fbpx

लमजुङय् क्वचाल १२कःगु राष्ट्रिय बौद्ध सम्मेलन

झीगु संवाददाता
बेसिशहर, लमजुङ, चौलाथ्व दुतिया । निदँ लिपा जुइगु जनगणनाय् बौद्धतय्स्ं थःगु धार्मिक म्हसिका बियाः नेपाःया जनसंख्याय् बौद्धतय्गु ल्याः अप्वयेकेगु घोषणालिसें थन शुक्रबारनिसें न्ह्यानाच्वंगु १२कःगु राष्ट्रिय बौद्ध सम्मेलन क्वचाल ।

धर्मोदय सभाका केन्द्रीय उपाध्यक्ष व घोषणापत्र तयारी समितिया संयोजक पद्मज्योतिं न्ह्यब्वयादीगु घोषणापत्रय् थथे धयातःगु दु —‘नेपाःया सरकारी तथ्यांकय् बौद्धतय्गु जनसंख्या वास्तविकता स्वयाः तसकं म्हो क्यनातःगु दु । थथे जुइगुली जनगणना यायेगु प्रविधि व प्रक्रियाय् कमजोरी दु धाःसा बौद्ध समुदायय् नं चेतनाया अभाव खनेदत । बौद्धतय्गु संख्या यथार्थ स्वयाः कयौ गुणा खनेदतकि सरकारया नीति व कार्य योजना दयेकेगु ज्याय् लिच्वः लाइगुया लिसें राजनीतिक सामाजिक क्षेत्रय् गलत अर्थ तयेगु कुतः जुयाच्वंगु खनेदु ।’

अथे हे थुकिइ थ्व सम्मेलन दक्व जाति, संस्कृति धर्मयात थःथःगु पहिचानयालिसें थाहाँ वयेकेबिउसा झीगु देय् बल्लाः, बांलाः व शान्त जुइ धइगु विश्वास यासें थ्व सम्मेलनय् ब्वति काःगु संघ संस्थात छपँ जुयाः आः वइगु जनगणनाया लागि धर्मोदय सभाया तत्वावधानय् दक्व बौद्ध व आदिवासी जनजातितय्गु सत्य तथ्य व पहिचान क्यनेगु अभियान न्ह्याकेत छगू समन्वय समिति गठन यायेगु नीति तय याइ धयातःगु दु ।

अथे हे घोषणापत्रया न्हापांगु बुँदय् धयातःगु दु – ‘बुद्ध धर्म धायेगु हे बौद्ध शिक्षा खः । मनूत थःगु जीवनय् दुःखं मुक्त जुइत व सुख पूर्वक जीवन हनेत बुद्धं बियाबिज्याःगु शील, समाधि र प्रज्ञाया शिक्षायात नेपालीतय्त अःपुक उपलब्ध यायेत बौद्ध संघ संस्थात प्रमुख शहरय् जक मखु गां, पहाड, तराई मधेश दक्वथासय् न्ह्यज्यायेमाःगु व नेपाल सरकारं नं ल्वयेक शिक्षा नीति व कार्य योजनात दयेकेमाःगु खनेदु ।

लुम्बिनीयात विश्व शान्तिया मुहान धकाः घोषणा नं जुइधुंकूगु परिप्रेक्षय् नेपालयात अन्तराष्ट्रियस्तरया बौद्ध शिक्षा व अनुसन्धान केन्द्रया रूपय् विकास यायेत नं व घोषणापत्रं माग याःगु दु ।
उकिया लिसें संविधान सभाद्वारा पारित यानाः जारी यानातःगु नेपालया संविधानया प्रस्तावनाय् नेपाःयात बहुजातीय, बहुभाषीक, बहुधार्मिक, बहुसांस्कृतिक तथा भौगोलिक विविधता युक्त विशेषतायात आत्मसात यानाः विविधतायुक्त एकता, सामाजिक सांस्कृतिक ऐकवद्धता, सहिष्णुता व सद्भावयात संरक्षण अले प्रवद्र्धन यायेत संकल्प यानातःगुलिइ नेपाःया समस्त बौद्ध तथा जनजाति समुदायं गौरव अनुभुति याःगु दु धकाः नं धयातःगु दु ।

अले व घोषणापत्रय् नेपालय् थथे ऐतिहासिक संविधान जारी जुइधुंकाः नं संविधानय् न्ह्यथनातःगु मान्यता व मर्मया अःखः सुयातं छगू धर्म व संस्कृतिइ यक्व संलग्नता क्यनेगु वा धार्मिक निस्पक्षताय् छुं शंका पिज्वजइगु गुगुं ज्या मजुइमा धइगु विशेष सर्तकता क्यनेत नं अपिल यानातःगु दु ।
ज्याझ्वलय् समाजशास्त्री डा. कृष्ण भट्टचनं बिसं २०७८या नेपाःया राष्ट्रिय जनगणनाय् बौद्धतय्गु सरोकार व भूमिका नांगु मूलसम्बोधन यानादीगु खः । उकिइ वय्कलं १९५२निसें २०११तकया बौद्ध जनसंख्याया विस्तृत तथ्यां न्ह्यब्वयाः सरकारं नेपालय् हिन्दूत जक दु धइगु खँ प्रमाणित यायेत बौद्धतय्गु ल्याः म्हो क्यनाः मिथ्यांक जक बियाच्वंगु द्वपं बियादिल । अथे जूगुलिं २०२१या जनगणनाय् थःगु धर्म बौद्ध छाय् च्वयेगु, झी बौद्ध खः धायेत थाकुयाच्वंगु भ्रमपूर्ण खँया सम्बन्धय्, सन् २०२१या जनगणनाय् धर्मया महलय् बौद्ध च्वकेत छु यायेमाली धइगु खँय् विस्तृत ब्याख्या यानादिल ।


वयां लिपाःया आइतबार ज्याझ्वलय् उपाध्यक्ष आइबि गुरुङ, तमु ह्युल छोंज धिंया अध्यक्ष रेशम गुरुङ, नेपाल आदिबासी जनजाति महासंघया अध्यक्ष जगत बराम, नेपाल तमाङ घेदुङया अध्यक्ष बाबु घिसिङ, मगर बौद्ध सेवा समितिया अध्यक्ष देउ बहादुर राना, ओबिसी महासंघया प्रवक्ता वीर बहादुर महतो, थारु कल्याण समितिया लाहुराम चौधरी लगायतया बक्तातय्सं नेपालय् बुद्धया जन्म जुयाः नं बौद्धतय्गु तथ्यांक तक नं सरकारं पितबिइ थाकुयाच्वंगुलिइ विरोध प्वंकल ।
सम्मेलनया उलेज्या ज्याझ्वलय् गण्डकी प्रदेशया मुख्य मन्त्री पृथ्वी सुब्बा गुरुङं नेपालया परिचय हे बुद्ध धर्म जूगुलिं विशेष यानाः बौद्धतय्सं थःगृु पहिचान ल्यंकातयेमाःगु खँय् जोड बियादिल । वय्कलं आः नेपाःयात हिन्दु धर्म राष्ट्र दयेकेत सुं कुतः यानाच्वंसां व सफल मजुइगु खँ कनादिल ।

अथे हे नेकपा गण्डकी प्रदेशका प्रमुख सचेतक मायानाथ अधिकारी, प्रदेश सांसद धनञ्जय दवाडी, पूर्वसांसद जमीन्द्रमान घले, पूर्वराज्यमन्त्री रामबहादुर गुरुङ, बेंसीसहर नगरपालिका प्रमुख गुमानसिंह अर्याल, सहायक प्रमुख जिल्ला अधिकारी काजीमान सुनार लगायत दक्वस्यां नेपालय् बुद्धधर्मं हे जक म्हसिका बिइगु धासें उकियात ल्यंकातयेगु लिसें जनगणनाय् नेपाःया विविध पक्षया सही चित्रण जुइमाःगु खँ कनादिल ।

अथे हे ज्याझ्वःया संयोजक डा. केशवमान शाक्य व धर्मोदय सभाका केन्द्रिय महासचिव सागरमान बज्राचार्य ज्याझ्वया व्यवस्थापनय् वःगु कठिनाइयात कयाः थुकिया महत्वया बारे नवानादिल ।

धर्मोदय सभाका केन्द्रियसभापति यज्ञमानपति वज्राचर्र्यं नेपाःया बौद्धतय्सं हे नेपाःया म्हसिका ल्यंकातःगु कँसें आः वइगु जनगणनायय् थःगु धर्मया पहिचानयात लुमंका सरकारया जनगणनाय् प्रतिनिधित्व जुइकेत दक्व जायेमाःगु खँ कनादिल ।

थ्व हे ज्याझ्वलय् प्रा डा बज्रराज शाक्ययात  धर्मोदय पुरस्कारं पुरस्कृत यात । मुख्यमन्त्री गुरुङं वय्कःयात २५ हजार नगद व सम्मानपत्र लःल्हाःगु खः ।

अनं बेसीसहरया रणबहादुर गुरुङ व सुन्दरबजार नगरपालिकाया क्याप्टेन खरजङ गुरुङयात लक्ष्मीदेवी मानन्धर स्मृति पुरस्कारं पुरस्कृत याःगु दु । अथे हे स्वम्ह स्थानीय जेष्ठ नागरिकयात नं अन हनेज्या जूगु खः ।

धर्मोदय सभा नेपाल केन्द्रीय समितिया आयोजना व लमजुङ बेसीशहर व भोटेओडार शाखाया व्यवस्थापनय् जूगु उगु राष्ट्रिय सम्मेलनय् स्वनिगः लगायत नेपाःया ७७ जिल्लाया प्रतिनिधि जानाः द्वःछि धयाथें सहभागीत उपस्थित जूगु खः ।
ज्याझ्वलय् साँस्कृतिक झाँकी ¥याली, शान्तिपद यात्रा, वुद्ध अस्तु धातु दर्शन, शान्ति दिप पदयात्रा लगायत विविध ज्याझ्वः जुल ।

 

Leave a Reply

Your email address will not be published. Required fields are marked *