fbpx

सः छगू फरक अभिव्यक्तिया १० गू ब्वक्वचाल

यल । ञला गाः अष्टमी

नेपालभाषा साहित्य ख्यः तब्या यानायंकेगु तातुनाः न्ह्याकूगु सः छगू फरक अभिव्यक्तिया १० गूगु ब्व यलया इखालखु, तँलाछेँस म्हिगः शनिवाः क्वचाःगु दु ।

प्रत्येक लाया न्हापांगु शनिवाः न्ह्याकाच्वंगु साहित्यीक ज्याझ्वलय् स्वम्ह स्रष्टापिन्त थःगु साहित्य न्ह्यब्वयेगु ह्वताः बियातःगु खः ।  सः छगू फरक अभिव्यक्तिया थुगु ब्वय् चिबाखं च्वमि केदार श्रेष्ठ ‘सितु’, रासा, स्नेह सायमिपिन्सं थःथःगु चिबाखं थाैंकन्हेया लकसयात ल्वःगु समसामयिक विषयबस्तुयात न्ह्यब्वया दिगु खः ।

किपा–राजेन्द्र रञ्जित

च्वमि ‘सितु’या बाखनय् थौंकन्हे थःगु देय् नेपाः त्वता न्ह्याथे यानाःसां विदेश वने हथायेपिं मिजं तयेसं थः कलाहे मेपिनि कला दयेकाः छ्वइपिं मनूतय्गु अतिहे कलात्मक शैलीं न्ह्याक्व न्यंसा न्यने मगाःथें च्वंक समाजया विकृतीयात न्ह्यब्वयातःगु बाखं अथेहे आधुनिकताय् भ्यलय् पुनाः धकाः थःगु संस्कार व अस्तित्वयात बह्र तया जुइिपं थाैंकन्हेया छथ्व मनूतय्त ध्याच्चु न्यंका च्वयातःगु बाखंया लिसें अन्य विषयबस्तुया बाखं न्यंकादीगु खः ।

 

रासाया चिबाखं चिहाकः जुयानं यइपुसेच्वं नापं छुं नं वस्तु वा बिचारय् मनूतय्गु दृष्टिकोण फरक फरक जुइफु धैगु अभिव्यक्ति न्ह्यब्वयातःगु खँया चिबाखंत ब्वना न्यंकादीगु खःसा  च्वमि सायमिं प्रविधिया विकास नाप नापं विदेशय् ब्वनावःपिं मस्त ल्यापटपय् व्यस्त जुयाः थः बुराबुरीपिं मांअबुपिनिगु सुसाःकुसाः यायेमफया च्वंगु ब्यथां नुगलय् च्वास्स सुइगु थाैंकन्हेया यथार्थताया चिबाखं कनादीगु खः । डा पुष्प राज राजकर्णिकारं सकसिगुं चिबाखं न्यनेधुंकाः बाखंयात कयाः थःगु बिचाः समिक्षात्मक कथ‌ं प्वंकादीगु खः  ।

किपा–राजेन्द्र रञ्जित

ज्याझ्वलय् ब्वतिकापिं मध्ये छम्हसित बिइगु मतिनाया चिं बाखँ च्वमि दिब्या ताम्राकारयात नापं बाखं ब्वनादीपिं स्वम्हसित लुमन्ति चिं सुधिर ‘ख्वविं’ लःल्हानादीगु खः । अथेहे बाखं च्वमिपिन्त हःपाः बिइकथं नेपालभाषा ह्यःमि मोक्ष बहादुर अमात्यं खादा क्वखायेकाः हनाबनायासे नगद दां नं लःल्हानादीगु खः ।

बुखँ–नेवाः सूचना केन्द्र
किपा–राजेन्द्र रञ्जित

किपा–राजेन्द्र रञ्जित

Leave a Reply

Your email address will not be published. Required fields are marked *