fbpx

सक्वया नादिखुसिइ लच्छिय‌ंकया माधवनारायण धल‌ं दनेगु न्ह्यानाच्वन

रेखा शाक्य

सक्व । पोहेला गाः दुतिया ११४०

दँय्दसं थें पोहेलाथ्व पुन्हिनिसें सिल्लाथ्व पुन्हि तक कनेज्या जुइगु श्री स्वस्थानी बाखं वंगु शुक्रबाःनिसें न्ह्याःगु दु । अथेहे येँया उत्तरपूर्वीपाखे थ्यंमथ्यं १८ कि.मीया दुरीइ च्वंगु ऐतिहासिक नेवाः बस्ती सक्वया तसकं धार्मिक महत्वं जाःगु नादिखुसिइ थ्वहे अवसरय् लच्छि तक तःधंगु मेला न्ह्यानाच्वंगु दु । व हे दिं कुन्हुनिसें सक्वया नादिखुसिइ सिथय् लच्छियंकं श्री माधवनारायणया धलं च्वनेगु न्ह्यानाच्वंगु दु ।

चिकुलाया कठिन व्रत कथं कयातःगु थुगु लच्छियंकया व्रतं मनं तुनागु पू वनिगुया लिसें सकल परिवारया भिं कामनायाना च्वनेगु व्रत पौराणिक धर्मग्रन्थ स्कन्द पुराणय् आधारित खः धाइ ।

थुगु व्रत च्वनेत थाय्थासं न्हापांगु न्हि कुन्हु थ्यंमथ्यं १९५ म्ह मुक्कं व्रतालु दुथ्याःगु दु । व्यवस्थापन समितिं ब्यूगु जानकारी कथं स्वन्हु लिपा तक नं मनूत व्रत च्वनेया नितिं नां दुतिनेत वइगु व्यवस्था दुगुलिं न्हापांगु दिंया ल्याः अप्वये फू धाःगु दु ।

कजि व साँवांया विशेष निर्देशन कथं व्रत च्वनिपिन्सं लच्छि तक विशेष नियम पालना यायेमाःगु व न्हियान्हिथं नादिखुसिइ म्वःल्हुया श्री माधवनारायणया धलं दनेगुया लिसें श्री स्वस्थानीया बाखं श्रवण याइगु धाःगु दु । न्हिथंया व्रत धुंकाः छज्वः मिजं व्रतालुं दुंदनेगु व सहस्रधारा हाय्काः सक्वय् नगरपरिक्रमाय् वनेमाःगु नियम दु । व हे सहस्रधारा हायेकीगु झ्वलय् लिउलिउ मिसापिं व्रतालुपिं माधव नारायण धाधां पुचलं नगर परिक्रमा याइगु धाःगु दु ।

This slideshow requires JavaScript.

व्रत च्वनेया नितिं पुन्हि छन्हु न्ह्यः सक्वया ज्योतिलिंगेश्वर महाद्यः नापसं च्वंगु सुन्दरी तिर्थय् धलं दनिपिं सकसिनं म्वः ल्हुयाः द्यःपिं पुजायानाः हाकनं सुन्दरी तिर्थय् म्वःल्हुयाः बलंपुलिइ नारांद्यःयात किसलि छाःगु खः । अन धलं दंकिम्ह बाज्यां सकसितं जल बियाः छ्वःगु खः ।
अनलिपा कन्हेकुन्हु पुन्हिया दिंस सुथन्हापां नादिखुसिइ भेला जुयाः श्री माधवनारायणयात मिजं व्रतालुपिन्सं म्वल्हुकेगु ज्या याःगु खःसा मिजंतय्सं खुसिइं थहाँ वयाः द्यःभागियानाः दुंदनेगु ज्या पूवंकूगु खः । अथेहे धलं दनेगु न्हापांगु दिं ११ बजेति निसें जक न्ह्याःगु खः ।
लच्छि यंकया व्रत च्वनेगु इलय् परदेश वनेमाःगु कथं थासंथासय् क्वछिनातःगु दिं कथं न्हापां देशय् दुने बज्रयोगिनीया ध्वाखा तक, अनलिपा पशुपति, हनुमानध्वाखा, फर्पिंग, पन्ति, चाँगु वनेमाःगु चलन दु ।

स्वस्थानीया बाखनय् उल्लेख जू कथं सत्ययुगय् विष्णु द्यःया सल्लाह कथं हिमालय् पुत्री पार्वतीं महाद्यः भात लायेमाः धकाः फीया शिवलिंग दयेकाः छुं मनसे अपसं च्वना महाद्यःयात प्राप्त यानाः थःगु मनंतुना पूवंकूगु उल्लेख दु । व हे पौराणिक ग्रन्थय् उल्लेखित खँया लिधँसाय् माधवनारायणया लच्छि व्रत च्वन धाःसा मनया खँ पूवनिगु व खुसिइ वनाः म्वः ल्हुया श्री माधवनाराणया दर्शन यायेवं पुण्य प्राप्त जुइगु विश्वास विश्वास जनमानसय् व्याप्त दु ।

Leave a Reply

Your email address will not be published. Required fields are marked *