fbpx

सिद्धान्त छगू हे जुइ, किसिया निपू वा थें मखु – राजेन्द्र श्रेष्ठ 

रेखा शाक्य । झीगु सम्वाददाता 

“देशय् सुशासन कायम यायेया नितिं राजनैतिक नेतात जनताया चाहना थुइकाः इमिगु नं बशय् च्वने फुपिं व च्वनेमाः धइगु मानसिकता दुःसा ठीक खः, मखु, थः हे सर्वेसर्वाया धारदुपिं जुलधाःसा अज्यापिन्त निरंकुशया पर्यायवाची शब्द उचित जुइ ।” थुगु धारणा समाजवादी पार्टी नेपालया कार्यवाहक अध्यक्ष राजेन्द्र श्रेष्ठं म्हिगः नयाँ शक्ति व संघीय समाजवादीया एकता जुइ धुंकाः न्हापांगु खुसिइ नेवाः पत्रकारपिन्त नापलायेगु झ्वलय् थःगु धापू तयादिगु खः ।

किपा रेखा शाक्य

नेकपां मिडिया काउन्सिल विधयेक, स्वास्थ्य विधेयक लगायत विभिन्न विधेयकत हयाः नेकपां माखां त्यप घय्पुइगु व्यवहार क्यंगुलिं थौकन्हे सकसिकें असन्तुष्टीया भाव ब्वलनाच्वंगु यथार्थ खँ म्हिगः जूगु छगू पत्रकार सम्मेलनया ज्याझ्वलय् कनादिल । लिसें नेकपां व्यवस्थापिका, कार्यपालिका व न्यायपालिका थ्व स्वंगू अङ्गयात नं थःपिनिगु कार्यकर्ता भर्ती केन्द्र दयेकाच्वंगु दावी वयकलं यानादिल ।

आःयागु अवस्थाय् नयाँ शक्ति पार्टी नेपाल व संघीयसमाजवादी पार्टी एकता जुया समाजवादी पार्टी नेपाल गठन जुइधुंकाः सडक विस्तारया सवालयात कयाः न्हापा संघीय समाजवादी पार्टीया गुगु कथंया नीति ज्वनाच्वंगु खः व आः नं अथेहे खः, सिद्धान्त न्हापा छु खः आः नं व हे खः, किसिया निपू वा थें जुइ मज्यूगु खँ वय्कल‌ं धयादिल । थ्व पार्टीं आःया अवस्थाय् संघवाद व समाजवादयात नापं यंकेगुलि स्पष्ट दृष्टिकोण दूगु खँय् बः बियादिल लिसें थौंया इलय् संघीयताया नेतृत्व प्रदेश नं २ नं पूर्णरुपं कार्यान्वयन यानाच्वंगु खँ न्ह्यथनादिल ।

‘नेकपा एकल जातीय, नश्लिय पार्टीया रुपय् न्ह्यज्यनाच्वंगु अवस्थाय् जनता सन्तुष्ट मजुइगु लकसय् विद्रोह जुइफु । देशय् समान हक व अधिकारया नितिं समाजवादी पार्टीं बहुजातीय, बहुभाषिक, बहुराष्ट्रियता ल्वःकथं समुन्नत समाजवाद पक्षय् सः थ्वयेकाहे च्वनी’ श्रेष्ठं धयादिल ।
हलिंया अन्य देशय् जुयाच्वंगु राजनैतिक घटना व प्रशासनया ज्याया दसू व्यूसें संघीयताया नामय् राज्यया संरचना वाय् शासकिय स्वरुपय् जक मखसें शक्ति व अधिकार उगु हे थासय् च्वंपिन्त बिल धाःसा जक संघीयता बल्लाइगु वयकलं कनादिल ।

किपा रेखा शाक्य‘संघीयता धायेगु तर केन्द्रं नियन्त्रण याइगु प्रदेशत, केन्द्रीय सरकार पाखें संचालित प्रदेश सरकारया आवश्यक मखु, झीत माःगु स्थानीय जनता, भाषा, कला, संस्कृति, सम्पदाया उत्थानया नितिं क्रियाशील जुइगु अधिकार सम्पन्न राज्य खः’ श्रेष्ठया थज्यागु धापू खः ।

थःगु पार्टी सरकारय् दूगु खःसां तःबि मखुगु गतिविधिया विरोधय् सदां सः थ्वयेका च्वनागु धाःसें कार्यवाहक सह अध्यक्ष श्रेष्ठं पहिचानसहितया संघीयताया पक्ष सदां सः थ्वयेका च्वनेगु प्रतिवद्धता प्वंकादिल । संविधान संशोधनया नितिं हे समाजवादी पार्टी सरकारय् दुहाँवंगु धाःसें थुकिइ पहल मजुल धाःसा थःगु पार्टी सरकारं पिहाँ वयेगु तकं कनादिल ।

समाजवादी पार्टी नेपाल, काठमाडौं शाखाया ग्वसालय् म्हिगः येँया नेवाः पत्रकार नापलायेगु व सह अध्यक्ष श्रेष्ठलिसें सँग अन्तरक्रिया ज्याझ्वः जूगु खः ।

Leave a Reply

Your email address will not be published. Required fields are marked *