय् नेवाः धर्म व परम्पराकथं थी थी ज्याझ्वः यानाः हन ।

किपा रेखा शाक्य

थौं येँय् जूगु छगू ज्याझ्वलय् समाजसेवी लक्ष्मीदास मानन्धरं शताब्दी पुरुष सत्यमोहन जोशीया नामं कोष घोषणा यानादिल । कोष मुख्य यानाः मस्तय्त नेवाः भाय् स्यनेगु ख्यलय् छ्यलेगु विश्वास बिसें वय्कलं दक्वसित थम्हं मनं खंथें ध्यबा तयाः कोषयात धिसिलाकेत इनाप यानादिल ।

किपा रेखा शाक्य

 

किपा रेखा शाक्य

ज्याझ्वलय् सगं कायेधुंकाः जोशीं थःत हंगु धइगु थःगु मांभाय् व संस्कृतियात हंगु खः धासें नेवाः भासं मचा साहित्य मदयेकं भाय् ल्यंके थाकुइगु खँ कनादिल ।

नेपालभाषा एकेदमिया सदस्यसचिब मल्ल के सुन्दरं थःगु व थः काय्पिनिगु पुस्तां तक नेवाः भाय् ल्हाःसां वयां लिपाया पुस्तां नेवाः भाय् ल्हाइगु अवस्था मदु धकाः दुख प्वंकादिल ।

ज्याझ्वलय् नवासें कलाकारपिं मदन कृष्ण श्रेष्ठ व हरिवंश आचार्यं कोषया नितिं शुरेश किरणं च्वइगु नेवाःभाय्या क्वाः सम्बन्धी कार्यक्रम दयेकेगु बचं बियादिल । उगु कार्यक्रमय् उमिगु न्हापाया खय् भाय्या गाउँखाने कथाया हे लसिवयेक न्हूगु कार्यक्रम दयेकेगु जानकारी नं बियादिल ।

ज्याझ्वलय् अन सहाभागी पिन्सं जोशीयात खादां न्ययेकाः भिंतुना नं बिल ।

किपा रेखा शाक्य

व स्वयाः न्ह्यः थौं यलय् सत्यमोहन जोशीयात वय्कःया हे वय्कःया हे छेँय् छेँ जःपिन्सं ख्येँ सगं बियाः बुदिं हंन । अथे हे अन हे लोक साहित्य परिषदया ग्वसालय् दुजःपिन्सं मंकाः कथं ख्येँ सगं बिल । जोशी लोक उगु साहित्य परिषदया संस्थापक व संरक्षक नं खः ।

किपा रेखा शाक्य

अथे हे मेगु यलया मंगल बजारय् जूगु मेगु ज्याझ्वलय् बौद्ध धर्मकथं नामसंगीति पाठ यासें जोशीयात सगं बियाः नं वय्कःया बुदिं हन ।

किपा रेखा शाक्य

नेपाल परम्परागत बौद्ध धर्म संघ व ललितपुर महानगरपालिकाया मंकाः ग्वसालय् जूगु उगु ज्याझ्वलय् वय्कःया भिंउसाँय् व तःहा आयुया कामना यासें ख्यें सगं बिल । उकिया निंतिं यलया ३५गू स्वयाः अप्वः नामसंगीति खलःया दुजःपिन्सं मंकाः कथं मंकाः आर्य नामसंगीति पाठ याःगु खः ।

किपा रेखा शाक्य

थ्व स्वयाः न्ह्यः यल महानगरपालिकाया ग्वसालय् विक्रम संवत् कथं वैशाख ३० गते वय्कःया सछिदँ बुन्हि हनेधुंकूगु दु ।

किपा रेखा शाक्य
किपा रेखा शाक्य
किपा रेखा शाक्य
किपा रेखा शाक्य

Leave a Reply

Your email address will not be published. Required fields are marked *