fbpx

“हिजो आजका कुरा The Movie” संकिपाया रुपय् – शुटिंग स्वन्ति धुंका

येँ । काैलागाः प‌ंचमी

हिजो आजका कुरा The Movie संकिपाया रुपय् वयेत्यंगु दु । सन् १९९५ निसें २०१३ तक टेलिभिजनया संसारय् हास्यविधाया लिधंसाय् नेपाःया राजनैतिक, समाजिक, आर्थिकया लिसें जीवनय् वइगु अनेक समस्यायात कयाः हास्यव्य‌ंगया रुपय् धारावाहिक टेलिफिल्म कथं यक्वसिनं त्वमफिक स्वःगु हिजो आजका कुरा टेलिफिल्मया नांयात हे कयाः संकिपाया रुपय् दयेकेगु ज्या जुइत्यंगु खँ थौं छगू ज्याझ्वःया दथुइ धाःगु दु ।

हास्य कलाकारया रुपय् म्हसिका दयेकूम्ह सन्तोष पन्तं तःधंगु धकिंया संकिपा दयेकाः निर्माणया ख्यलय् पलाः तयेत्यंगु खः । प्याखंया बारे चिहाकलं जानकारी बिइगु झ्वलय् वर्तमान परिस्थिति झीगु सामाजिक जनजीवनय् विदेश वनेगु लहर न्ह्यानाच्वंगु व उकिं बिइगु उत्साह उमंगया लिसें मा हना वइगु समस्यायात संकिपाया मू खँया रुपय् न्ह्यब्वयेगु जुइ धाःगुु दु ।

विदेश वनीपिं, विदेशय् च्वनाच्वपिनिगु रहनसहन व म्वायेगु शैली, सामाजिक जीवनय् वइगु बाध्यता, म्वायेत यायेमाःगु संघर्षमय ई, परिवारया दबावयात न्हाय्कं थें थ्व हे समाजयात क्यना वास्तविकता न्ह्यब्वयेगु कुतः हे संकिपाया मू आज्जु धाःगु दु ।

मूख्यतः येँया प्यंगू परिवारया बाखंयात लिधँसा दयेकाः संकिपातय् न्ह्यब्वयेगु कुतः यायेत्यंगु खँ सी दूगु दु । संकिपातय् दयेमाःगु मरमसला कथं कहानी नापनापं न्हिकेगु ख्वयेकेगुया ई पाखें बालांगु पक्ष व बांमलागु पक्षयात नं न्ह्यब्वइ धाःगु दु ।

संकिपातय् मू भूमिका वरिष्ठ हास्य कलाकार सन्तोष पन्त, रमा थपलिया, नितेशराज पन्त, ऋचा शर्मा, केकी अधिकारी, रिमा विश्वकर्मा, जेविका काकीै, हास्य कलाकार सविन शाक्य व नव कलाकार विनायक कुइकेल, अनुष्का अधिकारीया लिसें मेमेपिं कलाकारयात चयन याःगु दु ।

अथेहे संकिपाया सहनिर्माता वैकुण्ठ प्रसाद उपाध्याय खःसा संकिपाया छायांकन नेवाः ख्यलय् तसकं नां जाःगु ऐतिहासिक संकिपा जा मनः गुभाजु दयेका दीम्ह रवि साय्मीं याइगु धाःगु दु ।

पन्त फिल्म प्रोडक्सनपाखें दयेके त्यंगु “हिजो आजका कुरा The Movie” संकिपाःया बाखं सन्तोष पन्त व साकार पन्त, निर्देशन साकार पन्त, च्वमि सन्दीप किस्ना, भी एफ एक्स र सम्पादन विनय कंसाकार, निर्माण नियन्त्रक सुवास राज काफ्ले, म्येर संगीत हक्र्युलिस बस्नेतया जुइ धाःगु दु ।

झीगु डटकम  पंक्तिकार नाप खँ ब्याकेगु झ्वलय् छायांकनया जिम्मा कयादीम्ह रवि साय्मीजुं स्वन्ति लिपा हे थुगु संकिपाया निर्माण ज्या न्ह्याइगु धाःगु दु । खँल्हाबल्हाया हे झ्वलय् वय्कलं – नेवाः ख्यलय् नेवाःतय्सं यायेफूगु याना हे च्वंगु दु तर नेवाःतसें थःके दूगु शीप कला कौशलता व क्षमतायात छगू चाकःया दथुइ जक मखु मेगु चाकः दुने नं क्षमता क्यनेगु चुनौतीयात साक्षात्कार यायेमाः, स्वीकार यायेमाः । अले जक झीसँ जीवनय् न्हून्हूगु ज्याया लिसें न्हूगु क्षेत्रय् थःगु पलाः धिसिलाके फइ धकाः धयादिल । प्राविधिक ज्याय् ला अझ सिमाना धइगु हे दइमखु न त भाय्या बन्देज । मात्र अन थःगु कला कौशल क्यनेगु व वर्तमान प्रविधिनाप अपडेट जुजुं वनेमाःगु चुनौतीया लँपु जक दइ गुकियात माःगु इलय् मा कथं छ्यलेगु हे छम्ह प्रविधिकःमिया भूमिका जुइ धयादिल ।

Leave a Reply

Your email address will not be published. Required fields are marked *