fbpx

लगं बहाःया दिगुद्यः पुनर्निर्माण क्वचाल

रेखा शाक्य

येँ । कछला बालाचह्रे ।
येँ महानगरपालिका वडा नं. २१ स्थित लगं त्वालय् च्वंगु ऐतिहासिक कीर्तिपुण्य महाविहार अर्थात लगं बहाः दुने च्वंगु दिगुद्यः पुनर्निर्माण क्वचाःगु दु । २०७२ सालया तःभूखाचं स्यंगु थुगु दिगुद्यः वंगु दँय् पुनर्निर्माणया ज्या न्ह्याकूगु खः ।

लगं बहाः दुनेया सकल शाक्य व वज्राचार्यपिनिगु दिगुद्यः अर्थात कुलदेवताया रुपं पुज्याना च्वंगु थुगु देगः दुने तसकं बांलागु चैत्य दु । स्वनिगःया आपालं नेवाः समुदायया कुलदेवता अप्वः धयाथें छेँय् पिने खुल्ला ख्यलय् दयाच्वनीगु खः तर छेँँय् पिनेया चकंगु थासये बहाः दुने हे कुलदेवताया छेँय् दुगु म्हो बहाः मध्ये लगं बहाः छगू नं खः ।

किपा नृपेन्द्र लाल श्रेष्ठ

लगं त्वाःया कीर्तिपूण्य महाविहार येँया दकलय् पुलागंगु बौद्ध विहार कथं कयातःगु दु । थ्व विहार दुने थौं स्वया ६०० दँ न्ह्यः थन कुलदेवता थापना याःगु विश्वास यानातःगु दु । दँय् छक्वः दिगु पुजा वा देपुजाया दिं कुन्हु लगं बहाः अन्तर्गत दुपिं शाक्य व वज्राचार्य समुदायपिन्सं देपुजा  (दिवाली पुजा) थ्व हे दिगु छेँय् च्वना हनेगु याइ ।

किपा नृपेन्द्र लाल श्रेष्ठ

दच्छि न्ह्यः येँ महानगरपालिकाया मेयर विद्यासुन्दर शाक्यं थुगु देगःया पुनर्निर्माणया जग तय्गु ज्या याःगु खः । वंगु शनिवाः देगः पूर्ण रुपं दयेके क्वचाय्वं वयकलं हे देगःया उलेज्या नं यानादीगु खः ।

Leave a Reply

Your email address will not be published. Required fields are marked *