fbpx

विदेशी पाहाँपिनि दथुइ थुगुसिइया येँयाःया रौनक

झीगु संवाददाता / राजेन मानन्धर
येँ, यंलागाः पारु । येँयाः दँय् दसं न्याइ, थुगुसिइ नं न्यात । तर थुगुसिइया येँयालय् छगू न्हूगु सवाः तन । मेमेबलय् सा विशिष्ट धाःपिं पाहाँपिं बरन्दाय् च्वनाः जात्रा न्ह्याःगु स्वयेगु औपचारिकता पुवंकेत हे जक तामझाम यानाः वइ । थुगुसिइ धाःसा थी थी देय्या मेयरपिं व मेमेपिं विशिष्ट पाहाँपपिं येँयाःया हुलय् थःत तंकेत धकाः हे जक येँयय् पलाः तःवल । गजब मखुला ?

नेपाः न्ह्याक्व पर्यटक वइगु देय् धाःसां थन गुलि नं वइ उमिसं स्वनिगःया स्वंगू ऐतिहासिक व कलाकृतिं छाय्पियातःगु लायकुलिइ पलाः मतइपिं दइमखु । वंगु २५० दँ दुने उमिसं स्वयेबहगु मेगु छुं दयेके मफयाः हे जुइ । अथेसां उमिसं थनया व लाय्कू धइगु म्युजियम थें जक स्वइ । उमिसं उकियालिसे थनया आदिबासी नेवाःतयगु संस्कृति आःनं ला व लुसिथें स्वानाच्वंगु दु धकाः तसकं म्हो पर्यटकतय्सं जक खनी । व स्वयेत उपिं थन येँयाःबलय् हे थ्यनेमाः ।

येँयाःयात अन्तर्रांष्ट्रिय रुपं हे प्रचार प्रसार यायेत जुइ, येँया मेयर विद्या सुन्दर शाक्यं थुगुसिइ येँयाः स्वयेत थी थी देय्या मेयरपिन्त सःतूगु । व हे ल्याखं थन थ्यंकःवल — चीनया लान्जाउ शहरया मेयर जियाङ सियावहोङ, भूटानया थिम्पू शहरया मेयर किन्ले दोर्जी अले भारतया नर्थदिल्ली नगरपालिकाया मेयर सरदार अवतार सिंह । उमिलिसे मेमेगु नं अमेरिका, जापान व मेमेगु थी थी देय्या झिगू नगरपालिकाया विशिष्ट प्रतिनिधिपिं झ्वःछुवल । उमिलिसें चीनया लाञ्चाउ शहरया कमिटि अफ द सिपिपिसिसिया उपाध्यक्ष ज्याङ् सिओहाङ् उमिमध्ये छम्ह विशिष्ट पाहाँ खः । अथे हे चीनया सियान, छेन्दु, सेञ्जेन र नान्जिन, जापानया मात्सुमोतो नगर, संयुक्त राज्य अमेरिकाका फेडेरिकबर्ग व बोल्डर नगरया प्रतिनिधिपिं उकिइ दुथ्याः । अथे धइगु प्यम्ह मेयरसहित ४१ म्ह विदेशी विशिष्ट पाहाँ थुगुसिइ येँयाः स्वयेत धकाः हे जक वःगु जुल ।

This slideshow requires JavaScript.

येँयाः पर्व अवलोकन यायेत धकाः येँ महानगरपालिकाया औपचारिक ब्वनाय् नेपा वःपिं पाहाँपिन्सं न्हापा गबलें नेपाः खंगु खइमखु, खंगु हे जूसां येँयाः अले उपिं गुगु गुगु थासय् वन, व ला पक्कां खंगु खइमखु । थ्व ल्याखं उपिं छगू न्हूगु देशय् थ्यन, न्हूपिं मनूत नापलात ।

पलाःतयेवं उमित येँ महानगरपालिकाया मेयर विद्यासुन्दर शाक्य, उपमेयर हरिप्रभा खड्गी अले अनया पदाधिकारीपिन्सं लसकुस यात । धिमय् व भुस्याःया संगीत लिउलिउ तयाः, सिन्हः तिनाः, क्वखा क्वखायाः हे उपिं झोछेँ जुजुं नःबही, मञ्जुश्रीनकमहाविहार (बिकमाबहाः), थानबहाः, भिन्द्यः, मरुसतः, सिँल्यं सतः, गनेद्यः, मरुहिटी, यत्खाबहाः, इतुम्बहाः, जनबहाः, आकाशभैरव, स्वेत आदिं छाय्पियातःगु हनुमानध्वाखा लाय्कू क्षेत्रया अवलोकन यानादिल ।

उपिं अन धुलं गइ धकाः ग्याःपपिं व सुरक्षा दस्ता माःपिं विशिष्ट पाहाँ कथं मखु सामान्य पर्यटकथें वल । थनया जीवनशैली, रहनसहनलिसे भ्यलय् पुनेगु कुतःयात, छु नकल नल, छु त्वंकल त्वन । अथे धइगु थनया सामान्य जनजीवनय् थःत तंकल । लसकुस याइपिन्सं नं पर्यटकत थुपिं, थुमिसं झीत ध्यबा त्वःताथिकी धकाः मखु, थुमिसं झीगु नखःचाः जात्रासंस्कृतियात सम्मान यानाः हे थन तक वःगु खः धइगु वाःचायेकाः नुगः स्वां ह्वयेकाः लसकुस यात । गुलिस्यां जाकिसिन्ह व क्वखा, गुलिस्यां सलिंचाय् भचा भचा तयाः सां उमित मतिना क्यन । अन नियुक्त यानातःपिं गाइडत जक मखु, मेयर, उपमेयर व मेमेपिं जनप्रतिनिधिपिं लिसें स्थानीय जनता हे नं उमिगु जिज्ञासायात थुइकाः थूगु सःगु भासं उमित थम्हं सिउगु खँ ककं चाःहिइकाच्वन । ल्याय्म्हल्यासेपिं बुराबुरिपिं, ल्ह्वंपिं गंसिपिं सकलें उसिमधासे स्वघौस्वयाः मयाक्क न्यासि हे वनाः भ्रमण क्वचायेकाः हनमानध्वाखा लाय्कुलिइ थ्यंकल ।

 

थ्व हे झ्वलय् मेयर शाक्यं नेवाः पत्रकार राष्ट्रिय दबूया संयोजनय् जूगु येँयाः सम्बन्धी किपा ब्वज्याया नां उलेज्या यानादिल । पाहाँपिन्सं थम्हं मखंनिगु, मन्यानानिगु जात्राया बारे किपाय् हे सां छुं प्रत्यक्ष दर्शन यात, अलय् स्वयेमानिगु जात्रा गथे जुइधकाः थःत मानसिक रुपं तयार नं यात । अन उमिसं लाखय्, पुलुकिसि, हल्च्वभैरव, महाकाली आदि प्याखं नं खन । मनूतय्सं गथे थः थः मिलेजुयाः राष्ट्रपतिं तकं भागियायेमाःम्ह कुमारीया खःयात घिरिरिरि सालाः जात्रा न्यायेकल धइगु नं खन ।

 

 

किपाः रेखा शाक्य

आकिवं जुइगु धयातःगु भिजिट नेपाल –२०२० या लागि नेपाःया प्रचारप्रसार जइमा अले थनया सांस्कृतिक पर्यटन झन् क्वातुइमा धकाः नं जुइ थ्व ज्याझ्वःया आयोजना याःगु । थुकिं थःथःगु देय्या अपाय्अपाय्धंगु शहरयात नेतृत्वबियाच्वंपिन्सं थनं छुं थःके मदुगु ला अवश्य हे लुइकल जुइ । धाथें उमिसं येँ देय् दयेकत नेवाःतय्सं छ्यःगु वास्तुशैली, उकियात म्वाकातइगु नेवाःतय्गु संस्कृति र उमिगु गबलें पुलां मजुइगु मौलिक सामाजिक जीवन समेत ज्वाः उपिं थःगु देसय् वनी आः ।

येँ चाःहिले धुंकाः उपिं चन्द्रागिरीया केबुलकारय् च्वनाः प्राकृतिक सौन्दर्यया अनुभव यात, अनं स्वयम्भुया दर्शन यायेत वल । अज्याःथाय् नं थाकु मखु मधासें स्येंस्येंफुंफुं यानाः चाःहिला हे च्वन । थःथःगु मोबाइलं माःमाःगु दृष्य कैद याना हे च्वन ।

अथेहे लिपांगु दिनय् हानं उपिं ख्वपय् नं थ्यन । अन उमिसं भक्तपुर दरवार क्षेत्रया ५५ झ्याः दरवार, लुँःध्वाका, तलेजु, निर्माणधिन फसि द्यःगः, पशुपति अले मेमेगु थनया नेवाः कला व बास्तुकलाया दसुत नं बांलाक रुचितयाः स्वल । अले अनं तःमाह्रिया ङातापोल व भैरव द्यःगः अवलोकनयानाः क्वाछेँ, सुकुल ढोका, ग्वःमाह्रि, ईनाचो अले तचपाल स्थित भिमसेन द्यःगः, दत्तात्रिय द्यःगः, म्हय्खा झ्याः आदि स्वल । उकियालिसें उमिसं अनया सामान्य जनजीवन, वसः, च्वनेगु छेँया नं अवलोकनयानाः अन म्वानाच्वंगु नेवाः संस्कृतिया बारे नं जानकारी मुंकादिल ।

न्यनेदुकथं चीनया ल्हासाया मेयर गुहेओ गुहेओ वयाः नं व्यस्ताया कारणं चाःहिले मखन । अथे हे बंगलादेशया दक्षिणी ढाका नगरपालिकाया मेयर मोहम्मद सयीदखोकन वयेगु बचं बिइधुंकाः नं थः डेंगुया ल्वचं कःगुलिं वयेमखन ।
अन्तय् दक्व ज्याझ्वः क्वचायेकाः येँ सभागृहय् बिदाबिइगु ज्याझ्वः जुल । नेपाःया संस्कृति क्यनें स्वंगु प्याखं नं क्यन ।

ज्याझ्वलय् नवासें भारत उत्तर दिल्लीया मेयर अवतारसिंहं थः येँ मवःगु जूसा यक्व खँय् द्याइगु खनी धकाः स्वीकार यानादिल । अथे हे थनया जात्रापर्वय् मनूत क्वहाँ वःगु खनाः थनया संस्कृतिं मनूततय्त आः नं चिनातःगु दनि अले मनूतय्गु नुगलय् थःगु धर्म व संस्कृतिप्रति उलि हे मतिना दनिगु धइगु तसकं लसताया खँ खः धकाः नं कनादिल ।

अथे हे भूटानया थिम्पु शहरया मेयर दोर्जे किन्लें थनया कला कृति व मनूतय् बुद्ध धर्मप्रतिया श्रद्धा खनाः प्रभावित जुयागु खँ कनादिल ।

ज्याझ्वलय् येँ महानगरपालिका पाखें पाहाँपिन्त फ्वसाथें येँया थी थी पक्षयात कःघानाः थी थी पत्रकारपिनिगु निसःपाःधइथें किपा व बःचाहाकःगु जानकारी नापं दूगु फोटोबुक छगू छगू नं लःल्हायेगु ज्या जुल । येँ महानगरपालिकाया ग्वसालय् व नेवाः पत्रकार राष्ट्रिय दबू येँ कचां थम्हं समन्वय यानाः जूगु किपा ब्वजाय् दुतिंगु किपा मुनाः हे व फोटोबुक तयार याःगु खः ।

Leave a Reply

Your email address will not be published. Required fields are marked *