fbpx

सःयात ल्वयेक मोडल तयातःगु म्युजिक भिडियोया सार्वजनिक “छ लुइवं हे जीवन मुसुमुसु काःथें” खः थ्व म्युजिक भिडियो स्वयाः जि नं मचाय्कं न्हिला – रेखा शाक्य

रेखा शाक्य

शनिबाः । सकसिनं स्यू मनूतय्गु बिदाया दिं । विशेषयाना बिदाया दिं लाका हे यक्वसिया ज्याझ्वः तइ । छगू विडम्बना झी नेवाः ख्यलय् आपासिया थ्व हे न्हय्न्हुया छन्हु दिं शनिबाः कुन्हु हे ज्याझ्वः तइ । मेगु विडम्बना आपाः धइथें ब्वनाय् व हे ख्वाःपाःयात ब्वना तइ छाय्कि थज्यागु नेवाःतय्गु हरेक ज्याखँय् दक्वः नेवाः तय्गु सहभागिता दयाच्वनी मखु ।

तप्यंक धाय्गु खःसा नेवाः ख्यःया दक्वं बिधाय् नेवाः नुगः, दक्व नेवाःतय्के मदु । मेगु बिडम्बना यक्वः ज्याझ्वः छगू हे इलय् जुइगु हुनिं सकलें दक्वं ज्याझ्वलय् यःया नं थ्यंके फइमखु । अले दकले तःधंगु बिडम्बना ब्वनातःगु इलय् ज्याझ्वः न्ह्याइमखु ।

यक्वसिनं थ्व हे पहः थुइकाः ज्याझ्वलय् ब्वना तःगु ई सिबें १ घण्टा लिबाक वइ मुसुंन्हिला । अले अन न्हापां धाःगु इलय् थ्यंकवःपिन्सं लिसलय् मुसुंन्हिलेगु बाहेक मेगु लँपु दइमखु ।

थ्व जुल झीगु नेवाः ज्याझ्वलय् जुयाच्वनीगु खँ । थुकियात जिं छुं कुं खिनागु मखु मात्र वास्तविकता झीगु कनाच्वनागु जक खः । धाये फू थ्व खँ नं कनाच्वने माःगु ला ? मकंसां ज्यू खः, तर नेवाःतय्गु बानी जि नं छम्ह नेवाः जुसेलि जि जक गथे व्यागलं च्वनेफै । उकिं कनाबिया ।

म्हिगःया शनिबाः नं यक्वः हे ज्याझ्वःया ब्वना वःगु खः जितः । तर जिगु थःगु हे कार्य ब्यस्ततां यानाः सुथ जुइगु छगू म्युजिक भिडियोया उलेज्याय् जक हे वनेगु थःथम्हं क्वछिना ।

व हे कथं सुथसिया थ्यंमथ्यं पौने ९ बजे न्हूसतकया कोयला लाउण्जबारय् थ्यंक वना । विल्डिंग स्यू तर तःजाःगु छेँया गुगु तल्लाय् ला धइगु पाखें जि अनभिज्ञ । दुहाँ वना । लिफ्ट ला निगू हे दु । अन च्वया तल १ निसें ४ तला तक छगू लिफ्ट ५ निसें ८ तला तक मेगु लिफ्ट । क्या फसाद । जि गुगु लिफ्टय् च्वनेगु अलमल । जिं धया नी जि न्हापांगु खुसिइ व विल्डिंगय् थहाँ वनेत्यनागु धकाः ।

उकिं पलखः दना । ब्वनातःगु ई ८।३० खः जि थः हे नं १५ गु मिनेट लिपा जक थ्यंगुलिं मनूतय्गु वयेगु क्रम जुया हे च्वनी उपिं नाप हे थहाँ वनेगु मतिइ । धात्थें जिगु मतिइयात तय्जु यात वरिष्ठ म्ये हालामि जुजुकाजी रंजित वय्कःया जहानया लिसें मेपिं निम्ह । सकसितं ज्वलजपा याःसें वय्कःपिं नापं वय्कःपिन्सं धाःकथं ८ तलाय् थ्यन ।

लिफ्टं पिहाँ वयेवं लसकुस यायेत पियाच्वन पासा रामकृष्ण खड्गी व विरज महर्जनया मां रत्नकुमारी । अनं नं छगू तला स्वहाने गयाः थहाँ वनेमानिगु धाःगुलिं वना । तप्यंक पासा रमा बज्राचार्य सोफाय् फ्यतुना च्वन । अले छखे लाक पासा सुरज वीर वज्राचार्य ज्याझ्वःया नितिं उलेज्या जुइगु म्युजिक भिडियोया फ्लेक्स मिलेयाना च्वन । निम्हसितं नतुया लिक्क दुगु थर्मसं क्वाल गिलासय् जाय्काः जि नं छगू सोफाय् फ्यतुना ।

छचाखेरं मिखा ब्वाका । जि न्हापांगु खुसिइ थ्व थासय् पलाः थ्यंगुलिं जुइफु जिगु मिखा चाहिउगु । दुहाँ वनेवं तप्यंक ख्वाः ख्वाः ल्वाकाः क्रिमकलरया सोफासेट तयातःगु दथुइ टेबल तया । अथेह खवः पाखे नं सोफो दु अले छ त्वाथः थहाँ वनेगु यानाः हाफ सर्कलया सोफा तयातःगु दु । तुति लाइथाय् चागः त तयातःगु । न्ह्यःने अगंलय् जुइगु ज्याझ्वःया फ्लेक्स ब्वये सिधय् धुंकल । मिखा ब्वया । आर के फिल्मस् प्रोडक्सनया पिथनाय् धकाः मिजंम्हं मिसायात बुयातःगु बच्छि किपाः । अनं क्वय् उगु म्ये न्यने बहःगु व स्वये बहःगु तक थ्यंकेत योगदान बियादिपिनिगु किपाःया लिसें नां । न्ह्यागुसां जितः अनया लकस यल ।

लुखापाखे स्वया च्वना । बुलुहुँ मनूत छम्ह निम्ह यायां वयेगु क्रम न्ह्यानाच्वनसा थुखे ज्याझ्वः न्ह्याकेत प्रोजेक्टर नं मिलेयानाच्वन । जि दर्शक कथं मात्र नुगलय् खँ स्वत्तुमतु स्वयेका च्वना । झी नेवाःत छाय् धाःगु इलय् थ्यंके मफइगु जुइ । व हे मनूत शनिबाःया न्हिच्छिया थी थी ज्याझ्वलय् वनेमानिगु धलः ज्वना पिहाँ वइ । छगू ज्याझ्वः इलय् मन्ह्यायेवं साइकलस्टाय्ण्डय् पार्क यानातःगु साइकलचा छगुलि घ्वाना बिइवं खुरुरुरुरु मेगु दक्वं साइकल नं त्यांग्रा पुलि थें झीगु ई नं तुलावनी धकाः गबले वाः चाइगु जुइ ।

जिं निक्वः स्वक्वः आयोजक पासापिन्त ज्याझ्वः न्ह्याके मत्यनिला धकाः नं धयाः । बल्ल ९।४० बजे ति म्ये च्वमि भाजु सुरजवीर बज्राचार्यं माइक ज्वनाः ज्याझ्वः शुरु जूगु शंखनाद यात । सकसिया ध्यान वय्कःया खँय् । सुरजं थौं जुइत्यंगु ज्याझ्वःया बारे कन ।

विरज महर्जन न्यासः खुसः मनूतय् दथुइ धेंधेंबल्लायानाः थौंकन्हे अष्ट्रेलियाय् म्युजिक ब्वनेत वनाच्वंगु, मचाबलय्निसें सांगितिक ख्यलय् वय्कःया सक्रियता १३ दँया इलय् हे एकल साँझ, सोलो एल्बम नयाँ किरण, अथेहे ज्ञानमाला भजन, तुयुतुयु धाःगु नेवाः म्ये पाखें न्हूम्ह प्रतिभा म्ये हालामिकथं पेज ३ पिपुल्स च्वाइस अवार्ड प्राप्त, अथेहे नेपाली भाय्या मेरी आमा, अन लिपा थः प्यदँ तक नेपालय् मदयेवं थःत ल्वमंकीला छु थें धकाः ग्याःचिकुं यानाः अन वने न्ह्यः थ्व म्ये छपू प्यदँ तक नेपाः मदुसां वयागु सः थ्वयाच्वनेमाः धइगु मतिइ हाला वंगु खँ कन ।

ज्याझ्वःया शुरु आसनय् फय्तुकाः जक यायेगु झीगु नेवाः परम्पराकथं विरजया मां रत्नकुमारी व अबु विनोद महर्जनयात सःतादिल । अथेहे वरिष्ठ म्ये हालामि जुजुकाजि रंजित, संगीतकार जूगल डंगाल, निर्देशक रामकृष्ण खड्गी, छायाँकन व सम्पादन सोहन मानन्धर, प्राविधिक गुहाली सनी शाक्य अथेहे थुगु म्युजिक भिडियोस अभिनय यानादीपिं प्याखंहुलामिपिं सृष्टि महर्जन व अनुज शाक्ययात सःतेगु ज्या क्वचाय्कल । अन लिपा म्येहालामि रंजितजु पाखें म्युजिक भिडियोया उलेज्या याकाः म्युजिक भिडियोया सार्वजनिक जुगु घोषणा यानादिल । सकसियां मिखा जवः पाखेया अंगलय् ।

This slideshow requires JavaScript.

म्युजिकया लिसें कोरसया सलं थ्वःगु म्येय् मिसा नकिं व मिजंया हाउभाव खनेदत । लिसें म्ये नं । म्ये या बोल “छ लुइवं हे जीवन मुसुमुसु काःथें ख्यूँ चिला अथें हे झलमल धाःथें”  थ्वयाच्वन । सकलें एकचित्तं म्युजिक भिडियो स्वया च्वना । म्येय् जितः बांला ताल । नेवाः म्येय् नं छपू याकचां सुं मय्जुयात खंकाः वयागु हे मतिनाय् तनेगु चाहना ब्यक्त भावनायात कःघाना तःगु जुल । व हे कथं हरेक दृश्ययात छाँयाकन याःगु जुल । दकलय् यइपुगु व स्वभाविक जितः ताःगु छता खँ म्येय्या सःलिसे ज्वः लाक कलाकारयात अभिनय् याकातःगु ।

झीसँ स्वयेलं म्ये हालिम्ह छगू उमेरया जुयाच्वनी अभिनय यानाच्वनिपिं मेगु उमेरया । गुकिं यानाः व म्येया म्युजिक भिडियो न्ह्याक्वः हे बांलासां सलं सालाकायेत असमर्थ जुयाच्वनी । गुकिंयानाः छम्ह संगीतकार, निर्देशक व च्वमिया ज्यायात सही दिशा लुइमखु न त उकिय अभिनय याइपिं कलाकारया वाह वाही जुइ । उल्टां थथे न्यने मालेफु छम्ह म्ये हालामिया लंगडा शौखय् मेपिं घाःपाः ।

शायद जिगु थज्यागुु खँ न्यना जितः मति मभिंम्ह धायेफु । जिं ध्यबा फुकाः यानागु ज्याय् छन्त कपाः स्याःगु छाय् थथे नं धाइ जुइ । या जितः विरोध यानाः थज्यागु नेवाः संगीतया ज्याय् मसःते फु । तर सत्य सत्य थःगु नुगलय् ल्हाः तयाः मिखा तिसिना न्यनादिसँ छु रेखां मखुगु धाल ला ? गथे बांलायात चकंगु नुगलं च्वछायेगु हक दुथें मिले मजूगु व अस्वभाविकयात थथे मजिल धायेगु अधिकार जिके मदुला ? जिं ला थुलि हे जक थु यदि छि धात्थें सुयागुं भिं चितामि खःसा वयात न्ह्यःने हे बांला वा बांमला वा थथे यायेमाल धाःयेगु यायेमाः । छाय्कि व निष्पक्ष कमेन्ट खः ।

झीगु नेवाः ख्यलय् ध्यबाः फुकाः थःत स्क्रिनय् क्यनेगु चाहना याइपिं दु । थुकिया ज्वलन्त दसू जिं छिकपिन्त थ्व थ्व खः धकाः धयाच्वने मालिमखु । तर वय्कःपिन्त जिं थुलि हे इनाप यानागु दु कि यदि छिगु चाहना पू वंकेगु हे खःसा बांलाक अभ्यासया नापं उगु म्येया म्युजिक भिडियोसः अभिनय याइपिं नं थःगुु सः नापं ल्वःपिं कलाकारया उमेर स्वया तयादिसँ । वा छिं थम्ह हे म्ये हालागु लिप्सिंग अभिनय यानादिसँ । बाय्कग्राउण्डय् साइलेन्ट मेपिं कलाकारपिन्त अभिनय् याकादिसँ । सखे थुकिं याना छिगु कलाकारिताया लिसें छपू म्ये नाप स्वानाच्वंपिनिगु ज्या यात नं कदर यायेत अपुइ । थ्व जिगु सुझाव खः ।

अथेहे थुगु म्येय् अप्व धयाथें नेवाः म्येय् खनेदइगु हाकुपतासियात ब्वया जक हे नेवाः पहः क्यनेमाः धइगु मानसिकतायात हिलेगु कुतः खन । अभिनय यानादिपिं निम्ह नचापिं कलाकार । म्ये हाःम्ह हे ल्याय्म्ह जुगुलिं अभिनय नं उगु हे उमेरयात ल्वय्क अभिनय याकाः निर्देशक रामकृष्ण खड्गीं थुगु म्येयात न्याय यानादिल । अथेहे संगीकार डंगोलजुं थौंकन्हेया युवाः पुस्तायात म्युजिक भिडियोया माध्यमं नं नेवाः भाय्प्रति नुगः क्वसाकेगु छगू बांलागु लँपु कथं हाकुपतासिया पलेसा थौंकन्हेया आधुनिक वसतं पुंकाः अभिनय याकेगु प्रस्ताव निर्देशकनाप सहलह याना क्यनेगु ज्या जुल । लिसें विरजया अनुपस्थितिइ नं न्हूगु म्ये छपू पाखें कमसेकम प्यदँ तकया सुलं च्वने म्वायेक छपू म्येय्या खवः ग्वयाः दिल ।

समग्रय् म्ये बांला जु । यक्वः जिं हे धयाच्वन कि छिं स्वयेबलय् थम्ह धायेगु छुं मल्यने फु थ्व हे बिचाः याना म्येया बारे जिगु बिचाःयात थन हे त्वाथले ।

थुगु ज्याझ्वलय् सकसिनं थःथःगु बिचाः तयेगु ज्या नं जुल । म्येहालामि रंजितकारजुं थःपिनिगिु मचाः इलय् म्ये हालाबलय्या संघर्ष ईयात इनादिल सा बिरजया मांअबुयात काय्या नितिं यानादिगु योगदानया कदर यानादिल । अथेहे न्हूपिं कलाकार सृष्टि व अनुजयात वइगु दिनय् अझ सुथां लाक्क ज्या याना वने फयेमाः धकाः सुवाः बिल ।

नुगः खँ तय्गु झ्वलय् कलाकार निम्हसिनं थःपिन्सं थुगु म्युजिक भिडियोस अभिनय् यानागुया अनुभव प्वंकाः लिपा वइगु दिनय् अझं मिहेनत यायेगु बचं बियादिल ।

न्ह्यागुसां लिबाक्क ज्याझ्वः न्ह्यागुया व ईयात बांलागु छपू म्येयात सः नाप ज्वः लाःगु म्युजिक भिडियोलय् कभर यायेगु ज्या गुगु सकल टिम पाखें यानादिल व सह्रानीय ज्या खत । ज्याझ्वः सिधय्काः जि नं मन फुरंगयानाः छेँय् लिहाँ वया ।

Leave a Reply

Your email address will not be published. Required fields are marked *