fbpx

१४ गते विशाल मोटरसाईकल  र्‍याली – गुथि विधेयक विरुद्धय्

रेखा शाक्य । झीगु संवाददाता
येँ, तछलागा षष्ठी ।

गुथि आन्दोलनया नितिं दयेकूगु संघर्ष समितिं गुथि विधेयक खारेज याकेगु नितिं दवाव बिइत थी थी ज्याझ्वःया धलः सार्वजनिक यात ।

थौं च्वंगु बैठकं आसर ९ गते उपत्यकाय् थासंथासय् कोणसभा यायेगु, १४ गते येँया न्हूसतकं विशाल खवरदारी मोटरसाईकल र्‍याली पिकायेगु नापं २० गते बसन्तपुलिइ बृहत केन्द्रिकृत सभा यायेगु निर्णय याःगु दु ।

सरकारं गुथि आन्दोलनया दवावयात सिथिलयायेत असार ३ गते विधेयक लितकया धकाः पत्रकार सम्मेलन याःगु खःसां ४ गते संघर्ष समितिं फिब्वख्यलय् सकलें नेवाः छप्पं छधी खः धइगु सन्देश बियाः खवरदारी सभा यानाः विधेयक खारेजया माग याःगु खः ।

तर वयां लिपा इलय्व्यलय् थुगु हे विधेयकयात कयाः थी थी खँ सञ्चार माध्यमं सम्बन्धित पक्षं विधेयक खारेज याये हे माःगु मखु नेवाःतसें अथें हाला जुल धइगु खँ बकेयाना हःगुया लिसें माल धाःसा छथाय् निथाय् भिंकेगु जुइ धकाः धयाहयाच्वंगु खँयात कयाः सरोकार नेवाः ख्यलं थुकियात गम्भीर रुपं कयाः संघर्षया मेगु पलाः ल्ह्वने हे माःगु धकाः सः थ्वयेका च्वंगु खः ।  उकिं गुथि विधेयकया सवालय् संस्कृतिविद्, कानूनविद्, गुथियारया लिसें सहलहया ज्याझ्वः नं याइगु जूगु दु । अथेहे हे कने सनिलया ४ बजे जुद्ध सालिकं जुलुस वनेत मुनेगु नितिं राष्ट्रिय पहिचान संरक्षण  संयुक्त संघर्ष समितिया संयाेजक गणपति लाल श्रेष्ठं झीगु सम्वादातायात जानकारी बियादीगु खःसा आः वइगु १४ गते जुइत्यंगु बृहत माेटरसाइकल र्याली नं थःपिनिगु संयाेजकत्वय् हे जुइत्यंगु धाःगु दु ।

थौंया मुनेज्याय् संयोजक डा महेशमान श्रेष्ठ, जनजाति आन्दोलनया न्ह्यलुवा नेता मल्ल के सुन्दर, बरिष्ठ कानूनविद् शंकर लिम्बूं गुथि आन्दोलनया आवश्यक्ताया लिसें आः यायेगु ज्याया रणनीतियात कयाः चर्चा याःगु दु। नापनापं ज्यापु महागुथि नेपाःया नायः राजभाइ जकःमि, ज्यापु समाज यलया पूर्व नायः एवं सांसद चन्द्र महर्जनंं वइगु दिनय् गथेयानाः न्ह्यायेमालि धइगु खँय् बिचाः प्वंकादीगु खः ।

ज्याझ्वलय् गुथि आन्दोलनयात व्यापकता यायेत सक्रिय उपत्यकाव्यापी सडक विस्तार पीडित संघर्ष समितिया नायः सुमन सायमि, सम्पदा अभियन्ता गणपतिलाल श्रेष्ठ, पत्रकार श्रीकृष्ण महर्जन, पवित्र बज्राचार्य, गुथि विधेयक बिरुद्ध विरोध संघर्स समिति, यलया सचिव रविन्द्रराज ताम्रकारया लिसें सहभागीपिन्सं नं गुथि आन्दोलनया औचित्य व आवश्यक्तायात कयाः बिचाः प्वंकादीगु खः ।

Leave a Reply

Your email address will not be published. Required fields are marked *