fbpx

स्वयम्भुराज शाक्यया सांगीतिक ज्याझ्वः – जेठ २५ गते

 

रेखा शाक्य । झीगु संवाददाता

बछला गाः चह्रे। यल

यल हःखाया वरिष्ठ म्ये हालामि स्वयम्भुराज शाक्यया “जुजु वेयर्स ओ प्रिय लिफः स्वयाः” नामं छगू न्ह्याइपुगु सांगितिक ज्याझ्वः जुइ त्यंगु दु । उगु सांगीतिक ज्याझ्वः सनिलया ५ ता इलय् हःखा यलय् न्ह्याइगु  थौं पत्रकार नाप खँ ब्याकेगु ज्याझ्वलय् थुगु खँया जानकारी आयोजक मंगल इन्टरटेन्टमेन्टपाखें ब्यूगु खः ।

म्ये हालामिपिं व वाद्यवादक ब्यागलं कोथाय् च्वनाः रेकर्ड जूगू बखतया अतिकं लोकंह्वाःगु ज्वः नेवाः म्ये शाक्य भाजु व मय्जु सपना श्रीया “ओ प्रिय लिफः स्वयाः छकः न्हिला हुँ”  या न्हापांगु झ्वःयात कयाः नामाकरण जूगु थुगु सांगितिक ज्याझ्वः आः वइगु जेठया २५ गते म्येहालामिया जन्मस्थान हःखा यलय् हे जुइगु धाःगु दु ।

म्ये हालामिया लिसें संगीतकार व वाद्यवादक भुपेन्द्र बज्राचार्ययाया संयोजनय् ८ म्ह वाद्यवादक संगीतकारपिनिगु साथ दइगु थुगु ज्याझ्वलय् म्ये हालामि बज्राचार्ययात वरिष्ठ म्ये हालामि संगीता शाक्य थापा, सुमन कपाली, नीशा देसार, चन्द्रमान शाक्य, अनु शाक्य व प्रियंका शाक्यं साथ बिइगु खँ ग्वसाः खलकं धाःगु दु ।

नातीकाजी, तीर्थ माली, मनराजा नकःमि, नरेन्द्र प्यासी, चन्द्रमान शाक्य, विरेन शाक्य, चन्द्रराज शर्माया संगीतय् म्ये हालामि भाजुं नेवाः ख्यलय् अतिकं लोकंह्वाना च्वने धुंकूगु नेवाः म्येत हे हालिगुलिइ नं च्वमिपिं मविवि शाह, दिनेश अधिकारी, बंशीधर बज्राचार्य, प्रकाश साय्मि, शाक्य सुरेन, चन्द्रमान शाक्य, तीर्थ माली, शान्त शाक्य, हेमन्त विवशया रचनायात थःगु सलं हाकनं जनमानसय् म्ये हाला न्यंकेगु ग्वसाः दुुगु खँ सिइदुगु दु ।

किपा रेखा शाक्य

रेडियो नेपालया विशिष्ट श्रेणीया म्ये हालामि शाक्यं न्यागू सोलो म्येचाःया लिसें २५० सिबें अप्वः म्ये हालादी धुंकूगु दु । अथेहे वि सं २०६१ सालय् स्वयम्भुराज शाक्य एकल साँझ यानादीगु खःसा वयां लिपा मेगु निगू याकः सनिल तकं क्वचाय्के धुंकुम्ह शाक्यं थुगसी प्यक्वःगु खुसिइ थःगु हे जन्म स्थानय् निःशुल्क रुपं संगीतया पारखीयात देछा कथं थःगु सांगीतिक ज्याझ्वः अन्य म्येहालामिपिनिगु साथ कयाः ज्याझ्वः याये त्यनागु खँ धयादीगु दु ।

वि सं २०२६ सालं म्ये हालेगुलिइ हे थःत समर्पित यानादीम्ह शाक्यं ता ई लिपा हाकनं छक्वः संगीतया माध्यमं न्यनामिपिनिगु नुगलय् संगीतप्रति उत्साहया लहर थनेगु तःधंगु मनंतुना जूगु खँ पत्रकारपिं नाप खँ ब्याकेगु झ्वलय् कनादीगु दु । वय्कःया  अतिकं लाेकंह्वाःगु नेवाः म्ये “मुसुक्क न्हिला हुँ” , “थः धाःपिं मनुत थाैं कतः थें जुया बिल” या लिसें जनमानसं न्हापांनिसें एफ एमय् आपालं थ्वयाः न्यनामिया न्हाय्पनं परिचित जुइ धुंकुगु म्ये हे हालेगु धकाः थ्व पंक्तिकारयात कनादीगु दु ।  वय्कःया लाेकंह्वाःगु म्येत “बुलुगु छप्वाः मत सुकुन्दाया जि”,  “छु जुल छु जुल छन्त छु जुल”, ” जात्राया हुलय् द्यः स्वः वनाः ल्यासेपिं नाप लात”, ” भुतुलिइ च्वना जा थुया च्वंम्ह नां काये मज्यूम्ह”, “समाजया दुने दुमथ्याम्ह जि” आदि इत्यादि खः ।

थुगु सांगीतिक ज्याझ्वःया प्रायोजकया रुपय् जुजु वेयर्स, सह प्रायोजक सम्झना लेब्ररेटोरी क्लिनिक प्रा लि, होटल सारा श्री प्रा लि लुम्बिनी, २४ क्यारेटया लिसें संगीत ख्यःया लिसें थुकिया थपु यायेगुलि नुगः क्वसाःपिं अन्य सक्रिय व्यक्तित्वपिनिगु गुहाली जुइ त्यंगुु खः ।थः

ज्याझ्वलय् मंगल इन्टरटेन्टमेन्टया प्रवन्ध निर्देशक भाजु लिटिल स्टार श्रेष्ठया लिसें म्ये हालामि शाक्यं पत्रकारया थी थी जिज्ञासायात कयाः न्यंगु न्ह्यसलय् लिसः बियादीगु खः ।

किपा रेखा शाक्य

Leave a Reply

Your email address will not be published. Required fields are marked *