fbpx

ल्यं दनिगु ई उपलब्धिमुलक यायेगु – नायः ऋषि प्रसाद श्रेष्ठया प्रतिबद्धता

ने सं ११३९ चौलागाः त्रयोदशी । यल

‘नेपालभाषा मंकाः खलः यल न्ह्यावनेगु लँपु’ विषयस म्हिगः बुधवाः यलया पूच्वःय् सहलह ज्याझ्वः जूगु दु । उगु सहलह मुँज्याय् वइगु दिनय् गुकथं न्ह्याः वनेमालि धइगु विषयस सकलनाप सहलहयासें बिचाः फ्वनेगु ज्या जूगु खः ।
ज्याझ्वलय् विपिन चित्रकार, चन्द्र महर्जन, रुप रत्न शाक्य, हिरारत्न शाक्य, शरण गोपाल महर्जन, शान्त राज शाक्य, दिपक नरसिंह श्रेष्ठ, वदन शर्मा, भुवनेश्वर जोशी, जुलुम चित्रकार, रामहरि कपाली, केदार श्रेष्ठ, नरेन्द्र श्रेष्ठ, सरिता महर्जन, शिल्भीया राजोपाध्याय, शाक्य सुरेन, किरण शाक्य, मोतिलाल शिल्पकार, निर्मल शाक्य, ज्ञानेन्द्र शाक्य व सुरेश प्रधानपिसं थःथःगु बिचाः प्वंकुसे सहलह ब्याकादीगु खः ।

नेवाः ज्याझ्वलय् नेवाः ल्यासे ल्याय्म्हतय्गु संख्या अप्वय्का यंकेगु,  नेवाः आन्दोलनया पुस्ताहस्तान्तरण यानायंंकेमाःगु, नेवाः तय्गु गतिविधियात कयाः संचार ख्यलय् सहलह ब्याकायंकेया नितिं नेवाः रिपोर्टस क्लब चायेकेमाःगु, नेवाः ज्याझ्लय युवातय्त आकर्षित यायेत न्हू न्हूगु प्रवृद्धियात छ्यलावनेमाःगु खँ आदि इत्यादि सहलहस न्ह्यःने वःगु सुझावत खः । गुकियात विशेषकथं काःगु दु ।

उगु हे सहलहया मू ति कथं  वःगु सल्लाह सुझावयात थी थी कार्यक्षेत्रय् ब्वथला मदिक्क न्ह्याकायंकेगु खँ सुभाय न्वचू तयेगु झ्वलय् मंकाः खलःया नायः श्रेष्ठं ल्यंदनिगु थःगु कार्यकाल ज्वःछि थुगु सहलह ज्याझ्वःयात साकार यायेगु प्रतिबद्धता प्वंकादीगु दु ।

किपा – राजेन्द्र रञ्जित

नेवाःतय्गु मू तातुना धइगु हे नेवाः राज्य खः । थुकिया नितिं मंकाः खलकं समन्वयकारी भुमिका म्हितेमाः, हस्तक्षेपकारी भुमिका म्हितेमाः, मंकाः खलकं नेपालभाषा ख्यलय् नेवाःतयेगु नितिं याये हे माःगु मेपिसं यानामच्वंगु ज्यात थःगु क्षमता कथं यानावनेमाःगु डा. राजकर्णिकारं सहलह ज्याझ्वः लिपा मूति कथं थःगु धापू तयादीगु खः ।

नेपालभाषा मंकाः खलः यलया नायः ऋषि प्रसाद श्रेष्ठया नायःसुइ हिरा रत्न महर्जनं न्ह्याकादीगु म्हिगःया ज्याझ्वलय् डा. पुष्प राज राजकर्णिकारं ज्यापौ न्ह्यब्वयादीगु खः ।

बुखँ – नेवाः सूचना केन्द्र

Leave a Reply

Your email address will not be published. Required fields are marked *