fbpx

स्वम्ह स्रष्टाया झिन्यापू चिबाखं – सः छगू फरक अभिव्यक्तिया दबुलिइ

२५६३ क्वःगु बुद्धया जमोत्सवय् दिं कुन्हु सकलें श्री तथागतयात लुमंका च्वंगु इलय् यलया दबू नेवाः नसा छेँ ईखालखु,तलाछेँय् धाःसा साहित्यमय लकसय् खुक्वःगु खुसिइ चिबाखं वाचनया ज्या क्वचाःगु दु ।

ईश्वरी मैयाँ श्रेष्ठ, राजुराम मुनंकर्मी व बिमलप्रभा बज्राचार्यपाखें म्हतिं न्यापू चिबाखं ब्वना न्यंकादीगु खः । लय्या दकलय् न्हापांगु वाःया शनिबाः कुन्हु थुकथं स्वम्ह स्वम्ह स्रष्टापिन्त दबुलिइ थाय् बिइगु ज्याझ्वः कथं वय्कः चिबाखं च्वमिपिन्त पाहा‌ंकथं ब्वनातःगु खः ।

 

ज्याझ्वःया स्वरुप कथं  ईश्वरी मैयाँ श्रेष्ठया “कन्हे छु जुइगुू” , “सुखी व दुःखी”, “कल्पना व सत्य” , “गर्भ या मूू” व “पलख प्य”” खःसा राजुराम मुनंकर्मीया “दाता”, “च्वय्के मुँज्या”, “ख्वाःपाः,  “बिदेशी काय”  व “घाः” अथेहे बिमलप्रभा बज्राचार्यया  “भ्वय् दुनेया छगू सः”, “बाखँ पात्रया छ्याता”, “आयातित स्वाँ मुर्दाबाद”, “लिसः व “जिगु नं धायेगु दुू” खः ।

झीगु समाजय् न्यनाच्वंगु थथ्याःक्वथ्याः बिचाः, विकृति व असमान व्यवहारयात कयाः स्वम्ह साहित्यकार च्वमिपिन्सं न्ह्यब्वःगु चिबाखंयात लिपांगु इलय् समिक्षा यायेकथं साहित्यकार डा. पुष्षराज राजकर्णिकारं कुलादीगु खःसा शान्तराज शाक्यं नं बाखंयात कयाः थःगु नुगः खँ न्ह्यब्वःगु खः ।

सः छगू फरक अभिव्यक्तिया मू अभियन्ता कवि सुधिर ख्वविं स्वम्हं पाहां स्रष्टापिन्त मतिना चिं लःल्हाना दीगु खःसा न्यनामिपिं मध्ये गोलाप्रथा कथं रामबाबु श्रेष्ठयात श्याम माकजुं मतिना चिं लःल्हाःगु खः ।

“आपलं न्हूपिं पुलापिं साहित्यकार भाजु व मयजुपिनिगु उपस्थिति ला दुगु हे जुल थ्व तसकं नाले बहःगु खँ तर छम्ह सामान्य न्यनामिपिं तकं बाखं जूगुलिं न्यनेत झाइगु अले बाखं न्यने धुंकाः बिइगु प्रतिक्रियाहे थुगु ज्याझ्वःया दबू व साहित्यप्रति नुगः क्वसाःगुया दसू खः धाःसें पूर्ण कुमारी श्रेष्ठजुं तया दीगु  “तसकं न्ह्याइपु खःनी , गज्याः गज्याःगु बाखं त न्यने खन । न्हापा मां अजाअजिपिन्सं कनिगु बाखं सिबें पाः का”   उगु भावयात तकं लुमंकादिल ज्याझ्वः न्ह्याकामि सुनिल बज्राचार्यजुं थुम्ह पंक्तिकारया न्ह्यःने  ।

 

आः थ्वहे वइगु असार ७ गते शनिबाः सः छगू फरक अभिब्यक्तिया न्हय्क्वःगु ज्याझ्वलय स्वम्ह स्रस्टापिं कथं निजिरोस श्रेष्ठ , श्याम आशा अले शरद कसाः झाय त्यंगु खँ ग्वसाः खलःपाखें जानकारी बियादीगु दु ।

किपाः सभार सामाजिक सञ्चालपाखें

Leave a Reply

Your email address will not be published. Required fields are marked *