fbpx

श्री माधवनारायण स्वस्थानी व्रत तथा शालिनदी सुधार समितिया पत्रकार सम्मेलन – सक्वय् लच्छियंक जुइगु व्रतयात कया

रेखा शाक्य । झीगु सम्वाददाता
सक्व । पोहेलाथ्व नवमी ११४०

थौं सक्वया नारिखुसिइ आः वइगु पोहेलाथ्व पुन्हिनिसें लच्छियंक न्ह्याये त्यंगु श्री माधवनारायण अपसंया बारे छगू पत्रकार सम्मेलन जुल ।

लच्छियंक जुइगु सक्वय् मेलाया इलय् छुं कथं व्यवधानत मवयेमाः धकाः अनया स्थानीय व्यवस्थापनपाखें सम्वन्धित सकल पक्षनाप खँ ब्याकाः बांलाक तयारी याये धुनागु जानकारी बिसें अन नये त्वनेया नापं मेला स्वःझाइपिं व नारिखुसिइ वया माधवनारायणया दर्शन हेतु झाइपिनिगु नितिं मनोरञ्जनया नं व्यवस्था दुगु जानकारी ब्यूगु दु । थाय्थासं मनूत मेलाय् वइगु जूगुलिं यातायात व्यवस्थापनय् नं उतिकं ध्यान तयागु धाःसें आपालं बसया थाय् थासं व्यवस्था तकं यानागु खँ धाःगु दु ।

किपा गुहाली किचः सिंह

पत्रकार सम्मेलनय् शंखरापुर नगरपालिकाकाया मेयर सुवर्ण श्रेष्ठजुं सक्वय् माघ मेलाय् झाइपिं धार्मिक पर्यटक अर्थात तीर्थटकतय् वय् वने अपुइकेत छन्हु निन्हुं हे सक्वय् वयेगु मू लँपु ग्राभेलिंग यायेगु बचं बियादिल ।
वय्कलं परापुर्वकालनिसें चलय् जुया वया च्वंगु थ्व मेलाय् व्रतालु व तीर्थटकतय् सुविधा व नगरया विकासया निंतिं पर्यटन प्रवद्र्धनया ज्याझ्वः न्ह्याकेगु धयादिल ।

पत्रकार सम्मेलनय् समितिया अध्यक्ष गोविन्दबहादुर श्रेष्ठजुं थ्व दँय् विदेशं झाइपिं वा स्वदेशयापिं पर्यटकतयेत सक्वय् बासं च्वनेगु व्यवस्था तकं यानागु व  करिब ५० म्ह पर्यटकपिन्त सुबिधा बिइफइगु खँ कनादिल ।

विजय कुमार भाष्करया संयोजकत्वय् जूगु उगु पत्रकार सम्मेलनय् लच्छियं सक्वया नारिखुसिइ न्ह्यागु मेलाया बारे जानकारी ब्यूगु खः । मेलाया लिसें लच्छियंक अन थाय्थासं अपसं च्वनेत वइपिं व्रतालुपिन्त च्वनेगु व्यवस्थाया बारे नं कनादीगु खः । जानकारी बिइगु झ्वलय् व्रतालुपिन्सं गबले छु छु यायेमाःगु धइगु धलः नं सार्वजनिक याःगु खः ।

वय्कलं बियादीगु जानकारी कथं श्री स्वस्थानी माधवनारायण व्रतया मू दिं चिभ्वय् नयेगु पौष २४ गते विहिबाः, २५ गते शुक्रबाः निसें व्रत न्ह्याइगु जूगु दु । अथेहे माघ ६ गते एकादशीया दिं कुन्हु नारिखुसिं बज्रयोगिनीया लुखा तक दुंदनेगु, माघ ८ गते परेदश वनेगु धकाः सक्वं बज्रयोगिनी व पशुपति, माघ ९ गते चतुदर्शी कुन्हु पशुपतिं फर्पिंग, माघ १० गते फर्पिंगं साँखु, माघ ११ गते साँखु पन्ति, माघ १४ गते पन्तिं साँखु, माघ १५ गते श्री पञ्चमीया दिं कुन्हु नारिखुसिया परिसरं सरस्वती स्थान तक दुंदनेगु, माघ १८ गते लगला सप्तमी कुन्हु सम्पूर्ण व्रतालुपिं झः झः धाय्क वसतं पुनाः माधवनारायणया जात्राय् सहभागी जुइ । थ्वहे दिं कुन्हु मिजंपिं म्ह दाना लँपुइ चाहिलीगु खःसा मिसापिं सहस्रधारा हाय्कुम्ह मिजं व्रतालुया लिउने च्वनाः सहस्रधाराय् जल त तं नगरपरिक्रमा याइ । थुगु इलय् १०८ थासय् जल छायेगु ज्या जुइ ।

अथेहे माघ २० गते द्रोण नवमी कुन्हु अप्सं च्वंपिं सकसितं तस्मी नकिगु जुइ । माघ २२ गते बुधबाः भिं एकादशी कुन्हु अपसं च्वपिंसं निकः व्रत च्वनेगु याइ । निक्वःगु खुसिइ मिसापिं व्रतालुपिन्सं माधवनारायण नापं खुसिइ म्वः ल्हुइ न्हयः पचां म्वः ल्हुइगु व फलफूल जक नयाः सक्वं चंगु नारायण थ्यंक वनी । हाकनं माघ २२ गते चंगुं सक्वः हे लिथ्यनी सा माघ २३ गते भीमसेन द्वादशी या पूजा जुइ थ्व कुन्हु सक्वया भिंद्यःया जात्रा जुइ । नापं ३३ कोटी द्यःपिन्त अश्वमेघ यज्ञया निमन्त्रणा बिइ । अनलिपा माघ २५ गते व्रत सांगे, माघ २६ गते मिगाः पूजा, माघ २७ गते व्रतालुपिन्सं माघया म्ये हाला भजन याइ । थुकथं लच्छि यंकया व्रत क्वचाइगु धाःगु दु ।

व्रत च्वनिपिं मिजं व मिसापिं यानाः मुक्कं ग्वम्ह दइ धइगु जानकारी अपसं च्वनीगु न्हापांगु दिं कुन्हु तिनी सिइदइगु धाःगु दु ।

थौं जूगु पत्रकार सम्मेलन श्री माधवनारायण स्वस्थानी व्रत तथा शालिनदी सुधार समितिया ग्वसालय् जूगु खः ।

Leave a Reply

Your email address will not be published. Required fields are marked *