fbpx

येँगाःया नासः द्यः देगः देयेकेज्या क्वचाल

येँ (तछलाथ्व ३), येँगाः इकुबहालय् नासः द्यः देगलया जिर्णोद्धार जूगु दु ।

जिर्णोद्धार सिधगु लसता ज्याझ्वलय् मूपाहाँकथं संघीय सांसद कृष्णगोपाल श्रेष्ठ उपस्थित जूगु खः ।

मूपाहाँपाखें पानसय् मत च्याका न्ह्याःगु उगु ज्याझ्वलय् चन्दादाता, ग्वाहालिमिपिनिगु नांधल दूगु शिलापत्र नंं अनावरण जुल ।

येँगाः, ज्याबहाः जःखः न्यागू ज्यापु समुदायया गुथियारतय्गु आस्थाया केन्द्र नाट्यश्वर देगः जिर्णोद्धार २०७० सालमा शुरु जुयाः थी थी हुनिं यानाः थुगुसि तिनि क्वचाःगु खः । थ्यंमथ्यं ७ लख खर्च जूगु उगु प्यागोडाशैलीया नाट्यश्वर देगः जिर्णोद्धार नासःद्यः जिर्णोद्धार समिति न्ह्यचिला जूगु खः ।

This slideshow requires JavaScript.

मूपाहाँ श्रेष्ठं इच्छाशक्ति जक दयेमा थथेज्यागु ज्या निरन्तरकथं यायेफैगु अले ग्वहालि नं सदा दयाच्वनीगु धाल । श्रेष्ठं आः मयासा गुबले यायेगु, झीसं मयासा सुनां याइ धकाः धाल ।
ज्याझ्वलय् येँमहानगरपालिकाया मेयर विद्यासुन्दर शाक्यं देगःया जिर्णोद्धार क्वचागुलिं सुभाय् बिल । थुज्यागु धार्मिक, सामाजिक लिसें आगं छेँ, गुथि छेँ, त्वाः छेँ दयेकेमाल धाःसा महानगरपालिकां तुरुन्त हे

बजेट फ्यानाबीगु जुइ धाल । केन्द्रनिसें स्थानीय तहतक थःपिनिगु हे सरकारया उपस्थिति दुबलय् धार्मिक संस्कृति लागाय् ग्वाहालि यायेत न्ह्याबलें तयार दु धाल ।

उगु ज्याझ्वलय् प्रदेश सांसद डा. अजयक्रान्ति शाक्य, हनुमाढोका दरबार संरक्षण समितिया प्रमुख उदयबहादुर पसःखलः लिसें मेपिं विशिष्ट ब्यक्तित्वपिनिगु उपस्थिति दुगु खः ।

नासः द्यः देगः जिर्णोद्धार समितिया नायः राम महर्जनया सभानायःसुइ क्वचाःगु उगु ज्याझ्वलय् समितिया छ्याञ्जे विनोद महर्जनं प्रगति विवरण अले दाँभरि राजु महर्जनं जिर्णोद्धार समितिया ल्याःचाः न्ह्यब्वःगु खः ।

Leave a Reply

Your email address will not be published. Required fields are marked *