fbpx

६ गू देशया १३ गूं नगरं ५ म्ह मेयरया लिसें अन्य पाहाँपिन्स‌ं येँयाः जात्रा स्वइगु

रेखा शाक्य । झीगु सम्वाददाता

येँ। ञँलाथ्वः चतुर्दशी ।

येँया एतिहासिक महत्वपूर्णं जाःगु जात्रा स्वयेत येँ महानगरपालिकाया ब्वनाय् ६ गू देशया १३ गूं नगरं ५ म्ह मेयरया लिसें अन्य पाहाँपिं थौं नेपाः थ्यंकिगु जूगु दु ।

म्हिगः येँ महानगरपालिकाया मेयर विद्या सुन्दर शाक्य पाखें पत्रकार नापलायेगु ज्याझ्वलय् औपचारिक रुपं ज्याझ्वःया धलः सार्वजनिक यानादिगु खः ।

“येँयाः नेवाः तय्गु तःजिगु जात्रा खः । सदां न्ह्याइपुक हे न्ह्यानाच्वंगु दु तर थुगुसि थ्व जात्रा मात्र झी नेपाःपि पिन्सं जक मखसेंं अन्तरराष्ट्रिय नगरया प्रमुख व प्रतिनिधिपिन्सं नं स्वइगु जूूगु दु । गुगु नेपाःया नितिं गौरवया खँ जुयाबिइ । झीगु मौलिक जात्राय् न्हापालिपा नं विदेशी पाहाँ मवःगु मदु तर थुकथं राष्ट्रपाखेंया ब्वनायात स्वीकारयाना मेयरपिं वइत्यंगु न्हापांगु खुसिइ खः ।”

झीसँ झी पाहाँपिन्त नेपाःया कला, संस्कृति, परम्परा व सम्पदा क्यनेगु थ्व अवसरं जात्रा अन्तरराष्ट्रियकरण जक जुइगु मखसें नेपाःया जात्रा पर्वया अवसरय् विदेशी पाहाँपिन्त ब्वनेवं झीगु नेपाःया कला संस्कृति विदेशय् नं प्रचार प्रसार जुइगुया लिसें सतिनाच्वंगु भिजिट नेपाल २०२० यात नं सहायक सिद्ध जुइ । थुकिं स्वनिगः वासीपिन्त नं लाभदायक जुइगु बिश्वास कयागु दु मेयर शाक्यजुं धयादिल ।

येँयाःया अवसरय् ४ चा ५ न्हूया पाहाँपिन्त हनुमानध्वाखाया जःखःया लिसें क्वःने, थःनेया स्थलगत भ्रमण याकिगु जुइ । लिसें नेवाः पत्रकार राष्ट्रिय दबू येँ जिल्लापाखें येँयाः नाप सम्बन्धि किपाः ब्वज्या हनुमानध्वाखाय् २७ गते जुइत्यंगु जानकारी ब्यूसें शुक्रबाः विदेशी पाहाँपिन्त स्थलगत भ्रमण याकेगु व किपाः ब्वज्याया प्रत्यक्ष अवलोकनं येँयाःया बारे अझ यक्व जानकारी पाहाँपिन्त दइ ।

जात्राया मू द्यः कथं जीवित देवी श्री कुमारी, श्री गणेश व श्री भैरवया दर्शन प्रत्यक्ष रुपं न्हिनय् राष्ट्रप्रमुखया उपस्थितिइ रथयात्रा क्यनेगु, येँयाःया मेपिं आकर्षक कथं किलाघःया पुलुकिसि, मजिपाःया लाखे आजु, हल्चोकया श्री आकाशभैरव, ख्वपया महाकाली, घिंटांग किसीया लिसें येँयाःया झ्वलय् थासं थासय् ब्वयातःपिं श्री श्वेतभैरव, श्री आकाश भैरव, वाकाद्यःया लिसें त्वाः त्वालय् ब्वयातःपिं हाथुद्यःपिं, इन्द्रद्यः व  लखतं लाःगु अवसरय् ब्वयातइपिं अन्य देवदेवीया स्थलगत भ्रमणया झ्वलय् अवलोकन याकेगु ग्वसाः दुगु धयादिल ।

अथेह स्वनिगःया थी थी जीवन्त व अमूर्त सम्पदाया अवलोकन याकेया नितिं विश्व सम्पदा सूची लाःगु स्वयम्भू महाचैत्य, यल लाय्कू , ख्वप लाय्कू, चन्द्रागिरी नगर भ्रमणय् यंकेगु ग्वसा दूगु खँ कनादिल ।

येँ नगरपालिकापाखें ब्वंगु ब्वनायात स्वीकारयासें चीनया ल्हासाया मेयर गुहेओ गुहेओ, बंगलादेशया ढाका साउट सिटी कर्पोरेशनया मेयर मोहम्मद सहिद खोकन, भुटानया थिम्पु नगरया मेयर किन्ले दोर्जे, भारतं इष्ट दिल्ली म्यून्सिपल कर्पोरेशनया मेयर अञ्जु कमलकान्त वयेत्यंगु खः । अथेहे नर्थ दिल्ली म्यूनिसिपपाखें मेयर सरदार अभतार सिंहया नेतृत्वय् जात्रा स्वयेत पाहाँपिं वइगु जूगु दु । अथेहे चीनं, जापान, संयुक्तराज्य अमेरिकां उच्च अधिकारीया नेतृत्वय् जात्रा स्वयेत वइगु दु ।

Leave a Reply

Your email address will not be published. Required fields are marked *